ԿինոPAN. 12 ֆիլմ Մեթյու Մակքոնահիի մասնակցությամբ, որ պետք է դիտել

ԿինոPAN. 12 ֆիլմ Մեթյու Մակքոնահիի մասնակցությամբ, որ պետք է դիտել

Կարող եք ամենահայտնի և ճանաչված ֆիլմերը դիտել U!Com-ի կինոPAN բաժնում

PAN-ը և U!Com-ը հավաքել են Մեթյու Մակքոնահիի մասնակցությամբ այն 12 ֆիլմի ցանկը, որ պետք է անպայման դիտել: Թերևս՝ Հոլիվուդի պատմության մեջ ամենազարմանալի տրանսֆորմացիաներից մեկը կատարվեց հենց այս դերասանի հետ: Երիտասարդական ռոմատիկ կատակերգություններից Մեթյուն կտրուկ անցավ խորը դրամաների՝ մարմնավորելով բարդ, բազմաբովանդակ կերպարների, ինչն աննկատ չթողեց Ամերիկյան կինոակադեմիան, որն էլ դերասանի աշխատանքը գնահատեց՝ 2014-ին նրան «Օսկար» շնորհելով: Մակքոնահիի՝ վերջին տարիների դերասանական աշխատանքն աչքի է ընկնում վարպետությամբ ու ամեն անգամ անակնկալի բերում կինոդիտողին:

PanARMENIAN.Net - Ի դեպ, այսուհետ կարող եք ամենահայտնի և ճանաչված ֆիլմերը դիտել U!Com-ի պատվերով տեսավարձույթի կինոPAN բաժնում: Ընկերությունը մեծ տեսադարան ունի, որտեղ պահվում և պարբերաբար ներկայացվում են թարմացվող ֆիլմեր:

Կոնտակտ / Contact (1997)

Ռեժիսոր` Ռոբերտ Զեմեկիս, դերերում` Ջոդի Ֆոսթեր, Մեթյու Մակքոնահի, Ջեյմս Վուդս, Դևիդ Մորս, Ջեֆրի Բլեյք

«-Հայրիկ, կարծում ես այլ աշխարհներում կա՞ն մարդիկ:

-Չգիտեմ Էլլի: Բայց տիեզերքն ահռելի է, ու եթե նրանք չկան, այնքան տարածություն անիմաստ կկորչի»:

Հոլիվուդյան հրաշագործ Ռոբերտ Զեմեկիսը, հիմվելով հանճարեղ գիտնական և ֆանտաստ Կարլ Սագանի ստեղծագործությունների վրա, նկարահանել է նախորդ դարի 90-ականների, թերևս, լավագույն գիտաֆանտաստիկ ֆիլմերից մեկը: Աստղաֆիզիկոս Էլի Արովեյը փոքրուց երազում է միայն ու միայն աստղերի մասին` հավատալով, որ մի օր կստանա ազդանշան այլ աշխարհներից ու կապացուցի այլմոլորակայինների գոյության մասին իր տեսությունը:

Ո՞ւմ խորհուրդ կտանք դիտել. եթե գիտաֆանտաստիկ ժանրի սիրահար եք ու անտարբեր չեք հատկապես խելացի ֆանտաստիկայի նկատմամբ, ապա այս ֆիլմը Ձեզ համար է: Սրամիտ ու խճճված սյուժեն, դերասանական հրաշալի խաղն անմոռանոլի կդարձնեն ֆիլմի դիտումը:

Արատ / Fraility (2001)

Ռեժիսոր` Բիլ Փեքսթոն, դերերում` Բիլ Փեքսթոն, Մեթյու Մակքոնահի, Փաուերս Բութ

«Մենք մարդկանց չենք սպանում: Մենք ոչնչացնում ենք հրեշներին»:

Կրոնական մոլեռանդությունից մինչև մոլագարություն ու սպանություն ընդամենը մեկ քայլ է: Հետախուզությունների դաշնային բյուրոն հետապնդում է մարդասպան մոլագարի, որը հայտնի է «Աստծո Ձեռք» մականունով, որովհետև նա սպանում է մարդկանց` իբրև աշխարհը չարքերից ու արատներից ազատելու համար: Հետաքննության ընթացքում աստիճանաբար ջրի երես են դուրս գալիս մարդասպանների ընտանիքի մասին սարսափելի մանրամասներ:

Ո՞ւմ խորհուրդ կտանք դիտել. առաջին հերթին` մռայլ, բարդ սյուժեով թրիլլերների սիրահարներին, ովքեր չեն խորշում մարդկային ներաշխարհի ամենամութ անկյուններն ուսումնասիրելուց:

Սահարա / Sahara (2005)

Ռեժիսոր` Բրեք Այսներ, դերերում` Մեթյու Մակքոնահի, Պենելոպա Քրուզ, Սթիվ Զան, Ուիլյամ Մեյսի

«Մի անհանգստացիր: Սա Աֆրիկան է: Ոչ ոք չի անհանգստանում Աֆրիկայի համար»:

Դիրք Փիթն արկածների մեծ սիրահար է: Արևմտյան Աֆրիկայում տարածված խորհրդավոր հիվանդությունը բազում մարդկային կյանքեր է խլում, և ֆիլմի հերոսն իր ընկերների ու հմայիչ բժիշկ Եվա Ռոխասի հետ պետք է պարզեն դրա տարածման իրական պատճառներն ու բացահայտեն խոշոր ու անմարդկային դավադրությունը:

Ո՞ւմ խորհուրդ կտանք դիտել. «Ինդիանա Ջոնսի» մասին պատմող արկածային կինոշարքի սիրահարներին այս ֆիլմը մեծ բավականություն կպարգևի: Բազում վտանգների միջով ֆիլմի հերոսներին կօգնեն անցնել սրամտությունն ու հումորի զգացումը` անգամ անելանելի իրավիճակներում:

Փող երկուսի համար / Two for the Money (2005)

Ռեժիսոր` Դի Ջեյ Կարուզո, դերերում` Ալ Պաչինո, Մեթյու Մակքոնահի, Ռենե Ռուսո, Արմանդ Ասանտե

«Ես գիտեմ այն, ինչ դու գիտես, ու գիտեմ այն, ինչ դու չգիտես: Եվ գիտեմ այն ամենն, ինչ դու իմացել ես մինչ այն պահը, երբ դու դա իմացել ես»:

Ո՞վ չի սիրում սպորտ: Դա ոչ միայն ազարտ է` զուտ մարզական հետաքրքրությունից ելնելով, այլև փառքի ու մեծ գումարների աշխարհ: Եթե դու հաջողության ես հասնում, բոլորը քեզ պաշտում են: Սակայն փորձիր սայթաքել ու իսկույն կտեսնես, թե ինչպես են մարդիկ տրորում քո երբեմնի փառքը: Նման իրավիճակում չհայտնվելու համար նախկին պորֆեսիոնալ ֆուտբոլիստը սկսում է գործակցել ոչ այնքան օրենքի դաշտում գործող բուքմեյքերի հետ` հույս ունենալով մեծ գումարներ աշխատել:

Ո՞ւմ խորհուրդ կտանք դիտել. հոլիվուդում կարողանում են նկարահանել մարզական ֆիլմերն այնպես, որ անհնար է կտրվել էկրանից: Եթե սպորտի սիրահար եք և Ձեզ հետաքրքրում է նաև բուքմեյքերական աշխարհի «ներքին խոհանոցը», ապա շտապեք դիտել այս ֆիլմը:

Սեր և այլ անախորժություններ / Failure to Launch (2006)

Ռեժիսոր` Թոմ Դեյ, դերերում` Մեթյու Մակքոնահի, Սառա Ջեսիկա Փարքեր, Զոի Դեշանել, Բրեդլի Քուփեր

«Որոշ տղամարդիկ ուղղակի թեթև խթանի անհրաժեշտություն են զգում»:

Եթե Դուք 30-ն անց տղամարդ եք ու մինչև հիմա ընտանիք չեք կազմել, ապա պատրաստ եղեք բոլոր կողմերից լսելու մեղադրական խոսքեր. «Ամուսնանալու մասին մտածիր, աղջիկ գտիր, ընտանիք կազմիր»: Թրիպը ևս ամեն օր լսում է այս խոսակցությունները, ինչի արդյունքում նրա ընտանիքի անդամները որոշում են դիմել ծայրահեղ քայլի: Նրանք վարձում են տաղանդավոր մի աղջկա, ով պետք է ստիպի տղային սիրահարվել իրեն ու վերջապես լքել հայրական տունը:

Ո՞ւմ խորհուրդ կտանք դիտել. ռոմանտիկ կատակերգությունների սիրահարները կգնահատեն այս թեթև, պարզ ու բավականին ծիծաղելի ֆիլմը` լի զավեշտալի իրադարձություններով:

Նախկին ընկերուհիների ուրվականները / Ghosts of Girlfriends Past (2009)

Ռեժիսոր` Մարկ Ուոթերս, դերերում` Մեթյու Մակքոնահի, Ջենիֆեր Գարներ, Մայքլ Դուգլաս, Բրեքին Մեյեր

«Սերն անկիրթների ու թույլերի սիրելի ուտեստն է»:

Ռոմանտիկ ֆենտեզին բավականին յուրահատուկ ժանր է, և միշտ չէ, որ դրա ներքո ստեղծված ֆիլմերն արժանանում են բարձր գնահատականի: Միայն ծույլ կինոքննադատը բացասական երանգներով չի խոսել Մարկ Ուոթերսի ֆիլմի մասին, սակայն կինոդիտողն առավել հանդուրժող էր: Սրտակեր Քոնըր Միդի և նրա նախկին ընկերուհիների ուրվականների մասին այս ծիծաղելի պատմությունը հասարակ կինոդիտողի քիմքին հարիր դուրս եկավ:

Ո՞ւմ խորհուրդ կտանք դիտել. դժվար է համատեղել ռոմանտիկ կատակերգությունը միստիկ ժանրի հետ` ստանալով բավականին հետաքրքիր արդյունք: Եթե փորձարկումները կինոյի տարբեր ժանրերի միախառնմամբ Ձեզ հետաքրքրում են, ապա այս կինոն հաճելի երեկո անցկացնելու լավ ընտրություն է:

Լինքոլն փաստաբանի համար / The Lincoln Lawyer (2011)

Ռեժիսոր` Բրեդ Ֆուրման, դերերում` Մեթյու Մակքոնահի, Մարիսա Թոմեյ, Ռայան Ֆիլիպ, Ուիլյամ Մեյսի, Ջոշ Լուկաս, Ջոն Լեգուիզամո, Ֆրենսիս Ֆիշեր, Բրայան Քրենսթոն

«Ես ստուգել եմ այն մարդկանց ցուցակն, ում վստահում եմ, և Ձեր անունն այնտեղ չկար»:

Հաջողակ փաստաբան Միկի Հոլերի համար կա ընդամենը մեկ կանոն. հաճախորդի անմեղության աստիճանը կախված է նրա վճարած գումարից: Փաստաբանի համար սովորական ու հերթական գործերից մեկը կապված է մարմնավաճառի վրա հարձակված հարուստ հաճախորդի հետ: Սակայն գործը սովորական է միայն առաջին հայացքից: Ավելի մոտ ուսումնասիրությունը վեր է հանում բազում մութ գաղտնիքներ, որոնք իմանալը կարող է անգամ Հոլերի համար մահացու վտանգ ներկայացնել:

Ո՞ւմ խորհուրդ կտանք դիտել. բավականին ամուր կառուցվածք ունեցող ու լավ բեմադրված այս դետեկտիվային պատմությունը կինոդիտողին լարվածության մեջ է պահում մինչև վերջին րոպեն: Եթե սիրում եք անսպասելի սյուժետային շրջադարձներ, ապա ֆիլմը Ձեզ համար է:

Թղթակիցը / The Paperboy (2012)

Ռեժիսոր` Լի Դենիելս, դերերում` Մեթյու Մակքոնահի, Նիկոլ Քիդման, Զակ Էֆրոն, Ջոն Քյուզակ, Սքոթ Գլեն, Մեյսի Գրեյ

«Իր առաջին, իրական սիրուց հետո նա այդպես էլ ուշքի չեկավ»:

Ո՞րն է լավ լրագրողական սյուժե պատրաստելու գաղտնիքը: Տեսնել այն, ինչ մյուսները չեն տեսել, թափանցել այնտեղ, ու ոչ ոք չի էլ փորձել նայել: 60-ականների Միացյալ Նահանգներում ռասիզմը դեռ տարածված հիվանդություն էր, իսկ այս հողի վրա սպանությունները` սովորական երևույթ: Շերիֆի դաժան սպանության հետ կապված լրագրողական հետաքննությունը, սակայն, ինքն իրենով արյունոտ մի նոր պատմության սկիզբ կդառնա:

Ո՞ւմ խորհուրդ կտանք դիտել. կինոքննադատները բացասական գնահատեցին Լի Դենիելսի ֆիլմը` ավելորդ դաժանության և բաց տեսարանների առատության պատճառով: Սակայն ֆիլմը միաժամանակ վեր է հանում բազում սոցիալական խնդիրներ, որոնց լուծման տարբերակներին կարող եք ծանոթանալ` դիտելով այն:

Քիլեր Ջոն / Killer Joe (2011)

Ռեժիսոր` Ուիլյամ Ֆրիդկին, դերերում` Մեթյու Մակքոնահի, Էմիլ Հիրշ, Ջունո Թեմպլ, Թոմաս Հայդեն Չըրչ, Ջինա Գերշոն

«Իմ վճարը 25 հազար դոլար է, կանխիկ, նախօրոք: Ոչ մի բացառություն»:

«Էկզորցիստի» հեղինակ, լեգենդար ռեժիսոր Ուիլյամ Ֆրիդկինը 76 տարեկանում նկարահանել է իր, երևի թե, ամենասարսափելի ֆիլմը` որպես դատավճիռ ժամանակակից հասարակությանը, որը երբեք չի վերանայվի: Մանր թմրավաճառ Քրիսը նպատակ ունի կազմակերպել սեփական մոր սպանությունը` ապահովագրական գումարը ստանալու և պարտքերը վճարելու համար: Այդ նպատակով նա դիմում է ոստիկան ու, համատեղությամբ, վարձու մարդասպան Ջոին:

Ո՞ւմ խորհուրդ կտանք դիտել. ֆիլմը դիտելու համար առաջին հերթին պահանջվում են երկաթյա նյարդեր և դիմադրողականություն: Եթե օժտված եք այդ հատկություններով, ապա զավեշտալի այս պատմությունն ու փայլուն դերասանական խաղն իրական հաճույք կպատճառեն:

Սուպեր Մայք / Magic Mike (2012)

Ռեժիսոր` Սթիվեն Սոդերբերգ, դերերում` Չենինգ Տատում, Ալեքս Պետիֆեր, Մեթյու Մակքոնահի, Քոուդի Հորն

«Նրանք դա փողի դիմաց են անում»:

Սթիվեն Սոդերբերգը սիրում է իր ֆիլմերում ուսումնասիրել հասարակական կյանքի ամենատարօրինակ դրսևորումները: «Սուպեր Մայք» կատակերգական դրաման քաղաքը հանցագործներից փրկող գերհերոսի մասին չէ: Այն պատմում է 30-ամյա մերկապարողի մասին, ով օրվա ընթացքում աշխատում է շինարարությունում, իսկ գիշերը պարում մոտակա գիշերային ակումբում: Տղամարդկանց մերկապարի նրբությունները Մայքը որոշում է փոխանցել «մասնագիտության» մեջ նորեկ, երիտասարդ տղային:

Ո՞ւմ խորհուրդ կտանք դիտել. թող ֆիլմի սյուժեն Ձեզ չվախեցնի, որովհետև Սոդերբերգին հաջողվել է հրաշալի բալանսի և սուր հումորի միջոցով ստեղծել բավականին հետաքրքիր սոցիալական ուսումնասիրություն` նաև իսկական տղամարդկային ընկերության մասին: Այն հատկապես կհետաքրքրի պարային ֆիլմերի սիրահարներին:

Գնորդների դալլասյան ակումբ / Dallas Buyers Club (2013)

Ռեժիսոր` Ժան-Մարկ Վալե, դերերում` Մեթյու Մակքոնահի, Ջենիֆեր Գարներ, Ջարեդ Լետո, Սթիվ Զան

«Ոչինչ աշխարհում չի կարող Ռոն Ուդրուֆին 30 օրում սպանել, և ես դա կապացուցեմ»:

Մահացու հիվանդության մասին լուրը շրջում է ցանկացած մարդու աշխարհը: Այս դեպքում շատերը նախընտրում են մնալ փլատակների տակ, իսկ որոշները` պայքարել մինչև վերջ: Ռոն Ուդրուֆի` սովորական ամերիկացու իրական պատմությունը, ով ՁԻԱՀ-ի ախտորոշումից հետո ոչ միայն պայքարեց սեփական կյանքի համար, այլև փրկեց բազում այլ կյանքեր, երկու տարի առաջ առաջացրեց կինոքննադատների հիացմունքը: Մեթյու Մքքոնեհիի և Ջարեդ Լետոյի փայլուն դերասանական խաղերը գնահատվեցին նաև Ամերիկյան կինոակադեմիայի կողմից` «Օսկար» մրցանակների տեսքով:

Ո՞ւմ խորհուրդ կտանք դիտել. սուր և բարդ սոցիալական դրամաների սիրահարներին, ում հետաքրքրում են հատկապես ուժեղ անհատականությունների մասին պատմությունները: Ի վերջո, հենց նման մարդկանց օրինակն է շատ հաճախ օգնում հաղթահարել սեփական դժվարությունները:

Գայլն Ուոլ-Սթրիթից / The Wolf of Wall Street (2013)

Ռեժիսոր` Մարտին Սկորսեզե, դերերում` Լեոնարդո ԴիԿապրիո, Ջոնա Հիլ, Մարգո Ռոբի, Քայլ Չանդլեր, Ռոբ Ռայներ, Մեթյու Մակքոնահի, Ջոն Բերնթալ

«Փորձիր վաճառել ինձ այս գրիչը»:

Հանճարեղ Մարտին Սկորսեզեի վերջին կինոկտավը բավականին մեծ աղմուկ առաջացրեց թե կինոքննադատների, և թե կինոդիտողների շրջանում: Ֆինանսական մեքենայությունների միջոցով միլիոնատեր դարձած Ջորդան Բելֆորթի ինքնակենսագրական գրքի էկրանավորումը վարպետի ամենափայլուն և հակասական գործերից մեկն է, որը, մեկ անգամ դիտելուց հետո, երբեք այլևս չի մոռացվի:

Ո՞ւմ խորհուրդ կտանք դիտել. այս ֆիլմում ներառված է միայն լավագույնը: Հրաշալի դերասանական խաղ և ռեժիսուրա, սրամիտ սյուժե ու արտակարգ հումոր, մարդկային ագահության և ամենաբարդ իրավիճակներից ելք գտնելու կարողության մի ամբողջ գունապնակ: Խելացի ֆիլմերի սիրահարների համար այն դիտելը պարտադիր պայման է:

Արման Գասպարյան / PanARMENIAN.Net
 Ամենաընթերցվողը բաժնում
Ի՞նչ է պլանավորում անել Netflix-ը՝ բաժանորդներին վերադարձնելու համար
«Երեք շիշ գինի»՝ նոր ձևաչափ առանց սահմանների
Վանդալիզմի զոհ դարձած արվեստի ամենահայտնի գործերը
Գագոսյանի ճանապարհը՝ հոլիվուդյան ֆիլմի մոտիվներով
 Ուշադրության կենտրոնում
Երևան-Լիոն գործակցության հեռանկարում Կոնդի վերակառուցումն առանցքային կլինի

Երևան-Լիոն գործակցության հեռանկարում Կոնդի վերակառուցումն առանցքային կլինի Տիգրան Ավինյանն ու Գրեգորի Դուսեն այցելել են պատմական թաղամաս

 Բաժնի այլ նյութերը
Դեգան, Սարյանն ու Ուրարտուն Մշակութային յուրացում՝ մեծերի թեթև ձեռքով
Սկանդալն Օսկարի երկրորդ անունն է Կինոաշխարհի ամենաքննարկվող մրցանակաբաշխության դեպքերն ու դեմքերը
---