4  21.07.15 - Ռոբեր Գեդիգյան` կինոռեժիսոր, դերասան, սցենարիստ և պրոդյուսեր
7 փաստ ֆրանսահայ ռեժիսոր Ռոբեր Գեդիգյանի մասին

7 փաստ ֆրանսահայ ռեժիսոր Ռոբեր Գեդիգյանի մասին

Գեդիգյանը բազմաթիվ կինոփառատոնների մասնակից է

Ռեժիսոր, սցենարիստ և պրոդյուսեր Ռոբեր Գեդիգյանի հայրը հայ է, մայրը՝ գերմանուհի: Նա կինոյի ասպարեզում է 1980-ից: Ապրում է Մարսելում՝ նրա ֆիլմերի մշտական միջավայրում, բազմաթիվ կինոփառատոնների մասնակից է: Գեդիգյանը 19 ֆիլմ ունի, որոնցից 3-ը՝ «Ուղևորություն դեպի Հայաստան», «Ոճրագործության բանակ»-ն ու «Խենթ պատմություն»-ը հայկական թեմաներով են. վերջինով այս տարի բացվեց 12-րդ «Ոսկե ծիրան»-ը՝ այն անդրադառնում է Հայոց ցեղասպանությանը: PanARMENIAN.Net-ը հավաքել է 7 փաստ, որ պետք է իմանալ ֆրանսահայ ռեժիսորի մասին:

PanARMENIAN.Net - 1. Իր առաջին ֆիլմը ռեժիսորը նկարահանել է 26 տարեկանում: Համոզված է՝ կինոյի աշխարհում տեղ գտնելու համար առաջին հերթին անհրաժեշտ է ձգտել ինքնարտահայտվելու, մյուսների հետ խոսելու մեծ ցանկություն ունենալ` բոլոր հնարավոր միջոցներով:

2. Ռոբեր Գեդիգյանը համոզված է՝ ժամանակակից ֆիլմ նկարելու համար ոչինչ պետք չէ: Նրա ֆիլմերում աշխատել են ընկերները, ընտանիքի անդամները, մարդիկ, որոնք ամբողջ գիշեր գալիս էին նկարահանման հրապարակ, իսկ առավոտյան շտապում աշխատանքի, և ոչ ոք չէր վճարվում:

3. 2001-ին Գեդիգյանն իր «Քաղաքը հանգիստ է» ֆիլմի համար Եվրոպական կինոակադեմիայի մրցանակաբաշխության ժամանակ ստացել է Կինոքննադատների միջազգային ասոցիացիայի (FIPRESCI) մրցանակը: Ռեժիսորից բացի, տարբեր մրցանակների են արժանացել նաև նրա ֆիլմերում նկարահանված դերասանները, որոնց թվում նաև նրա կինն է՝ Արիան Ասկարիդը:

4. Գեդիգյանի «Կիլիմանջարոյի ձյունը» դրաման 2011-ին ներկայացված էր Կաննի կինոփառատոնի «Հատուկ հայացք» ծրագրում, որը հիմնական մրցույթից հետո կարևորությամբ երկրորդն է: Հենց Կաննում էլ կայացավ ֆիլմի պրեմիերան: Պատմությունը գրելիս Ռոբեր Գեդիգյանը և Ժան-Լուի Միլեզին ոգեշնչվել են Վիկտոր Հյուգոյի «Խեղճ մարդիկ» երկից՝ ընդգրկված «Դարերի լեգենդը» բանաստեղծությունների եռահատոր ժողովածուում: Իսկ վերնագիրը հեղինակները վերցրել են մի երգից, որը գլխավոր հերոսները կատարում են ֆիլմում. խոսքը Պասկալ Դանելի «Կիլիմանջարո» երգի մասին է, որը ֆրանսերեն հայտնի է որպես Les Neiges du Kilimandjaro (թարգ.՝ «կիլիմանջարոյի ձյունը»):

5. Ռեժիսորը սիրահարված է ֆրանսիական կինոյին դրա յուրահատկություններով հանդերձ: Նրա խոսքով, ֆրանսիական կինոարվեստը պատմական մեծ ավանդույթեր ունի, ամեն ինչ ներառում է իր մեջ: Գեդիգյանն ասում է՝ ֆրանսիական կինոյում աշխատող բոլոր մարդիկ նվիրյալներ են: Ֆրանսիան նաև տարբեր անկյուններից եկած կինոգործիչների է միավորում:

Գեդիգյանի «Խենթ պատմություն» ֆիլմից կադր

6. Հայոց ցեղասպանության թեմային նվիրված «Խենթ պատմություն»-ը նկարահանելուն նրան ոգեշնչել է իսպանացի հայտնի գրող և լրագրող Խոսե Գուրիարանի կյանքն ու գործունեությունը, որն արտացոլված է նրա ինքնակենսագրական La Bomba գրքում: Գեդիգյանի խոսքով, դա նրան տվել է ֆիլմի «բանալին» և 100 տարվա պատմության մեջ թափանցելու մի տեսանկյուն. «Զգում էի, որ պարտավոր եմ, պատասխանատու եմ նկարել այս ֆիլմը: Ինձ թվում է, որ կինոգործիչները, մտավորականները, կարծիք ձևավորող լիդերները պատասխանատություն են կրում: Ինձ համար կարևոր էր, որ այս ֆիլմը ստեղծվեր հենց այս պահին, քանի որ սա ոչ միայն Հայոց ցեղասպանության 100-րդ տարելիցն է, այլև Թուրքիայի կողմից 1915-ի եղելությունը չընդունելու, ժխտելու 100 տարին»:

7. Գեդիգյանի համար ոգեշնչման աղբյուրը հենց ինքն է՝ իրեն շրջապատող աշխարհի հետ ունեցած հարաբերություններով:

 Ամենաընթերցվողը բաժնում
Ի՞նչ է պլանավորում անել Netflix-ը՝ բաժանորդներին վերադարձնելու համար
«Երեք շիշ գինի»՝ նոր ձևաչափ առանց սահմանների
Վանդալիզմի զոհ դարձած արվեստի ամենահայտնի գործերը
Գագոսյանի ճանապարհը՝ հոլիվուդյան ֆիլմի մոտիվներով
 Ուշադրության կենտրոնում
Երևան-Լիոն գործակցության հեռանկարում Կոնդի վերակառուցումն առանցքային կլինի

Երևան-Լիոն գործակցության հեռանկարում Կոնդի վերակառուցումն առանցքային կլինի Տիգրան Ավինյանն ու Գրեգորի Դուսեն այցելել են պատմական թաղամաս

 Բաժնի այլ նյութերը
Դեգան, Սարյանն ու Ուրարտուն Մշակութային յուրացում՝ մեծերի թեթև ձեռքով
Սկանդալն Օսկարի երկրորդ անունն է Կինոաշխարհի ամենաքննարկվող մրցանակաբաշխության դեպքերն ու դեմքերը
---