Բասի արքան Երևանում

PanARMENIAN.Net - Քոենը համարվում է կոնտրաբաս նվագող իր սերդնի լավագույն երաժիշտը: Նա նվագում է ոչ միայն մատներով և ձեռքի ափով, այլև արմունկներով, ծնկներով՝ մի ամբողջ նվագախմբի տպավորություն ստեղծելով: Նրա ստեղծագործություններն արտացոլում են մեծ երաժշտական աշխարհը և ավանդույթների, լեզուների և ոճերի մի մեծ խառնուրդ են: Երաժշտի ստեղծագործություններում գերիշխում է արևելյան և լատինական հնչեղության համադրումը: Հարցազրույցներից մեկում Քոենն ասել է. «Ինձ միշտ գրավել է ռիթմը: Ինձ շատ է դուր գալիս իսպաներենը: Այդ լեզուն գեղեցիկ է հնչում երգերում, և իմ նախընտրած երաժշտության մի մասն այնտեղից է սերում՝ ֆլամենկո, Էդդի Պալմիերի, նյույորքյան սալսա, աֆրիկյան և Կուբայում տարածված երաժշտություն, լադինոյով (Իսպանիայից սերող հրեաների լեզուն) գրված երգեր»:

Դաշնամուրն ու սերը ջազի հանդեպ

«Դաշնամուրն իմ երաժշտության մեջ շատ մեծ տեղ է զբաղեցում: Ես ինքս նվագում են դաշնամուր և երաժշտության մեծ մասը դաշնամուրով եմ հորինում... »:

1970-ին Երուսաղեմում ծնված Քոենը վաղ տարիքից դաշնամուր է նվագել, իսկ 14 տարեկանում սիրահարվել է ջազին: Բանակում ծառայելուց հետո նա որոշել է մասնագիտանալ կոնտրաբաս նվագելու ասպարեզում: 1992-ին Ավիշայը տեղափոխվել է Նյու Յորք, որտեղ սկզբնական շրջանում որպես շինարար է աշխատել, քանի որ պետք էր ապրուստը հոգալ: Սակայն նա անմիջապես էլ սկսում է հայտնի դառնալ երաժշտական շրջանակներում և ի վերջո մշտական աշխատանք է ստանում պանամացի դաշնակահար Դանիլո Պերեսի ջազային կոմբոյում:

Կարիերայի սկիզբը

«Ունկընդրի համար երաժշտությունը պատմության նման է: Ես կրքոտ եմ նվագում և երաժշտասերը դա զգում է, հարգում է և ուզում է լսել իմ պատմությունը: Ես զգում եմ նրանց էներգիան, տեսնում եմ նրանց աչքերը... »:

Շուտով երիտասարդ երաժշտին ուշադրություն է դարձնում ամերիկացի հայտնի ջազ երաժիշտ, «Գրեմմի» մրցանակի բազմակի դափնեկիր Չիկ Կորիան, որը լսելով Քոենի դեմո ձայնագրությունը, հրավիրում է նրան ձայնագրության իր ստուդիա և առաջարկում մասնակցել Origin նախագծի ստեղծմանը: 2000-ին երաժիշտը սկսում է վոկալով զբաղվել՝ բեք-վոկալիստի դերը ստանձնելով ռոք խմբերից մեկում: 2003-ին Ավիշայը հեռանում է Կորիայի նախագծից և մենակատարի կարիերա սկսում:

Ստեղծագործությունը և վոկալը

«Գործիքիս հետ շատ սերտ մարմնական գործակցություն ունեմ: Ես աշխատում եմ շարժվել, ապրել, որպեսզի մարմինս ազատ լինի: Ջանում եմ նույն դիրքում կանգնած չմնալ... »:

1998-ից նա թողարկել է 15 ալբոմ. Adama (1998), Devotion (1999), Colors (2000), Unity (2001), Lyla (2003), At Home (2004), Continuo (2006), As is...Live at the Blue Note (2007), Gently Disturbed (2008), Sha'ot Regishot (2008) (in Hebrew: Sensitive hours), Aurora (2009), Seven Seas (2011), Duende (2012), Almah (2013), From Darkness(2015): Lyla ալբոմի ստեղծման ժամանակ Քոենը 2 կոմպոզիցիա է կատարել, սակայն, ըստ երաժշտի, նա դժգոհ է մնացել արդյունքից, որից հետո սկսել է պարապել մոր հետ, որը «մի քիչ երգում էր»: Նրա հետ էր նա սովորում լադինո երգերը, մի քանիսը նույնիսկ ձայնագրեց: Հենց այդպես, ըստ Քոենի, նրա ձայնը սկսեց հղկվել և նա սկսեց երգել ու երգեր ձայնագրել:

Մի քանի տարի առաջ վերադառնալով Իսրայել՝ Քոենը սկսել է նաև եբրայերեն երգեր գրել: Նա մշտապես մասնակցում է լավագույն ջազ կատարողների ձայնագրություններին:

«Երաժշտությունն այնքանով է լավ, որքան լավն են այն կատարող մարդիկ: Երաժիշտները հսկայական ազդեցություն են ունենում երաժշտության վրա, երաժշտությունը հորինելը, որքան էլ դա կարևոր լինի, դեռ վերջը չէ, դա միայն սկիզբն է, կառուցվածքն ու անհատականությունը»,- ասել է Քոենը հարցազրույցներից մեկում: