Քեթի Փերիից մինչև Քելվին Հարիս

PanARMENIAN.Net - PanARMENIAN.Net - ն առանձնացրել է առավել նշանակալի ալբոմների ռելիզները՝ ներկայացնելով դրանց ստեղծման մասին հետաքրքիր մանրամասներ:

Քեթի Փերի – Witness

Ռելիզը՝ հունիսի 9, 2017թ.

Ամերիկյան հայտնի երգչուհի Քեթի Փերին (Katy Perry) հունիսի 9-ին ներկայացրել է իր՝ թվով 5-րդ ստուդիական ալբոմը: Մինչ այս երգչուհին ձայնասկավառակ էր թողարկել 2013թ.-ին՝ Prism-ը: Witness-ի ձայնագրման աշխատանքների մասին Փերին հայտնել էր դեռևս 2016թ. փետրվարին՝ մեծ համերգային շրջագայությունից հետո: Փոքր դադարից հետո երգչուհին զգաց, որ կարող է վերադառնալ աշխատանքին և մինչև տարեվերջ շուրջ 40 նոր կատարման վրա սկսեց աշխատել: Օգոստոսին երգչուհին հայտարարեց, որ չի ուզում շտապել և պարզապես զվարճանում է՝ նոր ալբոմ ձայնագրելով ու նոր ոճեր փորձելով: 2017-ի սկզբին Փերին հարցազրույթներից մեկում ասել է, որ գրված 40 երգից միայն 15 տեղ կգտնեն նոր ձայնասկավառակում: Փետրվարին թողարկվեց ալբոմի գլխավոր սինգլը՝ Chained to the Rhythm, երկրորդ սինգլը՝ Bon Appétit-ը, լույս տեսավ ապրիլի վերջին, երրորդ սինգլը, որը Փերին կատարում է Նիքի Մինաժի հետ համատեղ՝ Swish Swish-ը, թողարկվեց մայիսի կեսերին: Ինչպես և խոստացել է երգչուհին, 57 րոպե տևողությամբ ալբոմում տեղ է գտել 15 կատարում:

Lorde – Melodrama

Ռելիզը՝ հունիսի 16, 2017թ.

Երիտասարդ նորզելանդացի երգչուհի Լորդն (Lorde) այս ամիս իր երկրորդ ստուդիական ալբոմը կթողարկի: Melodrama ձայնասկավառակի ձայնագրման աշխատանքներն իրականացրել է Republic Records ընկերությունը: Երգերը ստեղծվել են Նոր Զելանդիայում: Երգչուհին համահեղինակ և պրոդյուսեր Ջեք Անտոնովի հետ միասին աշխատել է նոր ալբոմի վրա մոտ մեկուկես տարի՝ 2015-ի կեսերից մինչև 2017-ի սկիզբը: Իսկ ալբոմի անվանումը հայտնի է դարձել միայն մարտի 2-ին, երբ դուրս է եկել առաջին սինգլը՝ Green Light-ը: Լորդի խոսքով, նոր ձայնասկավառակում նա երգում է միայնության և տառապանքների լավ և վատ կողմերի մասին: Ալբոմի առաջխաղացմանն ուղղված սինգլներից երկրորդը թողարկվել է հունիսի 1-ին: Ընդհանուր 41 րոպե տևողությամբ ալբոմում տեղ է գտել 11 երգ:

Imagine Dragons – Evolve

Ռելիզը՝ հունիսի 23, 2017թ.

Ամերիկյան հանրահայտ Imagine Dragons ռոք խումբը հունիսի 23-ին կթողարկի իր երրորդ ստուդիական ալբոմը, որի աշխատանքներով զբաղվել են KIDinaKORNER և Interscope Records ստուդիաները: Խումբն աշխատել է նոր ալբոմի վրա 2016-ի սեպտեմբերից: 2015-ին Smoke + Mirrors ալբոմի թողարկումից և դրան հաջորդող համաշխարհային շրջագայությունից հետո խումբը որոշ դադար էր վերցրել ուժերը հավաքելու և նոր ալբոմ ձայնագրելու համար, սակայն ողջ այդ ընթացքում լռություն էր պահպանում՝ ստիպելով երկրպագուներին գուշակություններ անել: Նոր ձայնասկավառակի մասին հայտնի դարձավ միայն մայիսի 9-ին, այդ ժամանակ էլ բացվեց դրա նախնական պատվերը: Խմբի ֆրոնտմեն Դեն Ռեյնոլդսը՝ խոսելով նոր ձայնասկավառակի մասին, այն «էվոլյուցիա» է անվանել Imagine Dragons-ի համար: Evolve-ի առաջխաղացման նպատակով խումբը 2 սինգլ է թողարկել՝ Believer-ն ու Thunder-ը: Առաջինը՝ դեռ փետրվարի սկզբին, իսկ երկրորդը՝ ապրիլին: 39 րոպե տևողությամբ ալբոմում ընդհանուր առմամբ տեղ է գտել 11 կատարում:

Իգի Ազալիա – Digital Distortion

Ռելիզը՝ հունիսի 30, 2017թ.

Ավստրալիացի ռեփ երգչուհի Իգի Ազալիան (Iggy Azalea) հունիսի 30-ին երկրպագուների դատին կհանձնի իր երկրորդ ստուդիական ալբոմը՝ Digital Distortion-ը, որը պետք է լույս տեսներ դեռևս 2016-ի հուլիսին, սակայն թողարկումը հետաձգվեց երգչուհու նշանադրության և հետագայում նշանածից բաժանվելու պատճառով: Այդ ժամանակ Ազալիան հայտարարեց, որ ուզում է մի քիչ հանգստանալ և նոր երգերով լրացնել ալբոմը: Ձայնագրման աշխատանքները մոտ երկու տարի տևեցին՝ 2015թ-ից սկսած: 2016թ. մարտի 18-ին երգչուհին թողարկեց նոր ալբոմից առաջին սինգլը՝ Team, իսկ մի քանի օր անց՝ երկրորդը՝ Mo Bounce-ը: Դրանից հետո Ազալիան վերցրեց թայմ-աուտ, անձնական կյանքով զբաղվելու և նոր, ինչպես երգչուհին ինքն էր ասում, «ավելի սեքսուալ» երգեր ստեղծելու համար: 2017-ի սկզբին նա հաստատեց, որ արդեն 13 պատրաստ երգ ունի նոր ձայնասկավառակից: Իսկ մայիսի 19-ին թողարկեց Switch սինգլը: Այժմ հայտնի է միայն 6 ձայնագրված երգի մասին, մնացած երգերի անունները գաղտնի են պահվում:

Calvin Harris – Funk Wav Bounces Vol. 1

Ռելիզը՝ հունիսի 30, 2017թ.

Շոտլանդացի դիջեյ, երգիչ և երգահան Քելվին Հարիսը (Calvin Harris) նույնպես նոր ալբոմ կթողարկի հունիսի 30-ին: Funk Wav Bounces Vol. 1-ը կդառնա նրա 5-րդ ձայնասկավառակը: Ալբոմում տեղ գտած կատարումներում հայտնի շոտլանդացին համագործակցել է այնպիսի հրավիրված աստղերի հետ, ինչպիսիք են Ֆրենկ Օուշենը, Քեթի Փերին, Ֆարել Ուիլիամսը, Ջոն Լեջենդը, Big Sean-ը, Արիանա Գրանդեն, Նիքի Մինաժը, Snoop Dogg-ն ու այլոք: Նոր ալբոմում կհնչեն նրանց հայտնի ձայները: Հարիսը տարվա սկզբում հայտարարել էր, որ ալբոմում տեղ կգտնի 10 երգ, նշելով, որ «աշխատել է մեր սերնդի գերագույն արտիստների հետ»: Փետրվարի 23-ին 33-ամյա դիջեյը թողարկել է նոր ալբոմի առաջին սինգլը՝ Slide –ը, մարտի վերջում՝ Heatstroke-ը, իսկ բոլորովին վերջերս՝ Rollin-ը: Մայիսի 9-ին, նա հաստատել է, որ ալբոմը լույս կտեսնի հունիսի վերջին: