// IP Marketing video - START// IP Marketing video - END
«Փիարն ու մարքեթինգը տարբեր հասկացություններ են, չնայած մեզանում դրանք հաճախ նույնացվում են»

«Փիարն ու մարքեթինգը տարբեր հասկացություններ են, չնայած մեզանում դրանք հաճախ նույնացվում են»

Ուսանողները պրակտիկ գիտելիքներ են ստացել մասնավորի ուժերով

Հայաստանի 8 բուհի 22 ուսանող այս տարի մասնակցել են «Ռոստելեկոմ»-ի «Նոր հնարավորություններ ուսանողների համար» կրթական ծրագրին, որի ընթացքում հեռահաղորդակցության ոլորտի առաջատար ընկերության ստորաբաժանումների աշխատակիցներն անցկացրել են դասընթացներ ավելի քան տասը թեմաներով։ Ուսուցման ծրագրում ընդգրկված է եղել թեմաների բավականին լայն շրջանակ՝ սկսած հաղորդակցությունից, մարքեթինգից, բրենդինգից, իրավական ձևակերպումներից, վաճառքների հմտություններից մինչև օպտիկա և ցանցային լուծումներ: Լավագույն արդյունքներ ցույց տված ուսանողը, ով հայտնի դարձավ հուլիսի 18-ին, հնարավորություն կստանա համալրել ընկերության աշխատակիցների շարքերը։

PanARMENIAN.Net - Արդեն երրորդ տարին անցկացվող ծրագիրն այս տարի ևս տվել է իր արդյունքները։ PAN-ը ծրագրի մասնակիցներից պարզել է ու պարբերաբար կներկայացնի՝ ինչպիսին են պատկերացնում իրենց ապագան ու ինչեր են սովորել այս կարճ ժամանակի ընթացքում:

Միքայել Նարինյան | 3-րդ կուրս, Սպորտային մանկավարժություն և կառավարում, բռնցքամարտիկ

Կարելի է մտածել, որ մարզաշխարհի ներկայացուցիչն առավելագույնս հեռու է տեխնոլոգիաներից, կորպորատիվ կառավարումից և այլն: Իրականում դա այդպես չէ: Սպորտով զբաղվելը ոչ մի կերպ չի խոչընդոտում այլ ոլորտներով հետաքրքրվելուն: Ոչ միայն հետաքրքրվելուն, այլ կոնկրետ այդ ոլորտներում խորանալուն, ուսումնասիրելուն: Անգամ հնարավոր է, որ բռնցքամարտիկ լինելու հետ մեկտեղ զբաղվեմ այլ բնագավառներով: Անցկացված դասընթացները ցույց տվեցին մի պարզ բան. եթե կա ցանկություն նոր բան սովորելու, դիմեք մասնագետներին: Նրանք հաճույքով կկիսվեն իրենց գիտելիքներով:

Ինքս բնույթով շատ հետաքրքրասեր եմ: Ինձ հաճույք են պատճառում նոր բացահայտումները, որևիցե նոր բան իմանալը: Գիտեք, հայտնի հասկացություն կա. չիմանալն ամոթ չէ, չհարցնելը, սովորել չուզելն է ամոթ: Նույն սկզբունքով էլ առաջնորդվում եմ: Երբ դիմում էի դասընթացներին մասնակցելու, մտքովս անգամ չէր անցնում, որ ինձ կարող է չհայտավորեն միայն այն պատճառով, որ մասնագիտությունս, մեղմ ասած, չի համապատասխանում: Վստահ էի, որ անցնելու եմ, ու անցա:

Բնականաբար, հաղթելը կարևոր է: Բայց սպորտը նաև սովորեցնում է, որ հաղթելուց կարևոր մասնակցությունն է: Մրցութային ծրագրերին ակտիվորեն եմ մասնակցել՝ փորձելով ուժերիս ներածի չափ օգնել մեր թիմին: Թիմի հաղթանակը նաև իմ հաղթանակն է, ի վերջո անցկացված դասընթացների զգալի մասը հենց թիմային աշխատանքի հետ էր կապված: Մեզ սովորեցնում էին ինչպես փոխլրացնել միմյանց, ինչպես զարգացնել մեր գաղափարները: Ցանկացած գաղափար ունի իր սկզիբը, երբ այն ծնվում է, ու տրամաբանական ավարտը՝ երբ այն հասունանում է վերջնական նախագծի տեսքով: Այդ սկզբի ու ավարտի միջև շղթա է՝ բաղկացած տարբեր մարդկանց մտքերից, ու շատ կարևոր է, որ դրանք ոչ թե միմյանց հակասեն, այլ փոխլրացնեն:

Մրցույթի ընթացքում մեր ներկայացրած ընկերությունը բավականին ունիկալ էր: Բոլորը գիտեն, որ այսօր աշխատանքի տեղավորվելը բարդ է, հաճախ կազմակերպությունները նոր աշխատակցից պահանջում են, որ նա փորձաշրջան անցնի: Երբեմն, այդ փորձաշրջանը չի վարձատրվում: Մեր ընկերությունն առաջարկում էր այլ կազմակերպություններին իրենց փոխարեն փորձաշրջան կազմակերպել նոր աշխատակիցների համար՝ խնայելով թե աշխատակցի նյարդերը, թե կազմակերպության ռեսուրսները:

Դասընթացների ժամանակ ամենաշատն ինձ տպավորեց հետևյալ միտքը. եթե ընկերության ղեկավարությունը հասկանում է, թե ինչում է փիարի ու մարքեթինգի տարբերությունը, հնարավոր է դառնում նաև տվյալ ընկերության ճիշտ թիրախավորումը շուկայում: Փիարն ու մարքեթինգը բոլորովին տարբեր հասկացություններ են, չնայած մեզանում դրանք հաճախ նույնացվում են: Մարքեթինգը վերաբերում է ընկերության կոնկրետ արտադրանքը, կամ ծառայությունը հանրության լայն շերտերին հասցնելուն: Ընդ որում՝ անհրաժեշտ է ընդգծել դրա առավելությունները թե որպես առանձին արտադրանք, կամ ծառայություն, և թե մրցակիցների հետ համեմատության առումով: Փիարն, իր հերթին, արդեն ամբողջ ընկերության որդեգրած ռազմավարական մոտեցումն է շրջակա միջավայրի՝ գնորդի, այլ ընկերությունների, պետության հետ շփվելու հարցում: Հետևաբար, ցանկացած իրեն հարգող ընկերություն պետք է ի սկզբանե տարանջատի այս հասկացություններն ու ունենա յուրաքանչյուրի համար առանձին, իրենց առջև դրված խնդիրները լավ գիտակցող թիմեր:

 Ամենաընթերցվողը բաժնում
Ինչ նոտայի վրա սկսվեց ու ավարտվեց Կոնսերվատորիայի աղմկոտ միջոցառումը
 Ուշադրության կենտրոնում
2 ՔԿՀ-ներում սննդի ապահովման նոր փորձնական ծրագիր է մեկնարկել

2 ՔԿՀ-ներում սննդի ապահովման նոր փորձնական ծրագիր է մեկնարկել «Նուբարաշեն»-ում պահվում է 367 անձ, «Արմավիր» ՔԿՀ-ում՝ 708-ը

 Բաժնի այլ նյութերը
«Աղբամանը դրիմ» Ինչպես անցավ նոր քաղաքապետի մեկ տարին
Չվիճարկված ընտրություններ, Մարտի 1-ի գործ ու ՃՏՊ-ներ Հանրային կյանքը՝ Փաշինյանի իշխանության 1 տարում
Եթե ցույցերը հավերժ լինեին, միշտ միասին կլինեինք Սիրո հեղափոխության ամենահեղափոխական սերը