// IP Marketing video - START// IP Marketing video - END
2017-ի հայկական երգերը, որոնց համար չենք ամաչում

2017-ի հայկական երգերը, որոնց համար չենք ամաչում

Սիրուշոյից մինչև Միշո

Ասում են՝ հայկական շոու բիզնեսն ավելի շատ բիզնես է, քան շոու: Հայկական էստրադայի երգիչներին հաճախ չէ, որ հաջողվում է ներկայացնել այնպիսի կատարումներ, որոնք կհամապատասխանեն էստրադային պահանջներին, այլ ոչ թե կլինեն ռեստորանայինի մակարդակի:

PanARMENIAN.Net - Այնուամենայնիվ կան հայ երգիչներ և երգչուհիներ, որոնց կատարումներն առանձնանում են որակով: PanARMENIAN.Net –ը հավաքել է 2017-ի այն երգերը, որոնց համար չի ամաչում:

Սիրուշո և Սեբու՝ «Վույ աման»

Սիրուշոյի և Սեպուհ Սիմոնյանի «Վույ աման» երգը, թերևս, տարվա լավագույններից է: Սեպուհը՝ նույն ինքը Սեբուն, առավել հայտնի է Capital Cities խմբից, որին հաջողություն է բերել 2013-ին լույս տեսած Safe and Sound հայտնի կատարումը: Հայկական շոու բիզնեսի մասնիկ չհանդիսացող հայազգի երգչի և Սիրուշոյի կատարումը գրավում է իր թեթև ժամանակակից ռիթմով, որին միաձուլվում են որոշ հայկական տարրեր: Իսկ երգի տեսահոլովակն առանձնանում է գեղեցիկ, աչք շոյող պատկերներով:

Իվետա Մուկուչյան` «Դեպի նոր իրականություն»

Իվետա Մուկուչյանի գրեթե ամեն երգ կարող է ներառվել այս և նմանատիպ այլ ցուցակներում, քանի որ երգչուհու թե՛ կատարումները, թե՛ տեսահոլովակները, թե՛ կերպարը էապես տարբերվում է հայկական շոու բիզնեսում առավել տարածվածից: «Դեպի նոր իրականություն» կոչվող երգը լիովին Իվետայի ոճի մեջ է՝ ռիթմիկ երաժշտություն, արևմտյան բիթեր, որակյալ տեսահոլովակ, համարձակ կերպար: Երաժշտության հեղինակը հենց երգչուհին է, խոսքերի համահեղինակները՝ Իվետան և Ավետ Բարսեղյանը: Տեսահոլովակի նկարահանումը վստահվել է ռեժիսոր Արթուր Մանուկյանին:

Իվետա Մուկուչյան՝ «Հայաստան ջան»

Մեր ցանկում ներառել ենք Իվետա Մուկուչյանի մեկ այլ երգ ես՝ «Հայաստան ջան»-ը: Այս երգը տարբերվում է երգչուհու մնացած ավելի մոդեռն կատարումներից իր հայկականությամբ: Սակայն այդ հայկականության և հայրենասիրության դրսևորումները չեն հասնում պաթոսի, ամեն ինչ արված է գեղեցիկ և ճաշակով՝ հաճելի մեղեդի հայկական տարրերով և «համով» ու ուրախ տեսահոլովակ: Երաժշտության հեղինակը, ինչպես Իվետայի մի շարք այլ երգերում, կրկին ինքը՝ երգչուհին է, խոսքերի հեղինակը՝ Ավետ Բարսեղյանը, տեսահոլովակի ռեժիսորը Արթուր Մանուկյանն է:

Վիգեն Հովսեփյան՝ «Գուլո»

Երիտասարդ հեղինակ-կատարող Վիգեն Հովսեփյանը, ով ներկայացնում է հայկական ժողովրդական երգերը գեղեցիկ մատուցմամբ՝ գործիքավորման միջոցով հաղորդելով նրանց նոր շունչ, 2017-ի սկզբին հանրության դատին է հանձնել «Գուլո» երգը: Կատարումը ներառվել է Վիգենի «Արձագանքներ» անվանումը կրող անդրանիկ ձայնասկավառակում, որում տեղ է գտել 12 ժողովրդական երգ: «Գուլոն» միանգամից արժանացել է դրական արձագանքի և հաջողություն է բերել երգչին: Տեսահոլովակում նկարահանվել է դերասանուհի Նազենի Հովհաննիսյանը: Բարսելոնայից ՀՀ ժամանած երգիչն ունի նաև իսպանալեզու երգեր:

Արամ Mp3 և 3.33՝ «Սկսում ենք»

Տարվա լավագույն երգերի մեջ տեղին կլինի առանձնացնել Արամ Mp3-ի և 3.33 նախագծի համատեղ աշխատանքը՝ շատ ժամանակակից և նորագույն թրենդերին համապատասխանող «Սկսում ենք» կատարումը: Ռիթմիկ, ուրախ տեսահոլովակով, պարային, որակյալ կատարմամբ այս երգի խոսքերի հեղինակը 3.33-ի Ֆելիքս Խաչատրյանն է, երաժշտության հեղինակն Արամն է: Առանձին respect տեսահոլովակի տրամադրությունը ստեղծող թմբլիկ «Էլվիս Փրեսլիի» համար:

Միշո՝ «Մի տէ»

Հայկական ռեփն առանձին բարդ թեմա է: Քիչ հայալեզու ռեփ կատարումների է հաջողվում ապահովել բարձր որակ և չանցնել գռեհկության շեմը: Մի քանի հաջողված ռեփ նախագծերի շարքում այս տարի ևս առանձնացել է Միշոն. 2017-ի նրա նոր ալբոմից՝ «Մառախուղից», հատկապես աչքի է ընկնում «Մի տէ» երգը: Բիթն ինչպես գրեթե միշտ ապահովում է Սերժոն, մինիմալիստական ոճով, որի ջատագովն է վերջին տարիներին դարձել ռեփերը, նկարահանված տեսահոլովակի ռեժիսորը Արման Սարգսյանն է:

Շպռօտ և Էրիկ Շեյն՝ «Գարուն եկավ»

Շարունակելով «Կտրիճ Դավոյի» էպոտաժային շարքը, Շպռօտը 2017-ին երկրպագուների դատին է հանձնել «Գարուն եկավ» երգն ու տեսահոլովակը ռեփեր Էրիկ Շեյնի մասնակցությամբ: «Սևանի հայտնի պապիկի» երգացանկից այս կատարումը Շպռօտի մատուցմամբ՝ ժամանակակից ռիթմերի և հայկական ժողովրդականի միաձուլմամբ, առնվազն տարօրինակ է թվում, բայց «իսպանական ամոթ» (երբ ամաչում ես ուրիշի փոխարեն) չի առաջացնում: Էլ ավելի մեծ ուշադրության է արժանի տեսահոլովակը՝ երկար ծամեր, գորգեր և այլ հայկական տարրեր, որոնց ֆոնին կիսամերկ Շպռօտն է բավականին «ոչ հայեցի» կերպարանքով. այս ամենը համարձակ է, հետաքրքիր, գունավոր, զվարթ ու տարբերվող:

Յուլիաննա Լալաբեկովա / PanARMENIAN.Net
 Ամենաընթերցվողը բաժնում
9 պատճառ Absolut Moon Stage-ը բաց չթողնելու համար
Ով է Մոնատիկը և ինչու նրա համերգը Երևանում չի կայանա
Դերասանները վերջապես «մարդավարի» կաշխատեն
Միջնադարյան ամրոցի մուտքը վճարովի կդառնա
 Ուշադրության կենտրոնում
Ֆաթիհ Աքինը Ցեղասպանության մասին ֆիլմի համար չի կարող Թուրքիա այցելել

Ֆաթիհ Աքինը Ցեղասպանության մասին ֆիլմի համար չի կարող Թուրքիա այցելել Նա տեղեկացրել է՝ աշխատում է հեռու մնալ Թուրքիայից

 Բաժնի այլ նյութերը
Թերի Ջորջ Օսկարակիր դերասան, ով հույս ունի դեռ շատ անգամ Հայաստան այցելել
Պուլիցերյան լուսանկարներ Բոստոնի ահաբեկչությունից տուժածի պատմությունը
Պուլիցերյան լուսանկարներ Ահաբեկչություն Քենիայի առևտրի կենտրոնում