// IP Marketing video - START// IP Marketing video - END
Սոց.պատասխանատվությունն ու բիզնեսը

Սոց.պատասխանատվությունն ու բիզնեսը

Օրգանական անուշեղեն՝ հաշմանդամություն ունեցողներին օգնելու համար

Հայաստանում արդեն 3 ամիս է՝ գործում է փախլավայի մասնագիտացված խանութ-սրահ: Այստեղ էկոլոգիապես մաքուր հումքից պատրաստված համեղ քաղցրավենիքի վաճառքից ստացված շահույթի մի մասն ուղղվելու է հաշմանդամություն ունեցող անձանց խնդիրների լուծմանը: Խանութ-սրահի հիմնադիր Լյոլյա Բադեյանը PanARMENIAN.Net ի հետ զրույցում պատմեց Հայաստանում սոցիալական ձեռներեցությամբ զբաղվելու դժվարությունների և կարևորության մասին:

PanARMENIAN.Net - Հայկական խոհանոցի ամենահամեղ խմորեղենը՝ օրգանական հումքից

Լյոլյա Բադեյանի խոսքով, գաղափարն իրագործելիս իր համար նշաձող է սահմանել՝ չստեղծել այնպիսի արտադրանք, որն ինքը որպես հաճախորդ երբեք չէր սպառի: Նա վստահ է, որ էկոլոգիապես մաքուր քաղցրավենիքը բարձր պահանջարկ կունենա շուկայում:

«Խանութում տեսականին դեռևս սահմանափակ է: Չենք շտապում այն ավելացնել: Ցանկանում ենք դեռևս բարձր որակի արտադրանք ունենալ: Ամենակարևորն այն է, որ որակից դժգոհող հաճախորդ մինչև օրս չենք ունեցել: Արտադրանքն արտահանելու ծրագրեր էլ անպայման լինելու են», -ասում է Լյոլյա Բադեյանը:

Աշխատատեղեր՝ հաշմանդամություն ունեցողներին

Խանութ-սրահում ներկայումս կա 9 աշխատակից, որոնցից 5-ը հաշմանդամություն ունեն:

«Կարծում եմ՝ բիզնեսն անպայման պետք է սոցիալական ազդեցության մաս ունենա: Շատ մեծ շարժիչ ուժ է գիտակցումը, որ դու պատասխանատվություն ես կրում ոչ միայն քո ձեռնարկատիրության, այլև մարդկանց համար, որոնք քո օգնության կարիքն ունեն», -ասում է Բադեյանը և հավելում, որ եթե բիզնեսը ձախողվի, տուժելու է ոչ միայն սեփականատերը, այլև մարդիկ, որոնք մեծ հույսեր են կապել այդ բիզնեսի հետ:

Բիզնեսի կայացումից հետո շահույթի կեսն ուղղվելու է հաշմանդամություն ունեցողների կարիքների բավարարմանը:

Հաջողակ սոց. ձեռներեցությունը՝ գործարարի և ՀԿ-ի գործակցության արդյունք

«Սոցիալական ձեռներեցությամբ ի սկզբանե զբաղվել են հասարակական կազմակերպությունները։ Կարծում եմ՝ շատերը կհամաձայնվեն, որ ՀԿ ոլորտի ներկայացուցիչները միշտ չէ, որ բիզնես մտածողություն և համապատասխան հմտություններ ունեն», -ասում է Բադեյանը:

Նա նաև դեմ է, որ ոլորտում միայն գործարարներ լինեն՝ առանց ՀԿ-ների: Ասում է՝ միայն բիզնես մտածողություն ունեցող մարդկանց համար շատ դժվար կլինի պահել գաղափարի սոցիալական բաղադրիչը։ Որպեսզի սոցիալական ձեռնարկությունը կայանա, այն պետք է լինի ձեռնարկատիրոջ և հասարակական կազմակերպության գործակցության արդյունք:

Նանե Մանասյան/ PanARMENIAN.Net
 Ամենաընթերցվողը բաժնում
Երևանը միանում է «կանաչ» ճարտարապետությամբ քաղաքներին
Աղջիկը պնդում է՝ ոստիկանները ծեծել են իրեն արտաքինի պատճառով
Ինչպես է բնությունն օգնում Տավուշի երեխաների քաղցր կյանքին
10 պատճառ տարվա լավագույն միջոցառումներից մեկը բաց չթողնելու համար
 Բաժնի այլ նյութերը
Մաքուր օդի ձեր իրավունքը Ինչպես որոշ ժամանցի վայրեր հրաժարվեցին ծխախոտից
Ակումբային բիզնեսը՝ ծխելու սահմանափակման մասին Չենք տուժի, եթե արտոնյալներ չլինեն
էկոտուրիզմ օտարազգիների համար Սյունիքում գումար են վաստակում արդի տուրիստական ծառայություններով