Հովհաննես Դանիելյանը, Հրաչիկ Ջավախյանը և Արթուր Խաչատրյանը դուրս են եկել բռնցքամարտի ԵԱ կիսաեզրափակիչՀունիսի 3-10-ը տեղի ունեցած գլխավոր սպորտային իրադարձությունների ամփոփում Բռնցքամարտ. Մոսկվայում հունիսի 8-ին բռնցքամարտի Եվրոպայի առաջնությունում կայացել են քառորդ եզրափակչի մենամարտերը: Հայաստանի հավաքականը ներկայացնում են 10 բռնցքամարտիկներ, որոնցից 3-ը` Արթուր Խաչատրյանը (81 ք/կ), Հովհաննես Դանիելյանը (48ք/կ) և Հրաչիկ Ջավախյանը (64ք/կ) դուրս են եկել կիսաեզրափակիչ: Նրանք արդեն բրոնզե մեդալներ ունեն, իսկ եզրափակիչ դուրս գալու համար հունիսի 11-ին կմրցեն կիսաեզրափակչի մարտերում: 13 հունիսի 2010 PanARMENIAN.Net - Հունիսի 5-ին Նյու Յորքի «Յանկի» մարզադաշտում հայ բռնցքամարտիկ Վանես Մարտիրոսյանն (ԱՄՆ) անցկացրեց իր 28-րդ մենամարտը Ջո Գրինի դեմ, որը մինչ այդ պարտություն չուներ: Մարտիրոսյանը բոլոր 10 ռաունդներում առավելություն ուներ և հաղթեց 96-93, 96-93, և 98-91 հաշվով: Այս մարտում նա պաշտպանում էր NABF և NABO վարկածներով տիտղոսները առաջին միջին քաշային կարգում և նվաճեց WBA վարկածով միջմայրցամաքային գոտին: Կարլ Ֆրոչի փրոմոութեր Միք Հենեսին հայտարարել է, որ «Super Six»-ի 3-րդ փուլի մենամարտը Արթուր Աբրահամի (Գերմանիա) և Կարլ Ֆրոչի (Անգլիա) միջև տեղի կունենա Մոնրեալում (Կանադա) սեպտեմբերի 18-ին: Ֆրոչի թիմը ցանկանում էր այդ մարտն անցկացնել ԱՄՆ-ում, սակայն Աբրահամի թիմը մերժել էր առաջարկը, քանի որ մենամարտը պետք է կայանա Եվրոպայում, Ֆրոչն էլ իր հերթին հրաժարվել էր մենամարտել Շվեյցարիայում: WBC International, WBA и IBF International վարկածներով երկրորդ քաշային կարգում հանդես եկող Արսեն Մարտիրոսյանը (Ֆրանսիա), որը տիրապետում է 5 գոտիների, Լիոնում տեղի ունեցած մարտից հետո, որում նա մայիսի 21-ին միավորներով հաղթել է ֆրանսիացի Ժերեմի Պարոդիին, ժամանել է Հայաստան: PanARMENIAN.Net ի թղթակցի հետ զրույցում նա ասաց, որ Պարոդիի հետ վերջին մենամարտը կարևոր էր նրա համար, քանի որ նա պայքարում էր նոր գոտու համար: «Ժերեմին տաղանդավոր երիտասարդ բռնցքամարտիկ է: Մինչև այդ նա պարտություն չուներ: Բայց ինձ հաջողվեց հաղթել և նվաճել WBC International գոտին»,- ասաց Մարտիրոսյանը: Նրա խոսքերով, այս տարվա դեկտեմբերին նա Ճապոնիայում պայքարելու է WBC վարկածով աշխարհի չեմպիոնի տիտղոսի համար: «Իմ մարզումները ես կսկսեմ Ծաղկաձորում, այնուհետև կշարունակեմ Անգլիայում և Գերմանիայում: Այնտեղ ես մի քանի սպարինգ կանցկացնեմ»,- ընդգծեց բռնցքամարտիկը: Ֆուտբոլ. Հունիսի 9-ին և 10-ին տեղի ունեցավ ՖԻՖԱ-ի 60-րդ համագումարը, որը անցկացվեց հարավաֆրիկյան Յոհանեսբուրգ քաղաքում: Համագումարում ներկայացվեց ՖԻՖԱ-ի 2009թ. ընթացքում կատարված աշխատանքների հաշվետվությունը և հեռանկարները, կազմակերպության ֆինանսական հաշվետվությունը, և մասնավորապես հաստատման ներկայացվեց ՖԻՖԱ-ի 2011-2014թթ. հեռանկարային բյուջեն և 2011թ. բյուջեն մանրամասն: Հայաստանի ֆուտբոլի ֆեդերացիան համագումարում ներկայացնում էին ՀՖՖ փոխնախագահ Աշոտ Մանուկյանը, ՀՖՖ գործադիր տնօրենի տեղակալ Կարեն Դոխոյանը և ՀՖՖ հավաքական թիմերի նյութատեխնիկական ապահովման բաժնի պետ Էդգար Մանուկյանը: Իսկ Հայաստանի ֆուտբոլի Բարձրագույն լիգայի 10-րդ փուլում Կապանի «Գանձասարը» հանդիպեց «Շիրակի» հետ և հաղթեց 1:0 հաշվով: 2010-ի Հայաստանի գավաթակիր «Փյունիկը» 3:0 հաշվով Վազգեն Սարգսյանի անվան հանրապետական մարզադաշտում հաղթեց «Իմպուլսին»: «Բանանցը» վստահ հաղթանակ տարավ «Ուլիսի» նկատմամբ Միգել դա Սիլվայի և Էդուարդո դոս Սանտոսի գոլերի շնորհիվ: Միակ ոչ ոքին գրանցվեց «Կիլիկիա»- «Միկա» խաղում: Առաջինը գոլը հարվածեցին «Միկայի» ֆուտբոլիստները, աչքի ընկավ Էդնեյ դե Օլիվեյրան: Սակայն 85-րդ րոպեին Տիգրան Գրիգորյանը հավասարեցրեց հաշիվը: Մրցաշարային աղյուսակը 26 միավորով շարունակում է գլխավորել «Փյունիկը», «Բանանցը» զիջում է 3 միավորով, իսկ երրորդ տեղում «Ուլիսն» է (20 միավոր): «Եվրոպա» թիմի երիտասարդ դարպասապահ Գևորգ Զարգարյանին նվիրված ֆուտզալի մրցաշարի հաղթող դարձավ «Էրեբունին», որը 7:5 հաշվով պարտության մատնեց «Քախսիին»: Հայաստանի ֆուտզալի հավաքականն անցկացնում է եռօրյա ուսումնամարզական հավաք: Հունիսի 8-10-ը թիմը կանցկացնի երկու մարզում և մեկ երկկողմանի խաղ: Դոնեցկի «Մետալուրգը» Բադ-Տատցմանսդորֆում (Ավստրիա) կանցկացնի իր առաջին ուսումնամարզական հավաքը: Նիկոլայ Կոստովի ղեկավարությամբ Ավստրիա են մեկնել 22 ֆուտբոլիստներ: «Մետալուրգի» կազմում Կոստովը հայտարարել է երկու հայ ֆուտբոլիստների` Հենրիխ Մխիթարյանին և Արտակ Դաշյանին: Շախմատ. Գրոսմայստեր Լևոն Արոնյանը հունիսի 4-6-ն Իսպանիայի Լեոն քաղաքում մասնակցել է արագ շախմատի ավանդական մրցաշարին: Արոնյանի մրցակիցներն էին Բորիս Գելֆանդը (Իսրայել), Լենյեր Դոմիննգես Պերեսը (Կուբա) և Ֆրանսիսկո Վալյեհո Պոնսը (Իսպանիա): Վիճակահանությամբ Արոնյանը հանդիպել է Դոմինգեսին և հաղթել 2.5:1.5 հաշվով, իսկ Գելֆանդը 3.5:2.5 հաշվով պարտության է մատնել Պոնսին: Եզրափակչում Գելֆանդն ավելի ուժեղ էր և 4:2 հաշվով պարտության մատնելով Արոնյանին` դարձել է մրցաշարի հաղթող: Սպորտային մարմնամարզություն. Հունիսի 8-ին Երևանում մեկնարկել է օլիմպիական չեմպիոն Ալբերտ Ազարյանի անվան սպորտային մարմնամարզության գավաթը: Մրցաշարն ավանդական է և տեղի է ունենում 7-րդ անգամ: Մասնակցում են 43 մարզիկներ Հայաստանից, Վրաստանից և Իրանից: Առաջին օրը մարզիկները հանդես եկան «բազմամարտում»: Մրցանակային տեղեր զբաղեցրին Վահան Ստեփանյանը, Հարություն Մերդինյանը և Արթուր Դավթյանը Հասմիկ Բաբայան, Գոհար Նալբանդյան / PanARMENIAN News Ամենաընթերցվողը բաժնում Մասնագետը՝ առողջ ապրելակերպի մասին Ինչու են կանայք ընտրում ֆիթնես և բոդիբիլդինգ Լավագույն app-երը՝ առավել զգուշավորների այլընտրանք Ինչպես են մարզասրահները և մարզվողները «ֆորմի մեջ» մնում Բաժնի այլ նյութերը Easy ֆուտբոլ՝ մեծ էկրանին Դարձիր «12-րդ խաղացող» Անգլիական այգում, երկրպագիր մերոնց մաքուր օդին Ուղին անվանում է առաջնամագլցողը Հարմարավետության գոտուց դուրս, քաղաքային աղմուկից հեռու Բրազիլական ջիու-ջիցուն Հայաստանում Գետնի վրա մենամարտել իմացողն առավելություն ունի | Վարչապետ․Եթե Տավուշում տների հետ կապված խնդիր լինի, պետությունը տեր կկանգնի՝ նոր տներ կկառուցի Վարչապետի խոսքով՝ խնդիրները, որ տեղ-տեղ ծագում են հայկական կողմի համար, հնարավոր է, որ ծագեն նաև Ադրբեջանի համար Փաշինյան․ Ռուսական հենակետերը դուրս կբերվեն Տավուշից Խոսելով հայ սահմանապահների տեղակայման ժամկետների մասին` նա շեշտել է, որ այդ գործընթացը պետք է հնարավորինս արագ անել Վարչապետ․ Որոշումը նվազեցնելու է անվտանգային ռիսկը Բաղանիս-Կիրանց-Ոսկեպար հատվածում և ՀՀ սահմանի ամբողջ երկայնքով Նա ընդգծել, որ իհարկե, սա ձեռքբերում է Ադրբեջանի համար, բայց սա նաև էական ձեռքբերում է նաև ՀՀ համար Բագրատ սրբազան. Այս գործընթացը պետք է կասեցվի Նա հավելել է, որ Տավուշի մարզը պետք է ամրոց դարձնել |