Աշխարհի առաջնությունում ազատ ոճի հայ ըմբիշների անհաջող ելույթի երեք պատճառներ են՝ բժշկությունը, մարզիչների և մրցակցության բացակայությունը

Սեպտեմբերի 6-12-ը Մոսկվայի «Օլիմպիական» մարզահամալիրում տեղի ունեցավ ազատ ոճի ըմբշամարտի աշխարհի առաջնությունը, որին մասնակցեցին շուրջ 100 երկրների ներկայացուցիչներ:

Աշխարհի առաջնությունը բացեցին հունահռոմեական ոճի ըմբիշները, իսկ առաջինը մեկնարկեցին 55, 66 և 96 կգ քաշային կարգերի մարզիկները: 55 կգ քաշային կարգում Հայաստանը ներկայացնում էր մեր ամենատիտղոսակիր մարզիկներից մեկը՝ Ռոման Ամոյանը, որը նվաճել է Պեկինի Օլիմպիական խաղերի բրոնզե մեդալը, Եվրոպայի առաջնության ոսկե մեդալը և անցյալ տարվա աշխարհի առաջնության արծաթե մեդալը: Այս տարի նույն Ամոյանն իր ավանդն ունեցավ Հայաստանի հավաքականի խաղում:

PanARMENIAN.Net - Նա հաջող մեկնարկեց աշխարհի առաջնությունում և հաղթեց 3 մենամարտում՝ 1/16 եզրափակչում Ամոյանը հաղթեց եգիպտացի Մոստաֆա Հասան Աբդելլաղին: 1/18 եզրափակչում հայ ըմբիշը հաղթեց ճապոնացի Խասեգավա Կոխեին: Այնուհետև Ամոյանը 4:0 հաշվով հաղթեց Գուստավո Բալարտ Մարինային Կուբայից: Միակ պարտությունն Ամոյանը կրեց ապագա չեմպիոն Ռեյնհանպուր Սորիանից (Իրան) և 3-րդ տեղի համար պայքարում 7:0 հաշվով առանց դժվարության հաղթեց Վենելին Վենկովին Բուլղարիայից: Գերծանր քաշային կարգում Յուրի Պատրիկեևը, որը օլիմպիական խաղերի բրոնզե մեդալակիր է և Եվրոպայի բազմակի չեմպիոն, մոտ էր ոսկե մեդալ նվաճելուն, սակայն այս անգամ ևս չկարողացավ հաղթել իր հիմնական մրցակից՝ օլիմպիական չեմպիոն և աշխարհի չեմպիոն Միխաիլ Լոպեսին Կուբայից: Հաղթելով հնդիկ Դարմենդերա Դալալին, թուրք Ռըզա Քայալապին, շվեդ Յոհան Մագնուս Յորենին և ամերիկացի Դենիել Բերսին, եզրափակչում Պատրիկեևը չկարողացավ իրականացնել իր երազանքը՝ աշխարհի չեմպիոն դառնալ՝ զիջելով 120 կգ քաշային կարգում հունահռոմեական ոճի ուժեղագույն ըմբիշին, և աշխարհի չեմպիոն դարձավ կուբացի ըմբիշը: Հայաստանի հավաքականին երկրորդ արծաթե մեդալը բերեց 2009թ. Եվրոպայի չեմպիոն Արսեն Ջուլֆալակյանը 74 կգ քաշային կարգում: Նա սկսեց իր ելույթները 1/16 եզրափակչից, որտեղ հաղթեց Ֆրանսիսկո Ալբանո Բարիոյին (Արգենտինա), այնուհետև 1/8 եզրափակչում Ջուլֆալակյանը հաղթեց սլովակ Յուրե Կուխարին: Դժվարին պայքարում նա կարողացավ հաղթել ղրղըզ Դանիյար Կոբոնովին, իսկ կիսաեզրափակչում ճապոնացի Տակիխիրո Կանակուբոյից ավելի ուժեղ գտնվեց: Հայ ըմբիշի հաղթական ընթացքին խանգարեց Սելջուկ Չեբին Թուրքիայից: Կիսաեզրափակչում նա Ջուլֆալակյանից ուժեղ գտնվեց և դարձավ աշխարհի չեմպիոն: Ընդհանուր թիմային ստուգարքում Հայաստանի հավաքականը 26 միավորով զբաղեցրեց 4-րդ տեղը, առաջին տեղում է Ռուսաստանի հավաքականը 46 միավորով: Արսեն Ջուլֆալակյան. «Իմ պարտության համար միայն ես եմ մեղավոր, քանի որ չկարողացա կիրառել իմ ամենաուժեզ հնարքը: Ինձ խանգարեց այն, որ թուրք ըմբիշը մարմինը յուղով էր պատել, ինչը արգելված է ըմբաշմարտում: Սակայն սա մեր վերջին մենամարտը չէր, Չեբիի հետ մենք դեռ կհանդիպենք խոշոր մրցաշարերում, և ես պետք է շատ աշխատեմ հաղթելու համար նրան ցանկացած պարագայում: Հաջորդ տարի ԱԱ-ն տեղի կունենա Թուրքիայում և վարկանիշային կլինի: Ես չեմ կարող հաշտվել իմ աշխարհի փոխչեմպիոնի տիտղոսի հետ և կաշխատեմ Թուրքիայում նվաճել չեմպիոնի տիտղոսը և Լոնդոնի Օլիմպիադայի ուղեգիր ապահովել: Յուրի Պատրիկեև. Ես մի փոքր հիասթափված եմ իմ արդյունքից: Ինձ համար չափազանց կարևոր է, որ ես այսքան երկրպագու ունեմ: Անցյալ տարին իմ համար անհաջող էր, ես փորձեցի հեռանալ սպորտից, սակայն կրկին վերադարձա: Ես փոխեցի իմ վերաբերմունքը, իմ մարզչական ծրագիրը: Իմ գլխավոր խնդիրն է նախապատրաստվել 2012 թվականի Օլիմպիադային: ՀՀ հավաքականի գլխավոր մարզիչ, օլիմպիական չեմպիոն Լևոն Ջուլֆալակյանն ամփոփեց իր սաների ելույթը ԱԱ-ում: Մեր թիմի բոլոր մրցանակակիրները պարտություն են կրել միայն աշխարհի չեմպիոններից: Ամոյանը արդեն երրորդ անգամ հանդիպեց Սորիանի հետ: Յուրի Պատրիկեևը զիջեց շատ համառ և արժանի պայքարում, նա դեռ ցույց կտա իրեն: Արսեն Ջուլֆալակյանի մրցակիցն իրոք ուժեղ էր, սակայն իմ սանը պատրաստ էր չեմպիոն դառնալ, դա ապացուցեց նաև մենամարտը: Արսենը երկու անգամ բարձրացրեց մրցակցին, սակայն չկարողացավ շրջել նրան: Սեպտեմբերի 10-ին հունահռոմեական ըմբիշների ելույթից հետո ասպարեզ դուրս եկան մեր ազատ ոճի ըմբիշները: Նրանք անհաջող հանդես եկան և չկարողացան մեդալներ նվաճել աշխարհի առաջնությունում: Հայաստանի հավաքականի բոլոր յոթ ներկայացուցիչներն ուղղակի ձախողեցին իրենց ելույթները: Ըմբշամարտի ֆեդերացիայի փոխնախագահ Հրանտ Ենոքյանը գտնում է, որ ազատ ոճի ըմբիշները վատ հանդես եկան և կոպիտ սխալներ թույլ տվեցին: «Մեկնարկից առաջ նրանք նորմալ մարզավիճակում էին, դժվար է ասել, թե ինչը անհաջող ելույթիների պատճառ դարձավ: Մենք դեռ կքննարկենք այդ իրավիճակը»: Ազատ ոճի ըմբշամարտի հավաքականի գլխավոր մարզիչ Արայիկ Բաղդադյան. «Իմ սաները վատ հանդես եկան անբավարար հոգեբանական պատրաստվածության պատճառով: Բոլոր հավաքներն ու նախապատրաստական փուլերը նորմալ են անցել: Այո, մեր մարզիկները վնասվածքներ ունեին, սակայն ես չեմ արդարանա, և ընդունում եմ իմ մեղքը: Այսօրվա դրությամբ մենք չունենք բարձր կարգի ըմբիշներ: Ես հիմնականում դժգոհ եմ Գեղամ Բաբախանյանի և Ռուսլան Բասիևի ելույթներից, նրանք դուրս մնացին առաջին իսկ մենամարտից հետո: Արայիկ Բաղդադյանը նշեց այն խնդիրները, որոնք խանգարում են ազատ ոճի ըմբշամարտի զարգացմանը: Առաջինը՝ այսօր մարզադպրոցներում լավ մարզիչների խնդիր կա: Անձնական մարզիչները իր սաների հետ անբավարար են աշխատում, ինչը դժվարացնում է հավաքականի մարզչի գործը: Օրինակ, Սուրեն Մարկոսյանը, որն ապրում է Գառնիում, բոլորովին կորցնում է մարզավիճակը: Իսկ ես չեմ կարող բոլորի հետ առանձին աշխատել: Երկրորդը՝ մեր մարզիկները մրցաշարերի ժամանակ 4-5 կգ քաշ են կորցնում, իրենց քաշային կարգում հանդես գալու համար, իսկ վերականգնման համար անհրաժեշտ դեղամիջոցները չի բավականացնում: Այդ խնդիրները խանգարում են մեր հաղթանակներին: Խանգարում է նաև այն, որ մեր պատանի ու երիտասարդ ըմբիշները արդեն 3 տարի է, ինչ չեն կարողանում մեդալներ նվաճել: Իսկ եթե նոր կադրեր չկան, ինչպե՞ս ես կարող եմ հավաքականը նոր ըմբիշներով համալրել: Եվ հետո, բացակայում է մրցակցությունը մարզիկների միջև: Այդպես, 66 կգ քաշային կարգում մենք երկու ուժեղ ըմբիշ ունենք՝ Ժիրայր Հովհաննիսյանն ու Դավիթ Սաֆարյանը, սակայն Սաֆարյանի վնասվածքից հետո Հովհաննիսյանը «հանգստացավ» և պակասեցրեց եռանդը: Մարզիչը նշել է, որ շուտով ազատ ոճի ըմբշամարտի հավաքականում փոփոխություններ կկատարվեն, նորեկները կմասնակցեն Գռոզնիի և Ստեփան Սարգսյանի անվան միջազգային մրցաշարերին: Վերջինը կկայանա հոկտեմբերի 22-24-ին Երևանում: Հատուկ նշենք, որ Մոսկվայում աշխարհի առաջնության լուսաբանման գործում PanARMENIAN.Net ին աջակցել է «Արմավիա» ընկերությունը:

Գոհար Նալբանդյան, Հասմիկ Բաբայան / PanARMENIAN News
 Ամենաընթերցվողը բաժնում
Մասնագետը՝ առողջ ապրելակերպի մասին
Ինչու են կանայք ընտրում ֆիթնես և բոդիբիլդինգ
Լավագույն app-երը՝ առավել զգուշավորների այլընտրանք
Ինչպես են մարզասրահները և մարզվողները «ֆորմի մեջ» մնում
 Ուշադրության կենտրոնում
Մարմնամարզիկ Արթուր Դավթյանը Աշխարհի գավաթի եզրափակչում է

Մարմնամարզիկ Արթուր Դավթյանը Աշխարհի գավաթի եզրափակչում է Ավելի վաղ եզրափակիչ էին դուրս եկել Արթուր Ավետիսյանն ու Վահագն Դավթյանը

 Բաժնի այլ նյութերը
Easy ֆուտբոլ՝ մեծ էկրանին Դարձիր «12-րդ խաղացող» Անգլիական այգում, երկրպագիր մերոնց մաքուր օդին
Ուղին անվանում է առաջնամագլցողը Հարմարավետության գոտուց դուրս, քաղաքային աղմուկից հեռու
Բրազիլական ջիու-ջիցուն Հայաստանում Գետնի վրա մենամարտել իմացողն առավելություն ունի
---