Լևոն Արոնյանը դարձավ կայծակնային շախմատի աշխարհի չեմպիոն, իսկ Զավեն Անդրիասյանը` Ռուսաստանի գավաթակիր

PanARMENIAN.Net - Սլովակիան ներկայացնող հայ շախմատիստ Սերգեյ Մովսիսյանը հավաքեց 17.5 միավոր և զբաղեցրեց 15-րդ տեղը:

Մինչ այդ Արոնյանը դարձել էր Տալի հուշամրցաշարի հաղթող: Նա կիսել էր առաջին տեղը Սերգեյ Կարյակինի և Շահրիյար Մամեդյարովի հետ:

Նոյեմբերի 16-ին Ռուսաստանի Գավաթի եզրափակչի երկրորդ խաղում հայ 21-ամյա գրոսմայստեր Զավեն Անդրիասյանը (Հայաստան) պարտության մատնեց Արտյոմ Տիմոֆեևին (Ռուսաստան) և զբաղեցրեց առաջին տեղը:

Հաղթողը պետք է որոշվեր այս պարտիայի արդյունքում, քանի որ նրանց առաջին հանդիպումն ավարտվել էր ոչ ոքի: Հայ շախմատիստը սպիտակ ֆիգուրներով կարողացավ առավելության հասնել և հաղթեց 1,5:0,5 ընդհանուր հաշվով:

Բասկետբոլ. Հայաստանի բասկետբոլի կանանց «Հատիս» հավաքականը Եվրոպայի Գավաթ 2010-2011-ի թիմային փուլում նոյեմբերի 18-ին «Միկա» մարզահամալիրում ընդունեց ռուսական «Դինամո-ԳՈՒՎԴ» թիմին: Հանդիպումը շատ կարևոր էր բասկետբոլիստուհիների համար, քանի որ երկու նախորդ խաղերում նրանք զիջել էին մրցակիցներին:

Խաղի ընթացքում հայկական ակումբը ջանում էր արժանի դիմադրություն ցույց տալ հակառակորդին: Առաջին քառորդում Գիա Ղազանչյանի սաները զիջեցին 23:29 հաշվով: Երկրորդ քառորդում մրցակցի առավելությունն ավելացավ, նա հատիսցիներից առաջ անցավ 18 միավորով (41:59): Երրորդ քառորդում «Հատիսը» կարողացավ 26 միավոր հավաքել և մինչև 4 միավորի հասցնել տարբերությունը: Քառորդ ավարտվեց 67:71 հաշվով: Միայն չորրորդ քառորդի սկզբին «Հատիսին» հաջողվեց առաջ անցնել հաշվում: Խաղի ավարտը լարված ստացվեց. մեկ մի թիմն էր առաջատար, մեկ մյուս թիմը: Խաղի հիմնական ժամանակն ավարտվեց ոչ ոքի` 85:85: Հանդիպման ելքը որոշվեց ավելացրած 5 րոպեների ընթացքում: «Դինամո-ԳՈՒՎԴ»-ի բասկետբոլիստուհիներն ավելի դիմացկուն դուրս եկան և 90:99 հաշվով հաղթանակ տարան:

Ֆուտբոլ. Նոյեմբերի 17-ին FIFA-ն հրապարակել է ազգային հավաքականների հերթական վարկանիշային աղյուսակը: Նախորդ վարկանիշի համեմատ, որը եղել է հոկտեմբերի 20-ին, Հայաստանի ազգային հավաքականը բարձրացել է 1 հորիզոնականով և 517 միավորով զբաղեցնում է 59-րդ տեղը:

ԵԱ խմբային փուլում Հայաստանի հավաքականի մրցակիցները զբաղեցնում են հետևյալ տեղերը. Ռուսաստանն իջել է 3 հորիզոնականով և զբաղեցնում է 13-րդ տեղը, Սլովակիան բարձրացել է 18-րդ տեղը, Իռլանդիան մնացել է 32-րդ տեղում, Մակեդոնիան իջել է 76-րդ տեղը, իսկ Անդորրան մնացել է 202-րդ տեղում:

Նոյեմբերի 17-ին ֆուտբոլի ազգային հավաքականները ընկերական խաղերի են մասնակցել: Հայաստանի մրցակիցները Եվրո-2012 B խմբում պարտություններ են կրել ընկերական խաղերում:

Ռուսաստանի հավաքականը Վորոնեժում պարտություն կրեց Բելգիայից: Չնայած հանդիպման ընկերական կարգավիճակին, ՌԴ թիմի մարզիչ Դիկ Ադվոկատը խաղին մասնակից դարձրեց իր թիմի բոլոր ուժեղագույն ֆուտբոլիստներին, հայտնում է ՈՒԵՖԱ-ի պաշտոնական կայքը: Սակայն բելգիացիներն ավելի ուժեղ գտնվեցին և երկու անպատասխան գնդակ խփեցին, կրկնակի գոլի հեղինակ դարձավ Լուկակուն:

Չնայած նրան, որ Իռլանդիայի հավաքականն իր դաշտում 11-մետրանոցով բացեց խաղի հաշիվը Նորվեգիայի հետ, հետո ստիպված էր երկու անգամ խաղը սկսել դաշտի կենտրոնից: Խաղն ավարտվեց 1:2 հաշվով Նորվեգիայի օգտին: Սլովակիայի հավաքականն իր դաշտում ընդունեց Բոսնիայի ու Հերցոգովինայի հավաքականներին և զիջեց 2:3 հաշվով: Նոյեմբերի 14-ին տեղի ունեցավ Հայաստանի առաջնության վերջին տուրը և տասներորդ անգամ անընդմեջ ոսկե մեդալներ նվաճեց «Փյունիկը»:

28-րդ տուրում Վարդան Մինասյանի սաները խաղացին «Կիլիկիայի» հետ և միայն շնորհիվ 11-մետրանոց հարվածի, որը 67-րդ րոպեին իրացրեց Մարկոս Պիզելին, կարողացան հաղթել: Բրազիլացի ֆուտբոլիստը խփեց իր 16-րդ գնդակը և իր խփած գոլերի քանակով հավասարվեց իր թիմակից Գևորգ Ղազարյանին:

Առաջնության արծաթե մեդալակիրը դարձավ «Բանանցը», որը 2:1 հաշվով հաղթեց «Շիրակին» և ետ մնաց չեմպիոնից մեկ միավորով՝ հավաքելով 64 միավոր:

Բրոնզե մեդալը առաջնության ավարտից 2 տուր առաջ ապահովեց իր համար «Ուլիսը», որը վերջին տուրում 3:2 հաշվով հաղթեց «Միկային», որն ավարտեց առաջնությունը 4-րդ տեղում 46 միավորով:

«Իմպուլսը», որն այս տարի առաջին անգամ մասնակցեց Բարձրագույն լիգայի խաղերին, զբաղեցրեց 5-րդ տեղը, 6-8 տեղերը զբաղեցրին »Գանձասարը», «Կիլիկիան» ու «Շիրակը» համապատասխանաբար:

Նոյեմբերի 16-ին ՈՒԵՖԱ-ի կենտրոնակայանում տեղի ունեցավ 2011-12թթ. Եվրոպայի կանանց մինչև 19 տարեկանների առաջնության վիճակահանությունը: Առաջին որակավորման փուլում 40 թիմ բաժանվեց 10 խմբի: Հայաստանի ընտրանին հանգրվանեց 6-րդ խմբում, որտեղ կհանդիպի Ավստրիայի, Իտալիայի և ՆՀՀ Մակեդոնիայի թիմերի հետ: Ընտրական մրցաշարը կընդունի ՆՀՀ Մակեդոնիան:

Հայաստանի հավաքականի և դանիական «Ռանդերսի» հարձակվող Յուրա Մովսիսյանը PanARMENIAN.Net ի թղթակցի հետ զրույցում ասել է, որ դեռևս պաշտոնապես ոչինչ պարզ չէ «Էսպանյոլ» տեղափոխվելու հարցում:

Ըստ elmundodeportivo.es-ի, «Էսպանյոլի» տեխնիկական ծառայությունը շահագրգռված է Մովսիսյանով և հետևում է նրա խաղին:

«Ես ինտերնետում եմ կարդացել, որ «Էսպանյոլը» հետաքրքրվում է ինձնով: Դեռևս ոչինչ ասել չեմ կարող: Կան նաև այլ ակումբներ, որոնք ցանկանում են ձեռք բերել ինձ: Այդ հարցերով զբաղվում է իմ գործակալը և նորությունների դեպքում մենք հայտարարություւն կանենք»,-ասել է Մովսիսյանը:

Հարձակվողը վնասվածք է ստացել, որի պատճառով հանդես չի գալիս «Ռանդերսի» կազմում, ըստ նրա, հաջորդ շաբաթ նա կրկին կկարողանա խաղալ:

Բռնցքամարտ. Կարլ Ֆրոչը «Super Six» մրցաշարի 3-րդ շրջանում Արթուր Աբրահամի դեմ մենամարտից առաջ ասել է, որ դա համաշխարհային կարգի պայքար է լինելու: «Հատկապես հրապուրիչ է այն, որ վիճարկվելու է WBC գոտին: Արթուրը հաստատ վախենում է ինձանից, նա գլխի հետ կապված շատ խնդիրներ ունի»,- ասել է Ֆրոչը fightnews.com-ին տված հարցազրույցում:

Ֆրոչը կարծում է, որ նոյեմբերի 27-ին հաղթող կլինի նա, քանի որ ունի որակներ, որոնք բացակայում են Աբրահամի մոտ. արագություն, հմտություններ և ուժ: «Աբրահամը մենամարտերի ժամանակ միշտ օգտագործում է նույն մեթոդները: Ակնհայտ է, որ ես ավելի փորձառու եմ այս քաշի շրջանակներում և ֆիզիկապես ավելի ուժեղ եմ: Հիմա Արթուրը պատրաստ է երրորդ մարտում երկրորդ պարտությանը»,- ասել է բրիտանացի բռնցքամարտիկը:

Աբրահամը կարծում է, որ Ֆրոչը երկար հարված ունի, որն օգնել է նրան Միկել Քեսլերի դեմ մենամարտում: «Ես պատրաստ եմ ուժերով չափվել բոլորի հետ: Ես բռնցքամարտել եմ միջին քաշային կարգում ավելի ուժեղ մարզիկների հետ և չեմ կարծում, որ Արթուրն այդքան ուժեղ է, ինչպես մարդիկ են մտածում: Ես հաղթելու ավելի մեծ շանսեր ունեմ»,- նշել է Ֆրոչը:

Թենիս. ATP-ն (Թենիսի համաշխարհային ասոցիացիա) նոյեմբերի 15-ին հրապարակել է աշխարհի ուժեղագույն թենիսիստների հերթական վարկանիշային աղյուսակը: Արգենտինահայ Դավիթ Նալբանդյանը իր նախորդ վարկանիշի համեմատ նահանջել է 2 հորիզոնականով և 1480 միավորով 27-րդ տեղում է: «Մաստերս» մրցաշարում Նալբանդյանը անցած շաբաթ ¼ եզրափակչում պարտվեց Էնդի Մարեյին Մեծ Բրիտանիայից:

Դեկտեմբերի 16-19-ը Դավիթ Նալբանդյանը Բուենոս Այրեսում կմասնակցի «Copa Peugeot» մրցաշարին, որը տեղի է ունենում 2003-ից ի վեր, և Նալբանդյանը երեք անգամ` 2003-ին, 2007-ին և 2009-ին, զբաղեցրել է առաջին տեղը:

Այս տարի նրա մրցակիցները լինելու են Գաել Մոմֆիսը (Ֆրանսիա), Մարկոս Բաղդադիսը (Կիպրոս), Մարատ Սաֆինը (Ռուսաստան), Ռիչարդ Գասկեն (Ֆրանսիա) և Խուան Մոնակոն (Արգենտինա):

Մինչ այդ դեկտեմբերի 11-ից Նալբանդյանն ելույթ կունենա «Almirante Brown» ակումբում, որտեղ նաև հանդես կգան նրա հայրենակիցներ Խուան Մոնակոն, Օրասիո Զեբալոսը և Էդուարդո Շվանկը:

Օլիմպիադա. Նոյեմբերի 12-ին Երևանում սկսվել է համաժողով ԱՊՀ և Բալթիայի 11 երկրների Ազգային օլիմպիական կոմիտեների (ԱՕԿ) մասնակցությամբ:

Հայաստանի ԱՕԿ նախագահ Գագիկ Ծառուկյանն իր ողջույնի խոսքում ասել է. «Մենք պետք է ավելի հաճախ կազմակերպենք նման միջոցառումներ: Ուրախ եմ, որ վաղը բոլորս միասին կնշենք ՀԱՕԿ 20-ամյակը»:

ԱՊՀ երկրների ԱՕԿ-երի ասոցիացիայի քարտուղարության ղեկավար Յուրի Յուրևը նշել է, որ սա ԱՊՀ և Բալթիայի երկրների ԱՕԿ-երի 13-րդ տարածաշրջանային համաժողովն է և հավելել, որ այն նպաստում է տարբեր երկրների սպորտային կառույցների ներկայացուցիչների շփմանը և հիանալի միջոց է տեղեկատվության փոխանակման համար:

Նոյեմբերի 13-ին Ալեքսանդր Սպենդիարյանի անվան օպերայի և բալետի ազգային ակադեմիական թատրոնում կայանալու է հանդիսավոր միջոցառում` նվիրված ՀԱՕԿ 20-ամյակին:

Հոկտեմբերին Ակապուլկոյում տեղի ունեցած ՄՕԿ-ի նիստում որոշում կայացվեց ՀԱՕԿ նախագահ Գագիկ Ծառուկյանին Պիեռ դը Կուբերտենի մեդալով պարգևատրելու մասին:

Իսկ ՀԱՕԿ-ի պարգևները ստացան սպորտային ոլորտի մասնագետները՝ ունեցած ավանդի ու Օլիմպիական գաղափարախոսության տարածման համար:

2010թ. ծանրամարտի աշխարհի չեմպիոն Տիգրան Մարտիրոսյանը բնակարան ստացավ Երևանում, իսկ 2010թ. բոլոր մրցանակակիրներն ու մեդալիստները, նրանց մարզիչներն ու հավաքականների գլխավոր մարզիչնրը ստացան դրամական պարգևներ: