Շախմատի Հայաստանի 71-րդ չեմպիոն դարձավ 19-ամյա Ռոբերտ Հովհաննիսյանը

PanARMENIAN.Net - Գաբրիել Սարգսյանը B մրցաշարում 7.5 միավորով գրավել է 5-րդ հորիզոնականը: 8.5 միավորով հաղթող է դարձել Լյուկ ՄաքՇեյնը (Անգլիա):

Ավարտվել է շախմատի Հայաստանի 71-րդ առաջնությունը, որը FIDE դասակարգման մեջ զբաղեցնում է 13-րդ տեղը: Առաջին անգամ երկրի առաջնությունում բոլոր 12 մասնակիցները գրոսմայստերներ էին:

Հայաստանի չեմպիոն է դարձել 19-ամյա Ռոբերտ Հովհաննիսյանը: 11 տուրերում նա զիջել է միայն մեկ պարտիայում` պարտվելով 2010-ի Հայաստանի չեմպիոն Ավետիք Գրիգորյանին, 4 պարտիաներում միավորները կիսել է մրցակիցների հետ, 6-ում` հաղթանակ տարել:

Երկրորդ տեղում 7 միավորով գտնվում է մինչև 18 տարեկանների Եվրոպայի առաջնության արծաթե մեդալակիր Սամվել Տեր-Սահակյանը: Երիտասարդ գրոսմայստերը 3 տուրերում հաղթանակ է տարել, մնացած 8 տուրերում խաղացել է ոչ ոքի: 7 միավոր է հավաքել 2010-ի Ռուսաստանի գավաթակիր 21-ամյա Զավեն Անդրիասյանը և զբաղեցրել 3-րդ տեղը: 11 տուրերում նա ոչ մի անգամ չի պարտվել:

Շախմատի Հայաստանի առաջնության ավարտից հետո Տիգրան Պետրոսյանի անվան շախմատի տանը կայացել է արագ շախմատի Հայաստանի առաջնությունը: Շախմատի ֆեդերացիայից PanARMENIAN.Net ի թղթակցին հայտնել են, որ առաջնությանը մասնակցել են 27 շախմատիստներ:

Տիգրան Պետրոսյանը 6.5 միավորով դարձել է արագ շախմատի Հայաստանի չեմպիոն: Հրանտ Մելքումյանը 6 միավորով նվաճել է արծաթե մեդալ, երրորդ տեղը զբաղեցրել է Հայկ Վարդանյանը (6 միավոր):

Ֆուտբոլ. Փետրվարի 2-ին FIFA-ն հրապարակել է ազգային հավաքականների հերթական վարկանիշային ցուցակը: Հայաստանի ազգային հավաքականը նահաջել է 2 հորիզոնականով և 514 միավորով զբաղեցնում է 62-րդ տեղը: Եվրոպայի առաջնության խմբային փուլում Հայաստանի հավաքականի մրցակիցները զբաղեցնում են հետևյալ տեղերը. Ռուսաստանը բարձրացել է 12-րդ տեղը, Սլովակիան մնացել է 20-րդ տեղում, Իռլանդիան` 35, Մակեդոնիան` 79, Անդորրան` 202:

«Մենք բոլորս գիտենք, որ այժմ շատ ուժեղ ազգային թիմ ունենք, որտեղ ընդգրկված են ֆուտբոլիստներ, որոնց հատուկ է հաղթանակի ձգտումը, համախմբվածությունը: Եվ ահա հիմա, երբ մենք շանս ունենք հաղթահարելու Եվրո-2012-ի խմբային փուլը, հայտնվեցին մարդիկ, որոնք հայտարարելով, թե Հայաստան-Ռուսաստան խաղը «ծախված է», ուզում են խայտառակել մեր երկիրը և ֆուտբոլի ֆերեդացիան: Մեր ֆուտբոլիստներն ընդունակ չեն նման քայլի: Ես սիրում եմ իմ երկիրն ու հավաքականը, ՀՀ նախագահն անձամբ է ինձնից հաղթանակ պահանջել Ռուսաստանի հետ խաղում»,-ասել է ՀՖՖ նախագահ Ռուբեն Հայրապետյանը մամլո ասուլիսում՝ մեկնաբանելով Հայաստան-Ռուսաստան խաղը «ծախելու» մասին լուրերը: Հայրապետյանը նշել է, որ նա ինքը ևս ներկայացնում է Հայաստանը տարբեր միջազգային կառույցներում, ինչպես օրինակ ՖԻՖԱ-ում և ՈՒԵԱՖԱ-ում և ցանկացած նման դեպք ուսումնասիրվում է այդ կազմակերպությունների կողմից և խանգարում է հայկական ֆուտբոլի զարգացմանը:

«Ռուսաստանի հավաքականը թույլ թիմերի թվին չի պատկանում, որը կցնկանար զիջել մեզ կամ «գնել» խաղը: Ուղղակի որոշ մարդիկ հավատարիմ են մնում քննադատելու իրենց սովորությանը, նույնիսկ երբ մեր հավաքականը սկսել է հաղթել: Չէ որ դրանով նրանք լարվածություն են առաջացնում ֆուտբոլիստների միջև, ինչը կարող է սխալների հանգեցենլ խաղի ժամանակ»,-ասել է Հայրապետյանը:

Հայաստանի ֆուտբոլի ֆեդերացիան ընդունել է որոշում բավարարել «Կիլիկիա» ֆուտբոլային ակումբի կողմից ՀՖՖ ներկայացված N03 24.01.2011թ. դիմումը` առ այն, որ «Կիլիկիա» ակումբի ֆինանսական ծանր վիճակը հանդիսանում է գլխավոր դրդապատճառ, որը թույլ չի տալիս ստեղծել մարտունակ թիմ և ակումբը հրաժարվում է ՀՀ Բարձրագույն խմբի առաջիկա 2011թ. առաջնությանը մասնակցելուց:

Այսպիսով` 2011թ. Հայաստանի Բարձրագույն խմբի առաջնությանը կմասնակցի ութ թիմ` «Փյունիկ», «Բանանց», «Ուլիս», «Միկա», «Իմպուլս», «Գանձասար», «Շիրակ» և «Արարատ»:

«Կիլիկիա» ակումբի հրաժարականի հետևանքով տեղի կունենան փոփոխություններ 2011թ. Հայաստանի Գավաթի խաղարկության խաղացանկում: Խաղացանկով նախատեսված նախնական փուլի «Շիրակ»-«Արարատ» հանդիպումը չի կայանա: Փոխարենը կանցկացվի վիճակահանություն «Շիրակ» և «Արարատ» ակումբների միջև, «Փյունիկ» և «Ուլիս» ակումբների մրցակիցներին ի հայտ բերելու նպատակով, հաղորդում է ՀՖՖ մամլո ծառայությունը:

Հայաստանի հավաքականի պաշտպան Ռոբերտ Արզումանյանը պայմանագիր է կնքել լեհական «Յագելոնիա» ակումբի հետ: Ֆուտբոլիստը ակումբում հանդես կգա մինչև 2014 թվականը, հայտնում է ակումբի պաշտոնական կայքը:

Հայաստանի հավաքականի 23-ամյա հարձակվող Յուրի Մովսիսյանը հաջողությամբ անցավ բժշկական հետազոտությունը Գերմանիայում և ստորագրեց «Կրասնոդար» ՖԱ հետ անհատական պայմանագիրը:

Պայմանագրի ժամկետը 3,5 տարի է, այսինքն` մինչև 2013-2014 խաղաշրջանի ավարտը: Ֆուտբոլիստը «Կրասնոդարի» հետ միասին կմեկնի երկրորդ հավաքի, որը տեղի կունենա փետրվարի 2-16-ը Թուրքիայի Անթալիա քաղաքում:

Դոնեցկի «Շախտյորը» դուրս է եկել Արևելյան Եվրոպայի և Սկանդինավիայի ակումբների Copa del Sol մրցաշարի կիսաեզրափակիչ, որն ընթանում է իսպանական Մարբելա քաղաքում:

«Նորդշելանդ» (Դանիա) ՖԱ-ի դեմ խաղն ավարտվել է 3:1 հաշվով հօգուտ «Շախտյորի»: Դոնեցկի ակումբի կազմում առաջին գոլը խփել է Հայաստանի հավաքականի կիսապաշտպան Հենրիխ Մխիթարյանը: Նա այդ խաղում շատ ակտիվ էր և ճանաչվել է այդ խաղում «Շախտյորի» լավագույն խաղացող:

Փետրվարի 4-ին կիսաեզրափակչում «Շախտյորը» խաղալու է «Ռուսենբորգի» հետ (Նորվեգիա):

Բռնցքամարտ. Վիկ Դարչինյանի մենեջեր Էլիաս Նասարը պնդում է, որ մոտ ժամանակները WBC-ն կարող է հավանություն տալ Աբներ Մարեսի հետ Դարչինյանի ռևանշին: Կրկնակի մենամարտը կարող է կայանալ այս տարվա վերջին: Բողոքը, որը ներկայացրել է Դարչինյանի թիմը, ուղղված է մրցավար Ռոբերտ Հովարդի և կողային մրցավարներից մեկի դեմ: Գրավոր հայտարարության մեջ ասվում է, որ Մարեսը շուրջ 20 հարված է հասցրել գոտկատեղից ներքև, ընդ որում նրանցից 14-ն ուղղվել են աճուկային շրջան: Մենամարտն ընթանում է թեթևագույն քաշային կարգի մրցաշարի շրջանակներում, Դարչինյանը պարտվել է միավորներով:

Նասարը հաղորդել է, որ բռնցքամարտիկի փրոմոութեր Գարի Շոուն տեղեկատվություն է ստացել WBC պաշտոնական ներկայացուցչից այն մասին, որ WBC-ն պատրաստ է բավարարել Դարչինյանի թիմի խնդրանքը Մարեսի հետ նոր մենամարտ անցկացնելու մասին: «Հիմա Դարչինյանը կենտրոնացնում է իր ուժերը ոչ թե այս մարտի, այլ ապրիլին Լոս Անջելեոսում Յոնի Պերեսի դեմ կայանալիք մենամարտի վրա»,- Նասարի խոսքերը հաղորդում է allboxing.ru-ն:

EUBC (Բռնցքամարտի եվրոպական կոնֆեդերացիա) հանձնաժողովի հերթական նիստում որոշում է ընդունվել, որ այսուհետև բռնցքամարտի Եվրոպայի և աշխարհի առաջնությունները տեղի կունենա նույն տարում: Մինչ այդ աշխարհի առաջնությունները տեղի են ունեցել կենտ տարիներին, իսկ Եվրոպայի առաջնությունները` զույգ:

2011-ին Եվրոպայի առաջնություն անցկացնելու հայտեր են ներկայացրել Թուրքիան և Բուլղարիան: 2011-ի Եվրոպայի առաջնությունը տեղի է ունենալու հունիսի 10-19-ը Բուլղարիայում:

Եվրոպացի դպրոցականների առաջնությունը տեղի է ունենալու Գրոզնիում հուլիսի 7-16-ը, իսկ կանանց և պատանիների շարքում Եվրոպայի առաջնությունը` օգոստոսի 28-ից սեպտեմբերի 4-ն Օրենբուրբում:

Այս օրերին հայ բռնցքամարտիկները գտնվում են Աբովյան քաղաքում, որտեղ անցկացնելու են ուսումնամարզական հավաք: PanARMENIAN.Net ի թղթակցի հետ զրույցում Հայաստանի հավաքականի գլխավոր մարզիչ Ռաֆայել Մեհրաբյանն ասել է, որ այդ հավաքն օգնելու է պատրաստվել միջազգային մրցաշարի, որը կայանալու է փետրվարի 15-20-ը Բուլղարիայում:

«Ես դեռ չեմ որոշել, թե ինչ կազմով ենք Բուլղարիա մեկնելու, բայց հիմա Աբովյանում մարզվում են 22 մարզիկներ: Վերջում պարզ կլինեն նրանց անունները, ովքեր կներկայացնեն Հայաստանը Բուլղարիայում»,- ասել է նա:

Այդ մրցաշարից հետո հայ բռնցքամարտիկները սկսելու են երկրորդ հավաքը, որը տեղի է ունենալու մարտի 8-22-ը: Մարտի 22-27-ը նրանք մասնակցելու են Չեխիայում կայանալիք միջազգային մրցաշարի:

Ըմբշամարտ. Հունվարի 30-ին ավարտվեց հունահռոմեական ոճի ըմբշամարտի Հայաստանի առաջնությունը, որին մասնակցել է շուրջ 100 մարզիկ Հայաստանի բոլոր մարզերից ու Լեռնային Ղարաբաղից:

Հայաստանի չեմպիոններ դարձան Արմեն Չոմարյանը (55 կգ ք/կ, ԲԿՄԱ), Վահան Ջուղարյանը (60 կգ ք/կ, Գյումրի), Սասուն Ղամբարյանը (66 կգ ք/կ, Երևան), Վարշամ Բորանյանը (74 կգ ք/կ, ԲԿՄԱ), Արթուր Շահինյանը (84 կգ ք/կ, ԲԿՄԱ), Արթուր Ալեքսանյանը (96 կգ ք/կ, ԲԿՄԱ) և Վաչիկ Եղիազարյանը (120 կգ ք/կ, Երևան):

Առաջնությունից հետո կձևավորվի հավաքականը, որը փետրվարի 3-ից կանցկացնի այս տարվա առաջին ուսումնամարզական հավաքը Երևանում և կմեկնի Աշխարահի գավաթի առաջնությանը, որը կանցնի փետրվարի 17-20-ը Մինսկում (Բելառուս): Մինչ Եվրոպայի առաջնության մեկնարկը, որը տեղի կունենա Դորտմունդում (Գերմանիա) մարտի 29-ից ապրիլի 3-ը, հավաքականը ևս երկու հավաք կանցկացնի:

Ձյուդո. Մինչև 60 կգ քաշային կարգում 2009-ի աշխարհի բրոնզե մեդալակիր Հովհաննես Դավթյանը 4 մենամարտերից երեքում հաղթանակ է տարել: Երրորդ տեղի համար պայքարում նա հաղթել է Դավիթ Ասումբանիին (Վրաստան) և նվաճել բրոնզե մեդալ:

Նույն քաշային կարգում Գոռ Հարությունյանը նույնպես անցկացրել է 4 մենամարտ, բայց երկուսում պարտվել է և զբաղեցրել 7-րդ տեղը:

Մինչև 66 ք/կ-ում 2010-ի աշխարհի գավաթակիր Արմեն Նազարյանը 5 մարտերից 3-ում հաղթանակ է տարել, իսկ 2-ում` պարտություն: Նազարյանը զբաղեցրել է 5-րդ տեղը:

Աշխարհի գավաթից հետո հավաքականի հիմնական անդամները փետրվարին մասնակցելու են տարբեր միջազգային մրցաշարերի: Բոլոր մրցաշարերը վարկանիշային են՝ խաղարկվելու են Լոնդոնի օլիմպիական խաղերի միավորներ

Թենիս. Հունվարի 31-ին ATP-ն (Թենիսի միջազգային ասոցիացիան) հրապարակել է աշխարհի ուժեղագույն թենիսիստների հերթական վարկանիշային ցուցակը: Արգենտինահայ թենիսիստ Դավիթ Նալբանդյանը նախորդ վարկանիշի համեմատ առաջ է անցել 2 հորիզոնականով և 1655 միավորով զբաղեցնում է 19-րդ տեղը:

ATP վարկանիշում առաջին տեղը զբաղեցնում է Ռաֆայել Նադալը (Իսպանիա) 12390 միավորով, երկրորդ տեղը` Ռոջեր Ֆեդերերը (Շվեյցարիա) 7965 միավորով, իսկ երրորդ տեղը` Նովակ Ջոկովիչը (Սերբիա) 7880 միավորով:

Դավիթ Նալբանդյանը բավականին խնդիրներ ունեցավ Սանտյագոյում ընթացող Movistar Open-2011-ի մրցաշարի մեկնարկային ռաունդում:

Առաջին խաղում Նալբանդյանը խաղացել է արգնետինացի Կարլոս Բերլոկի հետ: Նալբանդյանը կոտրեց մրցակցի դիմադրությունը միայն երրորդ՝ վճռական սեթում՝ հաղթելով 6:2, 2:6, 6:2 հաշվով: Հանդիպումը շարունակվել է 1 ժամ 57 րոպե: Այդ հաղթանակը երկրորդը դարձավ 2005թ. մրցաշարի չեմպիոնի համար, հաղորդում է gotennis.ru-ն: Ներկա մրցումների երկրորդ շրջանում Նալբանդյանը կհանդիպի Օրասիո Սեբալյոսի հետ:

Նալբանդյանի ու Սեբալյոսի ուղիները դեռ երբեք չեն խաչվել միջազգային մրցումներում: