Սանկտ Պետերբուրգում կնշվեն Հայոց ցեղասպանության ու Հոլոքոսթի հիշատակի օրերը

Սանկտ Պետերբուրգում կնշվեն Հայոց ցեղասպանության ու Հոլոքոսթի հիշատակի օրերը

PanARMENIAN.Net - Սանկտ Պետերբուրգի խորհրդարանի օրենսդիր հանձնաժողովը հավանություն է տվել «Սանկտ Պետերբուրգում տոնական և հիշատակի օրերի մասին» քաղաքային օրենքում առաջարկվող փոփոխություններին, հայտնում է «ԲալտԻնֆոն»:

«Եդինայա Ռոսիայի» խմբակցության ներկայացուցիչ Վիտալի Միլոնովն առաջարկել էր քաղաքի տարածքում հիշատակի օրեր հայտարարել Հայոց ցեղասպանության զոհերի հիշատակի օրն ու Հոլոքոսթի զոհերի հիշատակի միջազգային օրը: Օրինագծերի համաձայն հունվարի 27-ը՝ Հոլոքոսթի զոհերի հիշատակի միջազգային օրը և ապրիլի 24-ը՝ Հայոց ցեղասպանության զոհերի հիշատակի օրը կներառվեն օրենքում 2015 թվականից: 1915 թվականին տեղի ունեցած իրադարձությունների 100-ամյակի շեմին, երբ հայ բնակչությունը բնաջնջման ենթարկվեց Օսմանյան կայսրության տարածքում և ստիպված եղավ հեռանալ հայրենիքից, Միլոնովը տեղին է համարում կարեկցանքի նման արտահայտումը եղբայրական ժողովրդի հանդեպ որպես «հիշեցում և զգուշացում երիտասարդ սերնդին և քաղաքական պայքարի ֆաշիստական մեթոդների դատապարտում»:

Բացի այդ, պատգամավոր Միլոնովը հիշեցրել է, որ երկրորդ համաշխարհային պատերազմի տարիներին ոչնչացվեց մոտ 6 մլն հրեա, որոնք ապրում էին Եվրոպայի օկուպացված երկրներում, ԽՍՀՄ տարածքում՝ 1,5 մլն հրեա: Մասնավորապես, նա հավելել է, որ գոյություն ունեն Պավլովսկում, Պուշկինում ու Գատչինայում հրեաների խոշորածավալ գնդակահարությունների մասին վկայություններ: Հոլոքոսթի զոհերի հիշատակի միջազգային օրն ամրագրված է ՄԱԿ ԳՎ բանաձևում:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը:

Հոլոքոսթ

Հոլոքոսթը Երկրորդ համաշխարհային պատերազմի տարիներին գերմանական նացիստների կողմից միլիոնավոր մարդկանց համակարգված հետապնդումն ու գնդակահարումն էր, որի զոհը դարձան հրեական ժողովրդի գրեթե մեկ երրորդը եւ այլ փոքրամասնությունների բազմաթիվ ներկայացուցիչներ, որոնք խտրականության, վայրագությունների ու դաժան սպանությունների ենթարկվեցին: 1949թ. Համաշխարհային հրեական կոնգրեսի կողմից Եվրոպայի երկրներում պատերազմից առաջ եւ հետո հրեաների թվի կատարած համեմատությունը հանգեցրեց այն եզրակացության, որ Աղետի ժամանակ զոհվել է վեց միլիոն մարդ: Այդ թիվն ամրագրված է գլխավոր ռազմական հանցագործների Նյուրնբերգյան գործընթացի, Էյխմանի գործընթացի վճիռներում եւ ճանաչվել է Աղետի վիճակագրության հարցերով գիտնականների միջազգային խորհրդակցության (Փարիզ, 1987թ.) մասնակիցների մեծ մասի կողմից, երբ քննարկվում էին 4,2-6 միլիոն թվերը:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
Նա նշել է, որ դիտարկում է հայկական բանակին «ոչ մահաբեր ձևաչափով» աջակցություն ցուցաբերելու հնարավորությունը, բայց կոնկրետ որոշումներ չկան
---