Մոսուլի ողբերգությունը նման է Հայոց ցեղասպանությանը. Իսլամիստ զինյալները «քրիստոնյաների որսի» են դուրս եկել

PanARMENIAN.Net - Մինչև 2003-ը` ԱՄՆ-ի կողմից Իրաքում սկսված պատերազմը, երկրում 1,5 մլն քրիստոնյա էր ապրում: Դրանցից 200 հազարը բնակվում էին Մոսուլում, որտեղ այժմ անգամ մեկ քրիստոնյա չի մնացել: Քրդական «Ֆըրաթ» գործակալությունն անդրադարձել է «Իրաքի և Լևանտի իսլամական պետություն» խմբավորման հարձակումից և մահվան սպառնալիքից փախած քրիստոնյաների խնդրին` գրելով, որ հազարավոր տարիներ Մոսուլում և դրա շրջակայքում բնակված հայ,ասորի,եզդի փոքրամասնությունները սպառնալիքի տակ լքել են իրենց տները և ապաստան գտել Իրաքի քրդական մասում:Այժմ, ենթադրվում է, որ Իրաքում 300.000 քրիստոնյա է մնացել:

Աշխարհում ճնշումների ենթարկված քրիստոնյա ժողովուրդների հարցերով ուսումնասիրություններ իրականացրած «Միջազգային հանրությունը՝ հանուն մարդու իրավունքների» կազմակերպության խոսնակն այժմ Մոսուլում տեղի ունեցողը նմանեցրել է 1915-ի Հայոց ցեղասպանությանը:

«Իսլամական պետություն» խմբավորումը հունիսից գրավել է Մոսուլն ու այնտեղ էթնիկ զտում է իրականացնում: Անցյալ շաբաթ իսլամիստ ծայրահեղականները հրկիզել են տարածաշրջանի ամենահին եկեղեցիներից մեկը համարվող ասորի-կաթոլիկների 1800-ամյա եկեղեցին, իսկ քաղաքում բնակվող քրիստոնյաներին և կրոնական այլ խմբերի ներկայացուցիչներին սպառնացել են սպանել:

Նա նշել է, որ քրիստոնյաները 100 տարի է՝ նման ողբերգության ականատես չէին եղել և երախտագիտություն է հայտնել նրանց պաշտպանության տակ առած քրդերին և Հորդանանին:Կազմակերպության ներկայացուցիչը նաև նշել է, որ Սադամ Հուսեյնի պաշտոնավարման տարիներին քրիստոնյաներն ավելի ապահով էին: Նա ընդգծել է, որ եթե քրդական հատվածներում քրիստոնյաների համար վրանային ճամբարներ չկառուցվեին՝ ողբերգությունը շատ ավելի խորը կլիներ:

Բաղդադից ընտրված քրիստոնյա խորհրդարանական Ջոնադամ Քաննան իսլամիստ ահաբեկիչների հարձակումները «էթնիկ զտում» է որակում, իսկ քրիտոնյա ժողովուրդների իրավունքների պաշտպանությամբ զբաղվող կազմակերպությունները մտահոգվում են, որ հարձակումներ կարող են իրականացվել շրջանում ամենամեծաթիվ քրիստոնյաներն ունեցող երկրի՝ Լիբանանի ուղղությամբ:

Աշխարհի կաթոլիկների հոգևոր առաջնորդ Ֆրանցիսկոս պապը կիրակի աղոթել էր Իրաքի քրիստոնյաների, իսլամիստների հարձակումների հետևանքով մահացածների և սպառնալիքի տակ ապրողների համար:

Ո՛չ Թուրքիան, ո՛չ Կատարը և ո՛չ Սաուդյան Արաբիան որևէ կերպ չեն արձագանքել, ինչը քրիստոնեական շրջանակների քննադատությանն է արժանացել, քանի որ վերջին երեք օրերի ընթացքում Մոսուլից իրական գաղթ է տեղի ունենում, «Ֆըրաթին» հղումով գրում է Tert.am-ը:

Բաղդադում ասորիների հոգևոր առաջնորդը հայտարարել է, թե այդ շրջաններում անգամ մեկ քրիստոնյա չի մնացել, իսկ իսլամիստ զինյալները «քրիստոնյաների որսի» են դուրս եկել: Քրիստոնյաների փախուստից մի քանի օր առաջ նրանց տների վրա նշաններ են արվել, և ասորի առաջնորդը կոչ է անում միջազգային հանրությանն ու, հատկապես, իսլամական աշխարհին արձագանքել տեղի ունեցողին: