Ա. Սաղաթելյան. Սահմանադրական բարեփոխումների մասին նախագահի դիրքորոշումը, հավանաբար, հայտնի կդառնա փետրվար-մարտին

Ա. Սաղաթելյան. Սահմանադրական բարեփոխումների մասին նախագահի դիրքորոշումը, հավանաբար, հայտնի կդառնա փետրվար-մարտին

PanARMENIAN.Net - Սահմանադրական բարեփոխումների մասին նախագահ Սերժ Սարգսյանի վերջնական դիրքորոշումը, ըստ ամենայնի, հայտնի կլինի 2015-ի փետրվար-մարտին։ Այս մասին ասել է երկրի ղեկավարի մամուլի խոսնակ Արման Սաղաթելյանը՝ նշելով, որ նախագահի աշխատակազմը ստացել է Սահմանադրական բարեփոխումների հայեցակարգը:

Նա ընդգծել է, որ Սահմանադրական բարեփոխումներով զբաղվող հանձնաժողովն իր ստեղծումից մինչ օրս մեծածավալ ու հիմնարար աշխատանք է կատարել:

«Նախագահը բարձր է գնահատում նաև հայեցակարգի նախագծի հանրային քննարկումները կազմակերպելու և անցկացնելու կապակցությամբ հանձնաժողովի ձեռնարկած ջանքերը: Շնորհակալ ենք նաև բոլոր այն հասարակական-քաղաքական գործիչներին ու կազմակերպություններին, տեղական ինքնակառավարման մարմիններին, մասնագիտական կառույցներին ու մասնագետներին, որոնք ակտիվ և արդյունավետ մասնակցել են այս կարևորագույն գործընթացին»,- նշել է Սաղաթելյանը, գրում է Tert.am-ը:

Հոկտեմբերի 15-ին նախագահին առընթեր հանձնաժողովի մշակած սահմանադրական բարեփոխումների հայեցակարգը ներկայացվել էր նախագահին ու հրապարակվել: Բացի այդ, հրապարակվել էր նաև Վենետիկի հանձնաժողով եզրակացությունը՝ անգլերենով, ինչպես նաև եզրակացության ոչ պաշտոնական թարգմանությունը՝ հայերենով:

Եզրակացության ամփոփիչ հատվածում նշվում էր, թե հայեցակարգի նախագիծը «լավ և արժեքավոր հիմք է Հայաստանի Սահմանադրության բարեփոխման կոնկրետ առաջարկությունների փաթեթի մշակման համար», որը կամրապնդի ժողովրդավարական սկզբունքները և անհրաժեշտ պայմաններ կհաստատի երկրում իրավունքի գերակայության և մարդու իրավունքների հարգումն ապահովելու հարցում: Այն հիմնված է երկրի իրավիճակի համապարփակ և հետևողական վերլուծության վրա:

Նախագահի մամուլի խոսնակի խոսքով, Վենետիկի հանձնաժողովն իր եզրակացությամբ փաստել է, որ հայեցակարգում արտահայտված իրավական դիրքորոշումները համապատասխանում են իր ավանդական դիրքորոշումներին և հատուկ շեշտել, որ սահմանադրական հանձնաժողովի անդամերի հետ հանդիպումների ընթացքում Վենետիկի հանձնաժողովի զեկուցողների արտահայտած տեսակետները հաշվի են առնվել, իսկ հայեցակարգի նախագիծը բարեփոխումների հնարավորություն է ընձեռում, որը չպետք է բացթողնել:

«Ինչ վերաբերում է հետագա քայլերին, ապա դրանք կանխորոշված են նախագահի 2013-ի սեպտեմերի 4-ի հրամանագրով: Հանրապետության նախագահը լուծելու է հայեցակարգին հավանություն տալու կամ այն մերժելու հարցը: Ընդ որում, դրա համար որոշակի ժամկետներ սահմանված չեն»,- ընդգծել է Սաղաթելյանը:

Միևնույն ժամանակ, նկատի ունենալով, որ հայեցակարգում արծարծված որոշ հիմնահարցեր ընդգծված քաղաքական բաղադրիչ ունեն, այդ առթիվ լրացուցիչ քաղաքական քննարկումներ են ակնկալվում և քաղաքական ավելի մեծ կոնսոլիդացիա, եզրափակել է Արման Սաղաթելյանը:

Սահմանադրական բարեփոխումներով զբաղվող հանձաժողովն ապրիլի 10-ին նախագահին էր ներկայացրել Սահմանադրական բարեփոխումների հայեցակարգի նախագիծ, որը 45 էջանոց փաստաթուղթ է: Դրանով որպես կառավարման համակարգի հնարավոր այլընտրանք առաջարկվում է կառավարման խորհրդարանական համակարգը՝ ելնելով հանրապետությունում առկա մի շարք իրողություններից:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
Նա նշել է, որ դիտարկում է հայկական բանակին «ոչ մահաբեր ձևաչափով» աջակցություն ցուցաբերելու հնարավորությունը, բայց կոնկրետ որոշումներ չկան
---