Ծանրամարտն ինձ ճիշտ ուղու վրա է դրել, դարձրել է ավելի բարի ու ներողամիտ

Շատ ծանր մարզումներ եմ անցկացրել, քանի որ շատ լուրջ խնդիր եմ դրել իմ առջև: Ինձ վրա մեծ պատասխանատվություն եմ վերցրել, որ մեր երկիրը պատվով ներկայացնեմ Օլիմպիական խաղերում և արդարացնեմ իմ ժողովրդի, ընտանիքիս և ընկերներիս սպասելիքները: Հիմնականում մարզվում եմ Բաղրամյան գյուղում, որտեղ նաև ապրում եմ:

2010 թվականին ես շատ լուրջ վնասվածք էի ստացել ու 2 ծանր վիրահատության էի ենթարկվել, ոտքս և ձեռքս գիպսի մեջ էին գտնվում, խնդիրներ ունեի նաև մեջքիս հետ կապված: Բայց ինձ հնարավորություն ընձեռնվեց նման ծանր վնասվածքներից հետո կրկին բարձրանալ մրցահարթակ: Ես շատ գոհ էի իմ արդյունքից, քանի որ տասնյակ մարզիկների մեջ գրավել եմ 8-րդ տեղը, ճիշտ է մեդալ չկարողացա նվաճել, բայց լավ արդյունք ցույց տվեցի և հաջող օգտագործեցի 5 մոտեցում: Ես գնացել էի Օլիմպիական ուղեգրի համար, առաջնությունն ինձ օգնեց վստահություն ձեռք բերել:

Ես միշտ մարզվել եմ առանձին` իմ գրաֆիկով: Հայրս` Օկսեն Միրզոյանը, Օլիմպիական չեմպիոն է, ու կարծում եմ նա շատ լուրջ մասնագետ է և կարող է ինձ տալ անհրաժեշտ գիտելիքները: Հավաքականի մարզիչներն էլ են շատ փորձառու ու լավ գիտեն իրենց աշխատանքը, բայց ես սովոր եմ հայրիկիս գլխավորությամբ մարզվել:

Շատ դժվար է միասին աշխատելը, գրեթե ամեն օր էլ կռվում ենք իրար հետ (ծիծաղում է), բայց միայն նա է հաղթող դուրս գալիս, քանի որ ես միշտ կատարում եմ նրա առաջադրանքները: Նա Օլիմպիական չեմպիոն է, ու Եվրոպայի չեմպիոնը նրանից շատ բան ունի սովորելու: Մարզադահլիճում նա իմ մարզիչն է միայն ու շատ պահանջկոտ է: Կարծում եմ խստությունը շատ կարևոր է ու օգնում է, որ ավելի լավ աշխատես:

Այդ մարզադահլիճը գտնվում է մեր տան կողքին, ես և հորեղբորս տղան`Արայիկը, միասին ենք մարզվում: Ես գտել եմ այն վայրը, որտեղ կարելի է հանգիստ մարզվել և կարծում եմ, որ հաջողություններս նաև այդ դահլիճի հետ են կապված:

Ես դեռ 5 տարեկանում բարձրացրել եմ 20 կգ-ոց ծանրաձող: Ստիպողաբար ոչինչ չի եղել, ես ինքս եմ ընտրել այդ մարզաձևը: Հիշում եմ, երբ դեռ փոքր էի, տեսա, թե ինչպես են մեծերը մարզվում ու որոշեցի, որ ես էլ եմ ուզում ելույթ ունենալ կարևոր հարթակներում և ցույց տալ կարողություններս: Շատ ուրախ եմ այդ ընտրության համար, Աստված ինձ տվել է բարձրունքների հասնելու հնարավորություն, և իմ կարողությունների սահմաններում փորձելու եմ Օլիմպիադայում մեդալ նվաճել:

Ես երիտասարդական հավաքականում բավական հաջող եմ ելույթ ունեցել, 2008 թվականին Եվրոպայի առաջնությունում ոսկե մեդալ եմ նվաճել, իսկ աշխարհի առաջնությունում և Համաշխարհային ուսանողական խաղերում դարձել եմ արծաթե մեդալակիր: 2009-ին էլ դեռ երիտասարդ էի, բայց մեկնեցի մեծահասակների Եվրոպայի առաջնություն ու հաղթող դարձա: Այնուհետև նաև արծաթե մեդալ եմ նվաճել աշխարհի առաջնությունում:

Ես երբեք կուռքեր չեմ ունեցել, երբեք ոչ մեկի համար չեմ գժվել: Իմ կուռքը միշտ եղել է ուժեղն ու հաղթողը: Ես գնահատում եմ բոլոր հաղթողներին, քանի որ ես ինքս շատ ծանր մարզումներ եմ անցկացնում ու գիտեմ, թե ինչ տանջանքների արդյունքում են հասնում հաջողության: Բոլորից էլ ինչ որ բան սովորել եմ:

Ես Տիգրանի հետ լավ հարաբերություններ ունեմ և ինձ համար կարևոր չէ, որ մի քաշային կարգում ենք հանդես գալու: Ես ինքս ինձ եմ համարում հակառակորդ, քանի որ, եթե մարզիկը չկարողանա հոգեպես իրեն կառավարել, արդյունքի չի հասնի:

Շատ դժվար է եղել, այդ վնասվածքից հետո ինձ թվում էր ամեն ինչ վերջացավ, երբ ուշքի եկա ու տեսա, որ ոտքս, ձեռքս և մեջքս գիպսի մեջ են: Բայց ինքս ինձ տրամադրեցի, ասելով, որ կարող եմ, կարող եմ, ու այդ կարողը եղավ: Շատ ջանքեր գործադրեցի ու հիմա կրկին կարող եմ պայքարել մեդալների համար: Իմ գերնպատակը իրականացավ ու ես կկարողանամ մասնակցել Օլիմպիական խաղերին:

Արդեն սկսել եմ ինքս ինձ հաղթել (ծիծաղում է): Շատ դժվար է, բայց ես հիմա չեմ շփվում ընկերներիս հետ, չնայած նրանց շատ եմ սիրում, դուրս չեմ գալիս տնից ու քանի որ շատ լուրջ նպատակ եմ դրել իմ առջև, փորձում եմ այնպես անել, որ ոչինչ չշեղի ինձ: 100 տարվա ընթացքում 13 հայ Օլիմպիական չեմպիոն է եղել, ու իմ ընկերները չեն նեղանա, որ ես որոշ ժամանակ չտեսնեմ նրանց, բայց դառնամ Օլիմպիական չեմպիոն:

Դժվարանում եմ պատասխանել, քանի որ հայրիկիս շատ եմ նման: Բայց ավելի կոնկրետ Օլիմպիական խաղերից հետո կպատասխանեմ, թե ինչով ենք նման (ծիծաղում է):

Ես շատ ուրախ եմ, որ ինձ համեմատում են հայրիկիս հետ: Նրա մեջ շատ բան է ինձ դուր գալիս, նրա համեստությունը, լավ բնավորությունը, ու ուրախալի է, երբ համեմատում են մի մարդու հետ, որին բոլորը հարգում ու սիրում են:

Բացի մեդալներից, սպորտն ինձ ճանաչում է տվել, օգնել է, որ կտրվեմ փողոցից ու պիտանի մարդ դառնամ: Սպորտն ինձ ճիշտ ուղու վրա է դրել, դարձրել է ավելի բարի ու ներողամիտ:

Եթե իմ ցանկությամբ լինի, կուզեմ 6-ն էլ ոսկե մեդալ լինեն: Բայց հաստատ կարող եմ ասել, որ մեդալ լինելու է:

Բոլոր նվաճումներն էլ ինձ համար Հայաստանի առաջնության չեմպիոնությունից մինչև Օլիմպիական խաղերի ոսկե մեդալը կարևոր են: Քանի որ Օլիմպիական չեմպիոնն էլ իր ուղին սկսել է պատանեկան մրցաշարերում տոնած հաղթանակներից: Ինձ համար Օլիմպիական մեդալն է շատ կարևոր, բայց սկսնակ մարզիկի համար ամենակարևորը պատանեկան մրցաշարում հաջողության հասնելն է: