Արամ Պաչյան. «Ցտեսություն, Ծիտ» վեպը բոլոր նրանց համար է, ովքեր հետաքրքվում են արդի հայ գրականությամբ

Արամ Պաչյան. «Ցտեսություն, Ծիտ» վեպը բոլոր նրանց համար է, ովքեր հետաքրքվում են արդի հայ գրականությամբ

PanARMENIAN.Net - Երևանի «Սիրահարների» այգում այսօր տեղի ունեցավ հայ ժամանակակից արձակագիր Արամ Պաչյանի «Ցտեսություն ծիտ» վեպի շնորհանդեսը: Հեղինակը չցանկացավ բնորոշել կամ նշել, թե կոնկրետ ինչի մասին է գիրքը. «Գիրքը մասինների մասին պատկերացումների դեֆորմացումն է, իմ արձակը չի կարող մասինի մասին լինել: Գրքում ինձ համար կարևոր է և՛ ձևը, և՛ ռիթմը, և այն զգացողություններն ու պատկերացումները կյանքի մասին, որոնք ունեն վեպի հերոսները»:

Ըստ հեղինակի, գիրքը նախատեսված է բոլոր նրանց համար, ովքեր հետաքրքրված են արդի հայ գրականությամբ:

«Գրքից հատվածներ եմ դեռ կարդացել, ընդհանուր տպավորությունս դրական է: Առհասարակ, Պաչյանի գրականությունն ինձ համար մեր ժամանակից գրականության համար ուրիշ, նոր որակ է, զգացվում է, որ շատ աշխատած գրականություն է»,- ասաց շնորհանդեսին ներկա Աստղիկ Հակոբյանը:

Գրքի խմբագիր, գրականագետ Արքմենիկ Նիկողոսյանը նշեց, որ գործ ունենք մի վեպի հետ, որը փոխակերպումների է ենթարկում հայ ժամանակաից վեպը. «Վեպը հրաշալիորեն միահյուսված է հայ վիպագրության հետ: Այն, լինելով ներաշխարհային պատում, կարողացել է դուրս գալ հասարակությանը հուզող թեմաների ոլորտ»:

Գրականագետը նշեց նաև, որ վեպում պատասխան է տրվում այն կիսատ «մեսսիջներին», որը տվել էր հեղինակը իր նախորդ «Ռոբինզոն և 13 պատմվածք» ժողովածուում:

Շնորհանդեսին ներկա էին հեղինակի ընթերցողները, գրական աշխարհի ներկայացուցիչներ և պարզապես մարդիկ, ովքեր ուզում էին ձեռք բերել գիրքը հեղինակի ստորագրությամբ:

Վեպը լույս է տեսել 500 տպաքանակով և վաճառվելու է Երևանում գործող բոլոր գրախանութներում:

 Ուշագրավ
Տիգրան Ավինյանն ու Գրեգորի Դուսեն այցելել են պատմական թաղամաս
Snap-ը պլատինե երգի կարգավիճակ է ստացել նաև մի քանի այլ երկրներում
Հայկական դուդուկի երաժշտությունը ՅՈՒՆԵՍԿՕ-ի ցանկում է ընդգրկվել դեռևս 2008 թ․
Ցուցադրությունը կազմակերպվում է այս երեք ֆիլմերի Պոմպիդու կենտրոնին հանձնման արարողության առիթով
---