Վարդան Օսկանյանը դիմել է վերաքննիչ դատարան

PanARMENIAN.Net - Հայաստանի նախկին արտգործնախարար Վարդան Օսկանյանը դիմել է վերաքննիչ դատարան՝ բողոքարկելու Երևանի Կենտրոն և Նորք-Մարաշ վարչական շրջանի ընդհանուր իրավասության դատարանի՝ ա յս տարվա hուլիսի 23-ին կայացրած որոշումը: Այդ որոշումով դատարանը հրաժարվել էր բավարարել Վարդան Օսկանյանի բողոքը, որով նա պահանջում էր վերացնել ՀՀ կառավարությանն առընթեր ազգային անվտանգության ծառայության կողմից 2012 թ. մայիսի 25-ին իր հիմնադրած Սիվիլիթաս հիմնադրամի դեմ քրեական գործ հարուցելու մասին որոշումը:

Վարդան Օսկանյանի փաստաբան Տիգրան Աթանեսյանի պնդմամբ՝ վերաքննիչ դատարան դիմելու համար իրենք ունեն բոլոր հիմքերը: «Դատարանն իր պատճառաբանությունների մեջ նշում է, որ Վարդան Օսկանյանի իրավունքները չեն խախտվել, ինչը չպատճառաբանված եզրահանգում է: Միաժամանակ, դատարանը չի անդրադարձել և չի պատասխանել մեր փաստարկներին»,- ասել է Տիգրան Աթանեսյանը:

Սիվիլիթաս հիմնադրամի տնօրեն Սալբի Ղազարյանն էլ նամակ է ուղարկել Պետական եկամուտների կոմիտեի նախագահ Գագիկ Խաչատրյանին , որով փորձել է ճշտել, թե ինչով է պայմանավորված Սիվիլիթաս հիմնադրամի՝ պետական բյուջեի հետ փոխհարաբերությունների ճշտության ստուգումների կասեցումը: Հիշեցնենք, որ ստուգումները, որոնք երկարաձգումից հետո պետք է ավարտվեին 2012 թ. օգոստոսի 3-ին, Պետական եկամուտների կոմիտեի նախագահի հրամանով հուլիսի 23-ից 30 աշխատանքային օրով կասեցվել են: