Հայաստանում առաջին անգամ կանցկացվի սոցիալական գովազդի վիրտուալ փառատոն

PanARMENIAN.Net - Սեպտեմբերից առաջին անգամ Հայաստանում մեկնարկում է Սոցիալական գովազդի վիրտուալ փառատոնը՝ «Կանաչաստան» ՀԿ-ի, Աուդիո-Վիզուալ Լրագրողների Ասոցիացիայի և Ռուս-հայկական (Սլավոնական) համալսարանի համատեղ նախաձեռնությամբ:

Ինչպես PanARMENIAN.Net ին հայտնում են «Կանաչաստան» ՀԿ-ի լրատվական ծառայությունից, աոցիալական գովազդի վիրտուալ փառատոնը նպատակ ունի նպաստել որակյալ սոցիալական գովազդի մշակույթի ձևավորմանը և երիտասարդ մասնագետների ու քաղաքացիական ակտիվիստների հմտությունների զարգացմանը:

Փառատոնն իրականացվում է «Լրատվության այլընտրանքային ռեսուրսներ» ծրագրի շրջանակում:

Ծրագիրը քաջալերում և աջակցում է ակտիվ երիտասարդներին, ովքեր ցանկանում են անդրադառնալ առանցքային սոցիալ-տնտեսական և քաղաքական հարցերի` նորարար մեդիա բովանդակության ստեղծման և որակյալ սոցիալական գովազդի պատրաստման միջոցով:

Հնարավորություն է ընձեռվում սեպտեմբերի 10-15-ը մասնակցել ոլորտի փորձագետների կողմից անցկացվող սեմինարներին: Դասընթացների մասնակցության հայտերն ընդունվում են մինչև սեպտեմբերի 5-ը:

Կներկայացվեն սոցիալական գովազդի սկզբունքները, տեխնոլոգիայի պատշաճ կիրառումը, ինչպես նաև մոնտաժի հիմունքները: Սոցիալական գովազդի վիրտուալ փառատոնի սեմինարներին և մրցույթին կարող են մասնակցել ուսանողներ, քաղաքացիական խմբերի և նախաձեռնությունների ներկայացուցիչներ, ինչպես նաև 18-ից 35 տարեկան ցանկացած ոք, ովհետաքրքրված է սոցիալական գովազդի թեմայով և պատրաստմամբ:

Հաղթող մասնակցին սոցիալական գովազդը եթերում հեռարձակելու բացառիկ հնարավորություն է ընձեռվում: