Լիբանանյան «Ազդակ» օրաթերթ. Դամասկոսում հավաքական ջարդի ընթացքում հայ ընտանիք է սպանվել

PanARMENIAN.Net - Սիրիայի մայրաքաղաք Դամասկոսի Զամալքայի արվարձանում իրականացված հավաքական ջարդի ընթացքում հայ ընտանիք է սպանվել: Այս մասին տեղեկացրել է Լիբանանյան «Ազդակ» օրաթերթի Դամասկոսում գտնվող թղթակիցը:

Ընտանիքի 6 անդամների դիակներն այսօր հայտնաբերվել են մի մզկիթում:

«Սիրիահայերի աջակցության և օգնության էջի» հիմնադիր-ղեկավար Անահիտ Ադամյանի Դամասկոսում գտնվող աղբյուրները հայտնեցին, որ իրենք չեն կարող ո՛չ հաստատել, ո՛չ էլ հերքել այս տեղեկատվությունը, քանի որ սպանվածների ինքնությունը դեռևս պարզել չի հաջողվել:

Երեկ ՀՀ ԱԳՆ մամուլի խոսնակ Տիգրան Բալայանը հայտնել էր, որ Դամասկոսի Ջոբար թաղամասում, անհայտ պայմաններում սպանվել է 3 հայ: Սպանվածները 1963 թ. ծնված Պետրոս Մաթոսյանը, 1966 թ. ծնված Գևորգ Մաթոսյանը, և 1990 թ ծնված Լևոն Պետրոսի Մաթոսյանն են: Այժմ Առաջնորդարանը փորձում է դուրս բերել դիակները հակամարտության գոտուց:

Անահիտ Ադամյանի հետ հեռախոսազրույցում Դամասկոսի հայերը տեղեկացրին, որ հայերի դիակները հակամարտության տարածքից դուրս բերել դեռևս չի հաջողվել: Սպանվածների դիակները փողոցում են, բայց հայ համայնքի ներկայացուցիչները հնարավորություն չունեն մոտենալ և վերցնել դրանք: