«ԵԱՀԿ ՄԽ երեք համանախագահներ, որոնք տասնամյակների ընթացքում մենաշնորհային են դարձրել բանակցային գործընթացը, ոչ միայն չեն արագացրել խաղաղ ելքը, այլ նաև մոտեցրել են Ղարաբաղյան հակամարտության ռազմական լուծումը:
Արձանագրելով այս փաստը`Ադրբեջանի ԱԳ փոխնախարար Արազ Ազիմովը ճանաչել է միջազգային իրավիճակի սրացումը»,-հայտարարել է Միլլի Մեջլիսի պատգամավոր Զահիդ Օրուջը` մեկնաբանելով ղարաբղյան հակամարտության շուրջ ձևավորված իրավիճակը:
«Բանակցային գործընթացի վիժեցումը տվյալ պարագայում նշանակում է հակամարտության զարգացման մեջ նոր փուլի մեկնարկ:
Եթե մինչ այժմ, Մինսկի «եռյակի» ուղևորություններն ադրբեջանական կողմի մոտ հույսեր էին առաջացնում, որ ինչ-որ դիվանագիտական պայքար է ընթանում, որտեղ Ադրբեջանի նախագահը զիջումների չի գնա, ապա այժմ հայկական կողմը Ադրբեջանին կանգնեցրել է խաղաղ բանակցություններին այլընտրանքային ճանապարհ գտնելու անհրաժեշտության առջև»,-ընդգծել է պատգամավորը, հաղորդում է Vesti.az-ը:
Հարկ է նշել, որ հենց ադրբեջանական կողմն է անընդհատ տապալում խաղաղ բանակցությունները` անտեսելով միջազգային միջնորդների` շփման գծից դիպուկահարներին հեռացնելու, այնտեղ տեղի ունեցած միջադեպերը հետաքննող մեխանիզմներ մշակելու վերաբերյալ բոլոր կոչերը, ինչպես նաև խախտելով հրադադարի ռեժիմն ու Հայաստանի և Լեռնային Ղարաբաղի հետ սահմանին դիվերսիաներ կազմակերպելով: Ադրբեջանի կողմից վերջին պրովոկացիան Հունգարիայից արտահանձնված մարդասպան Ռամիլ Սաֆարովին ներում շնորհելն էր:
Զահիդ Օրուջի խոսքով, այսօր ԵԱՀԿ ՄԽ «ոչ մի իրական գործառույթ չի կատարում և միևնույն ժամանակ իր հեղինակությամբ խոչընդոտում է միջնորդության համար այլ թեկնածուների ի հայտ գալուն»:
«Կոնֆիդենցիալ բանակցությունների մասնակից Արազ Ազիմովը հայտարարել է, որ ներկայումս Ադրբեջանը քայլեր է ձեռնարկում իրավիճակն իր օգտին փոխելու վերաբերյալ: Կարելի է միայն գուշակել, արդյոք խոսքը վերաբերում է ռազմա-քաղաքական կուրսին Թուրքիայի միանալու վերաբերյալ Ռուսաստանի հետ առանձին բանակցություններ վարելուն, թե ռազմական քարոզչության ծրագրերի մասին»,-ընդգծել է նա: