Վայոց Ձորում բացվել է առաջին գյուղական հյուրատունը

PanARMENIAN.Net - Երեկ Վայոց Ձորի մարզի Հերմոն գյուղում տեղի ունեցավ գյուղական հյուրատան բացման, «Բերքի Տոնի» և «Վայոց Ձորի ավանդական խոհանոցի» տոնահանդեսը: Միջոցառումն իրականացվեց Օքսֆամի «Կայուն Կենսապահովման Ծրագրի» շրջանակներում` մարզային գործընկեր «Աշխատանք և հայրենիք» ՀԿ-ի կողմից:

«Բերքի Տոնի» և «Վայոց Ձորի ավանդական խոհանոցի» տոնահանդեսը տեղի ունեցավ Հերմոն գյուղի բնակիչ Սաhակ Հովհաննիսյանի տան հարակից այգում: Սահակը` Օքսֆամի կողմից իրականացվող «Կայուն Կենսապահովման Ծրագրի» շրջանակներում` «Նոր Հորիզոն» հիմնադրամի ֆինանսական աջակցությամբ կարողացել է վերանորոգել իր տունը և ծառայեցնել այն հյուրընկալության նպատակներով` դրանով իսկ նպաստելով Վայոց Ձորի գյուղական համայնքներում ագրոտուրիզմի զարգացմանը:

Միջոցառմանը մասնակցեցին Եղեգիս, Հերմոն, Գոմք, Զեդեա և Ազատեկ շահառու գյուղերի 5 կանանց կոոպերատիվներից 30 ներկայացուցիչներ, ովքեր ներկայացրեցին իրենց գյուղերին բնորոշ բերքն ու բարիքը և ագրո-էկոտուրիզմի հնարավորություններն իրենց գյուղում: Յուրաքանչյուր գյուղ ներկայացրեց նաև տեղական խոհանոցին բնորոշ ճաշատեսակներ: Հյուրերը մասնակցեցին նաև ավանդական լավաշի թխման արարողությանը:

Նշենք, որ Օքսֆամ կազմակերպության առաքելությունն է` Աղքատության կրճատում և Մարդկային տառապանքի վերացում: Սկսած 1994 թվականից կազմակերպությունը Հայաստանում իրականացնում է մարդասիրական և զարգացման տարաբնույթ ծրագրեր շուրջ 165 հեռավոր գյուղական համայնքներում` սերտ համագործակցելով կառավարության, տասնյակից ավելի տեղական հասարակական կազմակերպությունների, տեղական ինքնակառավարման մարմինների և մարզային իշխանությունների հետ: