«Հայկական ժամանակ». ՊԵԿ-ը ստուգումներ է անցկացնում 127 առողջապահական հիմնարկներում

16 հոկտեմբերի 2012 - 10:21 AMT

PanARMENIAN.Net - Դեռ անցյալ շաբաթ լուրեր էին շրջում, որ ՊԵԿ-ը ստուգումներ է սկսել առողջապահության ԲՀԿ-ական նախկին նախարար Հարություն Քուշկյանի «Էրեբունի» բժշկական կենտրոնում: «Հայկական ժամանակ»-ի թղթակցի հարցին` ճի՞շտ է այս տեղեկությունը, ՊԵԿ մամուլի ծառայությունից պատասխանել են. «Առողջապահության ոլորտում հսկողական աշխատանքները սկսվել են սեպտեմբերի 1-ից և ներկայում ընթացքի մեջ են»: Ըստ ՊԵԿ-ի, այդ աշխատանքներում ընդգրկված են 127 կազմակերպություն և անհատ ձեռնարկատեր, որոնցից 111-ի մոտ անցկացվել կամ անցկացվում են ստուգումներ: Դրանց թվում է նաև «Էրեբունի» կենտրոնը: Ստուգումներն այստեղ ավարտվել են հոկտեմբերի 12-ին: «Էրեբունի բժշկական կենտրոնում չափագրման արդյունքներով միջին օրական հասույթի զգալի տարբերություններ չեն գրանցվել»,- պատասխանել են ՊԵԿ մամուլի ծառայությունից: (Խոսքը հարկային մարմինների կողմից իրականացվող «խրոնոմետրաժի» մասին է, երբ հարկայինի աշխատակիցները որևէ ժամանակահատված հաշվառում են տվյալ տնտեսվարողի մատակարարած ապրանքները կամ ծառայությունները և արդյունքները համեմատում համադրելի մեկ այլ ժամանակահատվածի հետ: Եթե արդյունքները շատ չեն տարբերվում, համարվում է, որ տվյալ տնտեսվարողը ստվերում չի գործում): Հայտնել են նաև, որ ստուգված կազմակերպություններից հատկապես մեծ տարբերություններ են արձանագրվել «Ռաֆայել» բ/կ-ում, Աբովյանի ծննդատանը և այլն: Ըստ ՊԵԿ-ի, ՀՀ-ում առողջապահության ոլորտի տարբեր լիցենզիաներ ստացած ավելի քան 450 կազմակերպությունից ներկայում ավելի քան 127-ում ստուգումներ են իրականացվում: Թերթը հիշեցնում է, որ առողջապահության ոլորտում լիցենզիաները տրամադրում է առողջապահության նախարարությունը: