Տիգրան Դավթյան. Շուտով Երևանում 3-ի փոխարեն 10 բրենդային հյուրանոց կգործի

19 հոկտեմբերի 2012 - 14:08 AMT

PanARMENIAN.Net - Էկոնոմիկային նախարարության և ՄԱԿ-ի Զբոսաշրջության համաշխարհային կազմակերպության գործակցության միջոցառումներից է երեկ մեկնարկած և այսօր եզրափակվող «Համամարդկային արժեքները և մշակութային բազմազանությունը 21-րդ դարում. Զբոսաշրջության նշանակությունը» խորագրով երկօրյա միջազգային համաժողովը:

Համաժողովի խնդիրը զբոսաշրջության և համամարդկային արժեքների և մշակութային բազմազանության կապն ընդգծելն է:

Այսօր համաժողովի մասնակիցները հռչակագիր ընդունեցին, որով համաձայնեցին ամրապնդել զբոսաշրջության միջոցով միջմշակութային երկխոսությունը, խրախուսել էթիկայի արժեքների հանդեպ հարգանքը, բարձրացնել զբոսաշրջության շահագրգիռ կողմերի իրազեկությունը, ուշադրություն դարձնել մասնովոր հատվածին:

Էկոնոմիկայի նախարար Տիգրան Դավթյանը նշեց, որ Հայաստանում զբոսաշրջության զարգացման հնարավորությունները մեծանում են: Առանձնացրեց համաշխարհային բրենդային հյուրանոցային համակարգերի հետ տարվեղ բանակցությունները: Դրանց արդյունքում շուտով Երևանում 3-ի փոխարեն 10 բրենդային հյուրանոց կգործի:

«Շատ բան արված է` կան այն բոլոր հիմնական ենթակառուցվածքները, որոնք անհրաժեշտ են զբոսաշրջիկների կայուն հոսք ապահովելու համար, բայց դրանք դեռ պետք է զարգացնենք սեզոնային զբոսաշրջության կտրվածքով», - ասաց նախարարը: