Արթուր Աբրահամի հաջորդ մենամարտը կլինի Ռոբերտ Շտիգլիցի հետ 2013թ. ապրիլի 6-ին

17 դեկտեմբերի 2012 - 16:33 AMT

PanARMENIAN.Net - Հանգստյան օրերին Գերմանիան ներկայացնող հայ բռնցքամարտիկ Արթուր Աբրահամը տոնեց իր 36-րդ հաղթանակը: Երկրորդ միջին քաշային կարգում նա հաջողությամբ պաշտպանեց WBO վարկածով չեմպիոնի գոտին Մեհդի Բուադլայի դեմ մենամարտում, որը ներկայացնում է Ֆրանսիան:

PanARMENIAN.Net ի թղթակցի հետ զրույցում Աբրահամը խոստովանեց, որ յուրաքանչյուր հաղթանակ դժվարությամբ է տրվում և գոտու պաշտպանությունը Բուադլայի հետ մենամարտում բացառություն չէր: «Բուադլան շատ ուժեղ հարվածներ ունի, և ողջ մենամարտի ընթացքում ես շատ ուշադիր եմ գործել, որպեսզի բաց չթողնեմ վտանգավոր հարվածները: Սակայն, ամենագլխավորը, ես շատ հաջող սկսեցի, այդպես էլ ավարտեցի»,-ասել է բռնցքամարտիկը:

Նա նշել է, որ յուրաքանչյուր մենամարտ իրեն ավելի փորձառու է դարձնում և հիմա նա վստահ է գործում այս քաշային կարգում. «Ռինգում ես շատ արագ եմ գործել, աշխատելով թույլ չտալ, որ հակառակորդս հանգստանա: Ես դասեր եմ քաղել պարտություններից ու այժմ ամեն ինչ անելու եմ ռինգը հաղթանակած լքելու համար»:

Իր հաջորդ մենամարտը բռնցքամարտիկը կանկցանի 2013թ. ապրիլի 6-ին Ռոբերտ Շտիգլիցի հետ: Նրանք հանդիպել են 2012թ. օգոստոսի 25-ին, և այն ժամանակ մրցավարների որոշմամբ հաղթանակը և WBO վարկածով գոտին տրվել է Աբրահամին: Նա նշեց, որ իրենք պայմանավորվածություն ունեն ռևանշի վերաբերյալ: