ՎԶԵԲ. Նախագահական ընտրությունները կհանգեցնեն տնտեսական ակտիվության անկման

PanARMENIAN.Net - Չնայած, որ նախագահական ընտրությունները հետաձգելու վտանգ է առաջացել թեկնածու Պարույր Հայրիկյանի դեմ մահափորձի պատճառով, այնուամենայնիվ, երկրի առևտրային բանկերը մտադիր չեն հետաձգել իրենց ծրագրերի իրականացումը ոչ մինչ ընտրությունները, ոչ էլ՝ դրանից հետո: Հայաստանի բանկերի միության նախագահ Աշոտ Օսիպյանը «մեծ հաջողություն» է համարում այն, որ առևտրային բանկերի գործունեությունը կախված չէ երկրում ընթացող քաղաքական գործընթացներից:

Սակայն, ընտրությունների ժամանակ՝ լինի նախագահական թե խորհրդարանական, բիզնենս ընդհանրապես բախվում է անորոշության գործոնի հետ: Նախագահական ընտրությունների ժամանակ շատ ընկերություններ սպասողական դիրք են գրավում: PanARMENIAN.Net ի թղթակցի հետ զրույցում նման կարծիք հայտնեց ՎԶԵՎ երևանյան գրասենյակի ղեկավար Վալերիու Ռազլոգը:

Ըստ նրա, դա, անկասկած, անդրադառնում է նաև գործարար մթնոլորտի վրա ներդրումների ծավալի առումով: «Մենք ակնկալում ենք, որ տնտեսական ակտիվությունը կավելանա միայն ընտրություններից հետո»,-ասել է նա:

ՎԶԵԲ-ը պահպանողական կանխատեսում է տալիս ՀՀ տնտեսությանը՝ ՀՆԱ աճ 4 տոկոսի սահմանում: ՀՀ պետբյուջեում այդ ցուցանիշը 6,2 տոկոս է, իսկ գնաճը 12 ամսվա համար կանխատեսվում է 4±1,5% սահմանում, ինչպես և 2012-ին:

Սակայն կանխատեսումները վերանայվում են ամեն եռամսյակում և Ռազլոգը չբացառեց, որ կանխատեսումը կարող է վերանայվել:

Ըստ փորձագետի, ՀՀ կառավարությունը կշարունակի զուսպ քաղաքականությունը ծախսերի առումով, գնաճը կլինի ԿԲ հսկողության տակ, ինչն առավել մեծ վստահություն կառաջացնի առևտրային բանկերի ու ընկերությունների մոտ: