ՀՀ նախագահի թեկնածու Պարույր Հայրիկյանը չի դիմի Սահմանադրական դատարան: Այս մասին այսօր լրագրողների հետ հանդիպմանն ասաց Պարույր Հայրիկյանի փաստաբան Լևոն Բաղդասարյանը, հավելելով, որ այսպիսով ընտրությունները չեն հետաձգվի:
Փաստաբանի այս հայտարարությունից քիչ անց ասուլիսի սրահ մտավ նաև ինքը՝ Պարույր Հայրիկյանը:
«Ես եկա ցույց տալու, որ ներկա եմ` ոչ միայն քաղաքական դաշտում, այլև հենց ֆիզիկապես այստեղ: Փորձել են սպանել ոչ թե ինձ, այլ արժեքները», - ասաց նա: Պարույր Հայրիկյանը նշեց, որ ինքն արդեն «գործի մեջ է»:
«Թող ամեն հայ իմանա, որ որևէ ահաբեկչություն հայ քաղաքական կյանքը չի կարող շեղել բնականոն ուղուց», - հավելեց նախագահի թեկնածուն:
ԱԻՄ կուսակցության միջազգային կապերի պատասխանատու Կարո Եղնիկյանը հայտնեց, որ նոր ընտրություններ կազմակերպելն իրենք բացառեցին, քանի որ ոճրագործների նպատակը հենց Հայրիկյանին ոչնչացնելն ու նոր ընտրություններ անցկացնելն էին:
«Մեր գործն է այդ նպատակները խոչընդոտելը», - ասաց Կարո Եղնիկյանը:
Հիշեցնենք, որ Պարույր Հայրիկյանի վրա հինգ օր առաջ մահափորձ էր իրականացվել: Հրազենային հարձակման արդյունքում վիրավորվել էր նրա աջ անրակը: Վիրահատությունից հետո թեկնածուն իրավունք ուներ դիմել Սահմանադրական դատարան` ընտրությունները 2 շաբաթով հետաձգելու պահանջով:
