Հայաստանի տրանսպորտի և կապի նախարարի առաջին տեղակալ Հրանտ Բեգլարյանն ընդունել է Համաշխարհային բանկի ներկայացուցիչներին` «Կենսական նշանակության ճանապարհային ցանցի բարելավման» ծրագրի ղեկավար Վիքրամ Քութարիի գլխավորությամբ:
Հանդիպման ժամանակ քննարկվել է «Կենսական նշանակության ճանապարհային ցանցի բարելավման» ծրագրի ուժի մեջ մտնելու պայմանների և առաջին տարվա աշխատանքների ընթացքը, ըստ որի՝ նախատեսվում է 73 կմ երկարությամբ 7 ճանապարհահատվածների վերականգնում:
Ընդգծվել է, որ ծրագրի հիմնական նպատակներից է` բարելավել գյուղական համայնքների շուկաների և ծառայությունների հասանելիությունը: Ծրագրով նախատեսված է ճանապարհների վերականգնման աշխատանքները իրականացնել 2013-2017թթ. ընթացքում:
Բեգլարյանը կարևորել է ծրագրի իրականացման ընթացքում հնարավոր խնդիրներին արագ արձագանքումը, հաստատել նախարարության պատրաստակամությունը` աջակցելու բանկին և նոր ծրագրի շրջանակներում անել հնարավորը` այն արագ իրագործելու համար:
Ծրագիրը, որի ընդհանուր ֆինանսավորումը 56.2 մլն դոլար է, հիմնված է երկու բաղադրիչի վրա` կենսական նշանակության ճանապարհների վերականգնում և ծրագրի կառավարում:
