ԵՄ-ն փորձում է Հայաստանի հետ գործակցությունը շարունակելու ուղիներ գտնել

ԵՄ-ն փորձում է Հայաստանի հետ գործակցությունը շարունակելու ուղիներ գտնել

PanARMENIAN.Net - Եվրամիությունը պետք է ուսումնասիրի և վերանայի Երևանի հետ պլանավորած բոլոր ծրագրերը, գտնում է Հայաստանում ԵՄ պատվիրակության ղեկավար Տրայան Խրիստեան:

«Մասնավորապես, դա վերաբերում է ազատ առևտրի խորը ու համապարփակ գոտու ստեղծմանը»,-ասել է Խրիստեան «Արևելյան գործընկերության եվրաինտեգրման վարկանիշ-2012» հետազոտության երրորդ փուլի արդյունքների ներկայացման ժամանակ:

Նա ասել է, որ այսօր ԵՄ-ն փորձում է ուղիներ գտնել շարունակելու համար հաջող համագործակցությունը Հայաստանի հետ և հարաբերությունների զարգացման համար Երևանի հետ գործընկերային հիմքեր ստեղծելու համար: Նա հավելել է, որ Եվրամիությունը կշարունակի աջակցել ՀՀ քաղաքացիական հանրությանը:

«Հաշվի առնելով Մաքսային միությանն անդամակցելու Հայաստանի որոշումը՝ քաղաքացիական հանրության հետ մեր հարաբերություններն ավելի են կարևորվում»,-հավելել է նա, հայտնում է «Նովոստի-Արմենիան»:

Իր հերթին, ինչպես հայտնում է ԱՌԿԱ-ն, Հայաստան-ԵՄ համագործակցության կոմիտեի նիստից առաջ տեղի ունեցած ճեպազրույցում ՀՀ էկոնոմիկայի նախարար Վահրամ Ավանեսյանը հայտարարել է, որ Հայաստանն ու ԵՄ-ն մտադիր են համատեղ փաստաթուղթ ստորագրել նոյեմբերին Վիլնյուսում:

«Այս պահին քննարկվում է համագործակցության արդյունավետ օրակարգը: Մենք հուսով ենք, որ մինչ Վիլնյուսի գագաթաժողովը մենք կունենանք փաստաթուղթ, որով կսահմանվեն Եվրամիության հետ Հայատանի համագործակցության հետագա շրջանակները»,-ասել է նա: Նախարարը հայտնել է, որ կոմիտեի նիստում քննարկվելու են երկկողմ հարաբերությունների հեռանկարները Մաքսային միությանը Հայաստանի անդամակցության լույսի ներքո:

Ավանեսյանը նշել է, որ Հայաստանի ու ԵՄ հարաբերությունները նախկինի պես բարձր մակարդակի վրա են:

«Նիստի շրջանակում կքննարկվի հարցերի լայն շրջանակ, կապված երկկողմ հարաբերությունների խորացման ու ընդլայնման հետ: Մասնավորապես, կքննարկվեն առևտրատնտեսական հարաբերությունների զարգացման հեռանկարները, կքննարկվեն մի շարք քաղաքական հարցեր»,-ասել է նա:

Վիլնյուսում նախատեսվում էր ԵՄ և Հայաստանի միջև Ասոցացման համաձայնագրի նախաստորագրում, սակայն սեպտեմբերի 3-ին Ռուսաստանի նախագահ Վլադիմիր Պուտինի հետ հանդիպման ավարտին Հայաստանի նախագահ Սերժ Սարգսյանը հայտարարեց Մաքսային միությանը միանալու և հետագայում Եվրասիական միության ձևավորմանը մասնակցելու Հայաստանի մտադրության մասին: Հայաստանի այս որոշումը քննադատության ենթարկվեց եվրոպական կառույցների ու փորձագիտական շրջանակների կողմից, որոնք հայտարարեցին, որ Հայաստանը գործնականում խզեց բանակցությունները Եվրոպայի հետ, ինչն անհնար է դարձնում ԵՄ հետ Ասոցացման համաձայնագրի նախաստորագրումը այս տարվա նոյեմբերին Վիլնյուսում՝ ԵՄ և Արևելյան գործընկերության ղեկավարների գագաթաժողովում: Այնուհետև Եվրահանձնաժողովը հանդես եկավ հայտարարությամբ, համաձայն որի Ասոցացման մասին համաձայնագիրը և Խորը ու համապարփակ ազատ առևտրի համաձայնագիրը (DCFTA) կարող են համատեղելի լինել ԱՊՀ անդամ երկրների հետ տնտեսական համագործակցության հետ:

Մինչդեռ, ՀՀ ղեկավարները հայտարարում են, որ ՄՄ-ին միանալու մտադրության մասին որոշումը չի անդրադառնա Հայաստանի եվրաինտեգրման գործընթացի վրա և Ասոցացման մասին համաձայնագիրը կնախաստորագրվի Վիլնյուսում:

Ելույթ ունենալով ԵԽԽՎ աշնանային նստաշրջանում, հոկտեմբերի 2-ին Հայաստանի նախագահ Սերժ Սարգսյանը հայտարարեց, որ Հայաստանը կմասնակցի Վիլնյուսի գագաթաժողովին և պատրաստ է ստորագրել Ասոցացման համաձայնագիրը ԵՄ հետ: Իր հերթին ԵՄ ընդլայնման հարցերով հանձնակատար Շտեֆան Ֆյուլեի մամլո քարտուղար Փիթեր Ստանոն հայտարարեց, որ ՀՀ և ԵՄ միջև ստորագրման համար ոչ մի փաստաթուղթ չի պատրաստվում: «Մենք փորձում ենք Հայաստանի հետ հետագա համագործակցության ուղիներ գտնել` հիմնվելով առկա նվաճումների վրա»,-ասել է Ստանոն:

Հղումներ թեմայով.
«Արևելյան գործընկերություն»

«Արևելյան գործընկերություն» ծրագիրը ներկայացվել է Լեհաստանի ԱԳՆ-ի կողմից Շվեդիայի մասնակցությամբ 2008 թ-ի մայիսի 26-ին Արտաքին հարաբերությունների խորհրդին: 2009 թ-ի մայիսի 7-ին Պրահայում (այն ժամանակ Պրահան նախագահում էր ԵՄ-ում) «Արևելյան համագործակցություն» ծրագրի շրջանակներում տեղի ունեցավ հիմնադիր հանդիպում: Այդ նախագծի գլխավոր նպատակը ԵՄ-ի մերձեցումն է նախկին ԽՍՀՄ երկրների` Հայաստանի, Մոլդովայի, Բելառուսի, Ուկրաինայի, Ադրբեջանի, Վրաստանի հետ:

Մաքսային միություն

Մաքսային միությունն իր աշխատանքը սկսել է 2010 թվականին: Սկզբում միությանն անդամկցում էին Ռուսաստանը, Բելառուսն ու Ղազախստանը: Հետագայում միությանն անդամակցելու մտադրության մասին հայտարարեցին նաև Ղրղզստանն ու Տաջիկստանը:

2013-ի սեպտեմբերի 3-ին Մոսկվայում Ռուսաստանի նախագահ Վլադիմիր Պուտինի հետ հանդիպման ավարտին Հայաստանի նախագահ Սերժ Սարգսյանը հայտարարել է Մաքսային միությանը միանալու և հետագայում ԵվրաԱզԷՍ-ի ձևավորմանը մասնակցելու ՀՀ ցանկության մասին: Ռուսաստանի նախագահ Վլադիմիր Պուտինը հավանություն է տվել նախաձեռնությանը՝ պատրաստակամություն հայտնելով աջակցել այդ գործընթացին: Պուտինը հավելել է, որ ՌԵՈւ-ն կարող է մոտ 15 մլրդ ռուբլի ներդնել Հայաստանի երկաթուղային ցանցի զարգացման մեջ:

Պաշտոնական ձևակերպման համաձայն, Մաքսային միությունը Բելառուսի, Ղազախստանի ու Ռուսաստանի առևտրատնտեսական ինտեգրման ձև է․ այն միասնական մաքսային տարածք է նախատեսում, որի սահմաններում փոխադարձ առևտրի դեպքում մաքսային տուրքեր ու տնտեսական բնույթի սահմանափակումներ չեն կիրառվում, բացառությամբ միայն հատուկ պաշտպանիչ, հակադեմպինգային ու հատուցման միջոցների: Ընդ որում մասնակից երկրներն օգտվում են միասնական մաքսային սակագնից և առևտրի կանոնակարգման միասնական միջոցներից երրորդ երկրների հետ: Մաքսային միության միասնական մաքսային տարածքը կազմում են Բելառուսի, Ղազախստանի ու Ռուսաստանի տարածքները, ինչպես նաև այդ պետությունների տարածքներից դուրս գտնվող արհեստական կղզիներ, շինություններ, սարքեր ու այլ օբյեկտներ, որոնց հանդեպ ՄՄ անդամ պետությունները բացառիկ իրավատիրություն ունեն:

 Ուշագրավ
Վարչապետը հանդիպել է Պաշտպանության նախարարության և Զինված ուժերի ղեկավար կազմի հետ
Նալբանդյանն ավելի վաղ համաձայնել էր տեսակապով զրուցելուն
Ըստ ԼՀԿ-ի՝ միջադեպը և դրան հաջորդած մեկնաբանությունները վկայում են կառավարող թիմի անհանդուրժողականության մասին
«Իմ քայլը» խմբակցության ղեկավարն իրենց անունից ներողություն է խնդրել միջադեպի համար