15  Զվարթնոց. Հին համալիրը

«Զվարթնոցի» հին շենքի ճակատագիրը դեռ չի որոշվել. Քանդելու հարցը կրկին կքննարկվի

«Զվարթնոցի» հին շենքի ճակատագիրը դեռ չի որոշվել. Քանդելու հարցը կրկին կքննարկվի

PanARMENIAN.Net - «Զվարթնոց» օդանավակայանի կոնցեսիոները` «Արմենիա-Միջազգային օդանավակայաններ» ընկերությունը, կրկին կուսումնասիրի օդանավակայանի հին մասնաշենքի վերաբերյալ հնարավոր լուծումներն ու արդյունքների մասին տեղյակ կպահի Հայաստանի քաղավիացիայի գլխավոր վարչությանը: Այս մասին հունվարի 23-ի՝ Հանրային խորհրդի նախագահ Վազգեն Մանուկյանին ուղղած պաշտոնական գրությունում տեղեկացրել է վարչության պետ Արտյոմ Մովսեսյանը: Վերջինս հիշեցրել է, որ Կառավարության դեկտեմբերի 26-ի նիստին առաջարկ էր եղել դիմել կոնցեսիոներին՝ ևս մեկ անգամ օդանավակայանի հին մասնաշենքի քանդման վերաբերյալ հարցը քննարկելու նպատակով, տեղեկացնում են ՀԽ մամուլի ծառայությունից:

Ըստ հաղորդագրության, խորհուրդը ուշադրությամբ հետևելու և իր հերթին քննարկելու է կոնցեսիոների կողմից առաջարկվող հնարավոր լուծումները՝ շենքի վերաբերյալ ՀԽ դիրքորոշման համատեքստում:

Իմիջիայլոց, ընդամենը մի քանի օր առաջ՝ հունվարի 21-ին, լրագրողների հետ հանդիպմանը Մովսեսյանն ասել էր, որ Կառավարությունը հավանություն տվել է «Զվարթնոցի» քանդման համար: Երկու օր անց՝ հունվարի 23-ին Ճարտարապետների միության նախագահ Մկրտիչ Մինասյանը մամուլի ասուլիսում ասել էր, որ շենքի քանդման վերաբերյալ Կառավարության որոշում չկա, առաջարկվել է քննարկել հարցն ու դիտարկել ռեսուրսները, իսկ քննարկումները դեռ ընթացքի մեջ են:

«Մեր կողմից էլ առաջարկ է եղել, որ մրցույթ հայտարարվի, թե ինչպես կարելի է շահագործել օդանավակայանի շենքը»,- նշել էր Մինասյանը՝ հավելելով, որ անհրաժեշտ է գտնել օդանավակայանը պահպանելու ճիշտ տարբերակ: «Եթե մոտենանք միայն սկզբունքով, որ պահպանման համար մեծ խնդիրներ կան ու` քանդել շենքը... անթույլատրելի է: Նման տարրական թվաբանությունով երբեք չի կարելի առաջնորդվել, արժեքավոր կառույցի մասին ենք խոսում»,- նշել էր նա, գրում է Panorama.am-ը:

Իսկ անդրադառնալով ՔԱԳՎ պետի վերոնշյալ հայտարարությանը, Մինասյանը նշել էր, թե «հնարավոր է՝ նա նման ցանկություն ունենա, բայց դա իրենից չի կախված» ու կարող է լինել միայն կառավարության որոշմամբ: Մինասյանի խոսքով, քննարկվում էր, որ քանդեն շենքն ու այնտեղ ճարտարապետական նմուշների մանրակերտներ դրվեն: Ճարտարապետը նկատել է, որ նման նախագիծ առհասարակ չկա և ընդամենն առաջարկ է: «Ստացվում է՝ մեր քաղաքի տարածքում եղած այգիները բզկտում ենք, հետո այգի ունենալու համար քանդում օդանավակայանի շենքը, որ այնտեղ այգի ունենանք: Տրամաբանությունից դուրս է: Բացի այս, նման նախագիծը բավականին թանկ և արդեն կայացած պետությունների համար է»,- ասել է նա:

ՀՀ վարչապետ Տիգրան Սարգսյանը դեկտեմբերի 26-ի նիստում առաջարկել էր այգի ստեղծել և այնտեղ տեղակայել ճարտարապետական հուշարձանները՝ այդպիսով լուծելով մշակութային պահպանման խնդիրներ:Իր հերթին, այգին կդառնա ժամանցի վայր, որտեղ կլինի նաև հին շենքի մակետը:

Նոյեմբերի 11-ին Հանրային խորհուրդը (ՀԽ) քննարկման էր դրել «Զվարթնոց» օդանավակայանի հին (կլոր) մասնաշենքի հետագա ճակատագրի հարցը: Հին շենքը քանդելուն դեմ էր քվեարկել խորհրդի 20 անդամ, 2-ը՝ կողմ:

Առաջարկվում էր դիմել շահագործողին` խնդրելով հաշվարկներով ներկայացնել հետագա գործողությունների ծրագիրը, ուսումնասիրել հին մասնաշենքի շահագործման հնարավորությունը, ինչպես նաև քննարկել շենքը մշակութային հուշարձանների ցանկում ընդգրկելու հարցը:

Հայաստանի քաղավիացիայի գլխավոր վարչությունը վերջերս դիմել էր Հանրային խորհուրդ` տեղեկացնելով, որ ՀՀ կառավարությունն ու «Զվարթնոց» օդանավակայանի կառավարիչ «Արմենիա միջազգային օդանավակայաններ» ՓԲԸ-ն քննարկում են օդանավակայանի առաջիկա 5 տարիների զարգացման խնդիրները, որի շրջանակներում անհրաժեշտություն է առաջացել վերջնական գնահատական տալու հին ուղևորային համալիրի հետագա պահպանման կամ քանդման խնդրին: Հանրային խորհուրդը, հաշվի առնելով հանձնաժողովնրում տեղի ունեցած քննարկումներն ու հանրայի կարծիքը, դեմ էր արտահայտվել «Զվարթնոցի» հին շենքը քանդելու առաջարկին:

Քննարկմանը օդանավակայանի հին մասնաշենքի համահեղինակ Արթուր Թարխանյանի դուստրը՝ ճարտարապետ Անահիտ Թարխանյանը հայտարարել էր, որ ընկերության պատճառաբանությունը, թե շենքը վթարային է, իրականությանը չի համապատասխանում:

Ճարտարապետի համար անհասկանալի պատճառներով շենքը ժամանակին հուշարձանների ցանկից հանվել էր, իսկ այն վարձակալած «Կորպորացիոն Ամերիկան» խախտել էր պայմանագիրը, որը կնքվել էր 2001-ին, ուստի դրա իրական սեփականատերը՝ ՀՀ կառավարությունը, պետք է կազմակերպության ձեռքից վերցնի այն և տա այնպիսի ընկերության, որն ընդունակ է շահագործելու՝ պահպանելով այն: Շահագործողը հայտարարություն էր արել, թե հին համալիրի պահպանումն որպես խնդիր իրենց առջև դրված չի եղել և այժմ, երբ առաջացել է օդանավակայանի ընդլայնման հարցը, կոնցեսիոները նպատակահարմար է գտնում ընդլայնել այն հենց դրա հաշվին:

Շահագործողը որպես հիմնավորում նշել էր նաև այն, որ հին համալիրը հնարավոր չէ օգտագործել ներկայիս ավիացիոն պահանջների համար: Հայաստանի քաղավիացիայի գլխավոր վարչությունը վերջերս դիմել էր Հանրային խորհուրդ` տեղեկացնելով, որ ՀՀ կառավարությունն ու «Զվարթնոց» օդանավակայանի կառավարիչ «Արմենիա միջազգային օդանավակայաններ» ՓԲԸ-ն քննարկում են օդանավակայանի առաջիկա 5 տարիների զարգացման խնդիրները, որի շրջանակներում անհրաժեշտություն է առաջացել վերջնական գնահատական տալու հին ուղևորային համալիրի հետագա պահպանման կամ քանդման խնդրին: Սեպտեմբերի 26-ին կայացած քննարկմանը Քաղավիացիայի գլխավոր վարչության ներկայացուցիչը Հանրային խորհրդին խոստացել էր, որ հաշվի կառնեն խորհրդի կարծիքը:

1961-ին բացված «Զվարթնոց» միջազգային օդանավակայանի մոդեռնիստական ոճի հին շենքը շահագործման էր հանձնվել 1980-ին ճարտարապետներ` Արթուր Թարխանյանի, Սպարտակ Խաչիկյանի, Լևոն Չերքեզյանի, Ժ. Շեխլյանի և կոնստրուկտոր` Ս. Բաղդասարյանի նախագծով և համարվում էր ԽՍՀՄ մոդեռնիստական ճարտարապետության նմուշներից մեկը:

 Ուշագրավ
Մինչև 5 տարեկան երեխաների շրջանում պնևմակոկային վարակի պատճառով Հայաստանում կարող է արձանագրվել տարեկան առնվազն 20-200 մահվան դեպք
Հայաստանում ամուսնալուծությունների ցուցանիշի աճի մասին վարչապետ Հովիկ Աբրահամյանի բարձրաձայնած խնդիրը սոցցանցերում քննարկման առարկա դարձավ
Իր իսկ հարցին, թե ինչու մինչև հիմա ցուցմունք չէր տալիս, դերասանը պատասխանել է՝ մի քանի պատճառ կար
Երևանի մզկիթում նամազ անելու որևէ պաշտոնական նամակ կամ տեղեկություն Թուրքիայից չեն ստացել