Կասպրշիկը չցանկացավ նշել շփման գծում սադրանքների իրական մեղավորին 3 փետրվարի 2014 - 16:24 AMT PanARMENIAN.Net - Մտահոգություն են առաջացնում հրադադարի խախտումներն ու կորուստները հայկական և ադրբեջանական զորքերի շփման գծում և սահմանին: Այդ մասին ասել է ԵԱՀԿ գործող նախագահի անձնական ներկայացուցիչ Անջեյ Կասպրշիկը, հայտնում է «Թրենդ» գործակալությունը: Ըստ նրա, յուրաքանչյուր կորուստ ողբերգություն է, որը կարելի է կանխել՝ պահպանելով հրադադարի ռեժիմը: «Ցավոք, վերջին շաբաթներին իրավիճակն էլ ավելի սրվեց և հետագա սրացման ռիսկը թերագնահատվում է»,-ասել է նա: Կասպրշիկը նշել է, որ լարվածության աճի վկան է եղել շփման գծում դիտարկման ժամանակ: «Չնայած, որ երկու կողմերի հրամանատարները երաշխավորում էին, որ հրադադարի ռեժիմը չի խախտվի և խմբի այցելությունն անվտանգ կլինի, կրակ բացվեց»,-ասել է նա: Հրադադարի պահպանման պատասխանատվությունը կրում են «երկու կողմերը», ասել է ԵԱՀԿ գործող նախագահի անձնական ներկայացուցիչը: «ԵԱՀԿ ՄԽ համանախագահները Փարիզում կոչ են արել կողմերին անվերապահորեն պահպանել հրադադարի պայմանները: Համանախագահները նշեցին, որ վերջին շրջանի իրադարձությունները վնասում են բանակցություններին ու նվազեցնում են խաղաղ կարգավորման հեռանկարները: Վերջերս համանախագահ երկրների ԱԳՆ ներկայացուցիչները հանդես եկան հայտարարությամբ՝ կոչ անելով կողմերին լիովին պահպանել հրադադարի ռեժիմը: Հրադադարի ռեժիմի ամրապնդման վերաբերյալ բանակցությունները շարունակվում են և այդ հարցը քննարկման թեմա կհանդիսանա համանախագահների տարածաշրջանային այցի ժամանակ»,-ասել է Կասպրշիկը: Նա նշել է, որ ԵԱՀԿ գործող նախագահ, Շվեյցարիայի ԱԳ նախարար Դիդիե Բուրկհալթերը նույնպես մտահոգություն է հայտնել զինվորականների ու քաղաքացիական անձանց մահվան ու վիրավորվելու կապակցությամբ: «Բուրկհալթերը կոչ է արել կողմերին օգտագործել արժեքավոր հնարավորությունները, որ ընձեռում են ԵԱՀԿ համանախագահների այցերը սահման ու շփման գիծ, միմյանց հետ անմիջական շփման համար՝ նվազեցնելով լարվածությունը»,-ասել է նա: Անդրադառնալով Ադրբեջանի ու Հայաստանի ԱԳՆ ղեկավարների փարիզյան հանդիպմանը՝ Կասպրշիկը նշել է, որ նախարարներն ու համանախագահները քննարկումներ են ունեցել խաղաղ գործընթացն առաջ տանելու շուրջ: «Նախարարները ևս մեկ անգամ նշեցին, որ ցանկանում են աշխատել խաղաղ կարգավորման հասնելու համար: Համանախագահները կշարունակեն համագործակցությունն այդ ուղղությամբ հաջորդ այցի ժամանակ»,-ասել է նա: Ինչպես և ակնկալվում էր, Անջեյ Կասպրշիկը այդպես էլ չանվանեց շփման գծում լարվածության իրական մեղավորին: Արդեն մոտ 10 օր է թե հայ-ադրբեջանական սահմանի, թե ղարաբաղա-ադրբեջանական շփման գծի երկայնքով հակառակորդն ակտիվ խախտում է հրադադարը: Հունվարի 19-ի լույս 20-ի գիշերը ղարաբաղա-ադրբեջանական հակամարտ զորքերի շփման գծի հյուսիսարևելյան (Ջրաբերդ) և հարավարևելյան (Կորգան) ուղղություններում հակառակորդը դիվերսիոն խմբերի ներթափանցման միաժամանակյա փորձեր էր արել, բռնկված փոխհրաձգության արդյունքում հակառակորդի կողմից ստացած հրազենային վիրավորումից զոհվել էր կրտսեր սերժանտ Արմեն Հովհաննիսյանը:Ավելի ուշ նախագահ Բակո Սահակյանը հրամանագիր էր ստորագրել, համաձայն որի կրտսեր սերժանտ Արմեն Հովհաննիսյանին հետմահու պարգևատրվել էր «Արիության համար» մեդալով: Հունվարի 23-ի լույս 24-ի գիշերն ինտենսիվ կրակել են նաև Տավուշի սահմանամերձ մի շարք գյուղերի՝ Ներքին Կարմիրաղբյուրի, Այգեպարի, Մովսեսի ու Չինարիի ուղղությամբ: Պառավաքարի գումարտակի հրամանատար Դավիթ Անիկյանի 16-ամյա դուստրը` Լիանան, վիրավորվել է Այգեպարի իրենց տանը նստած ոտքին ստացած հրազենային կրակոցից, աղջկան տեղափոխել են Բերդի հոսպիտալ, որտեղ վիրահատել են, վիճակը կայուն է: Արդեն հունվարի 28-ին հյուսիսային ուղղությամբ տեղակայված զորամասերից մեկի պահպանության տեղամասի մարտական դիրքում հակառակորդի դիպուկահարի կողմից արձակված գնդակից զոհվեց զինծառայող Կարեն Գալստյանը: Ավելի ուշ ԼՂՀ նախագահ Բակո Սահակյանի հրամանագրով զինծառայոդղը հետմահու պարգևատրվեց «Մարտական ծառայություն» մեդալով: Ըստ ԼՂՀ ՊԲ մամուլի հաղորդագրության, ընդհանուր առմամբ, շաբաթվա ընթացքում հակառակորդի կողմից հրադադարի պահպանման ռեժիմը խախտվել է մոտ 1700 անգամ. տարբեր տրամաչափի հրաձգային զենքերից հայ դիրքապահների ուղղությամբ արձակվել է ավելի քան 10 000 կրակոց: Նյութեր թեմայով. Ղարաբաղա-ադրբեջանական հակամարտությունը Ղարաբաղա-ադրբեջանական հակամարտությունը սկսվեց 1988 թվականին: Ի պատասխան Լեռնային Ղարաբաղի ինքնավար մարզի (ԼՂԻՄ) բնակչության 80% կազմող հայերի խաղաղ պահանջներին, Ադրբեջանը ագրեսիա ծավալեց խաղաղ բնակչության դեմ: 1991-1994թթ. ազգային-ազատագրական պատերազմի արդյունքում հռչակվեց Լեռնային Ղարաբաղի Հանրապետությունը: ԼՂՀ պաշտպանության բանակը նաեւ ԼՂՀ շուրջ անվտանգության գոտի ստեղծեց, որը 7 շրջաններ է ներառում: 1994թ. մայիսի 11-ին հրադադարի մասին համաձայնություն ձեռք բերվեց (Բիշկեկյան արձանագրություն): Ներկայումս հակամարտության կարգավորմամբ զբաղվում են ԵԱՀԿ Մինսկի խմբի համանախագահները` Ֆրանսիան, ԱՄՆ-ն եւ Ռուսաստանը: Ուշագրավ Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը
«Կշարունակենք այն վնասի հատուցման ուղիների քննարկումը, որը հասցնում է այդ աննախադեպ ճնշումը»,–ասել է նա ՀՀ և Ադրբեջանի միջև խաղաղ բանակցություններին և կարգավորմանը վերաբերող հարցերը չեն քննարկվելու «Այն անպայման կցուցադրվի, սակայն պարզ չէ, թե երբ»,–ասել է Սեիդովը Ամենաընթերցվողը բաժնում | ՔՊ պատգամավորի հետ միջադեպի գործով ձերբակալված Վարդանյանը տնյաին կալանքի տակ կլինի Նրա նկատմամբ որոշվել է կիրառել նաև 7 միլիոն դրամ գրավ Մինչև 1% cashback Wildberries-ում` IDBank-ի քարտով վճարելիս Մեկ ամսվա ընթացքում առավելագույն քեշբեքի սահմանաչափը 5 000 դրամ է Հայաստանը Տաթևի և Տաթևի մեծ անապատ համալիրները Հաագայի կոնվենցիայով ուժեղացված պաշտպանության տակ առնելու հայտ կներկայացնի Նախապատրաստական աշխատանքներ են ընթանում «Ազատություն»․ՀՀ–ն, ըստ նախնական համաձայնության, առաջին անգամ օգնություն կստանա ԵՄ Խաղաղության հիմնադրամից Գումարը, ըստ փաստաթղթի, պետք է տրամադրվի մեկ գումարտակի համար նախատեսված դաշտային մոդուլային ճամբար ստեղծելու համար |