ՊՆ. ՀԱՊԿ անդամ երկրները պարտավոր են աջակցել Հայաստանին, թե իրականում ինչպես կստացվի՝ ընթացքում կերևա

PanARMENIAN.Net - Փետրվարի 4-ին Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Նիկոլայ Բորդյուժան Հայաստանի Ազգային անվտանգության խորհրդի նախագահ Արթուր Բաղդասարյանի հրավերով աշխատանքային այցով ժամանել էր Երևան: Երեկոյան նա արդեն հասցրել էր հանդիպել ՀՀ նախագահին ու պաշտպանության նախարարին:

Նախարար Սեյրան Օհանյանի ու Բորդյուժայի հանդիպմանը մասնակցել էր նաև ՀԱՊԿ-ի միացյալ շտաբի պետ Ալեքսանդր Ստուդենիկինը, ինչպես նաև ՀՀ ԶՈՒ գլխավոր շտաբի պետ Յուրի Խաչատուրովը և նախարարի առաջին տեղակալ Դավիթ Տոնոյանը: Բանակցությունների ընթացքում քննարկվել էին ՀԱՊԿ-ի ռազմական բաղադրիչի զարգացման ոլորտի ընթացիկ և հեռանկարային հարցերը, հայտնում են ՊՆ մամուլի ծառայությունից:

Ավելի ուշ Նիկոլայ Բորդյուժային ու Ալեքսանդր Ստուդենիկինին ընդունել էր նախագահ Սերժ Սարգսյանը: Հանդիպմանը զրուցակիցները քննարկել էին ՀԱՊԿ շրջանակում գործակցությանը վերաբերող հարցեր, այդ թվում՝ ՀԱՊԿ ռազմական բաղադրիչի զարգացման, 2013-ի սեպտեմբերի 23-ին Սոչիում կայացած ՀԱՊԿ Հավաքական անվտանգության խորհրդի նստաշրջանում ընդունված ՀԱՊԿ անդամ-պետությունների ռազմական գործակցության հիմնական ուղղությունների զարգացման ծրագրի իրականացման ընթացքի, ՀԱՊԿ միացյալ շտաբի ընթացիկ գործունեության կատարելագործման, ինչպես նաև Կազմակերպության Հավաքական անվտանգության կովկասյան տարածաշրջանում անվտանգության ապահովման հետ կապված հարցեր, տեղեկացնում են նախագահի աշխատակազմի մամուլի ծառայությունից:

Այսօր՝ փետրվարի 5-ին, «Հայոց արծիվներ» ՀԿ-ի ներկայացուցիչների հետ հանդիպմանը մասնակիցներից մեկի խնդրանքով պաշտպանության գերատեսչության ղեկավարն անդրադարձել է հարցին, թե արդյո՞ք Ադրբեջանի՝ Հայաստանի դեմ պատերազմ հայտարարելու դեպքում ՀԱՊԿ անդամ բոլոր պետությունները կօգնեն մեր երկրին՝ հաշվի առնելով, որ ՀԱՊԿ անդամների շարքում կան նաև թուրքալեզու երկրներ:

Նախարարը նշել է, որ Հայաստանը հիմնադիր պետություններից մեկն է ու այսօր լուրջ աշխատանքներ են տարվում ՀԱՊԿ ռազմաքաղաքական զարգացման, հատկապես՝ ռազմական բաղադրիչի կատարելագործման ուղղությամբ, գրում է Tert.am-ը:

«Տարբեր միջոցառումներին մեր մասնակցությամբ համապատասխան պարտադրման դաշտ ենք ստեղծում, որ եթե վաղը Հայաստանին աջակցելու անհրաժեշտություն լինի, ապա ՀԱՊԿ մյուս պետությունները գոյություն ունեցող կանոնադրությամբ պետք է գան և աջակցեն Հայաստանին: Նրանք պարտավոր են անել դա: Իրականում ինչպես կստացվի, ինչ դերակատարություն կունենան, հատկապես՝ միջինասիական պետությունները, դա արդեն ընթացքում կերևա»,- ասել է Սեյրան Օհանյանը՝ հավելելով, որ այսօրվա կանոնադրությունն ու միջոցառումները, հատկապես՝ զորավարժությունների մասնակցությունը, որոշակի վստահություն է ներշնչում, որ նրանք պարտավոր են այդ ամենն իրականացնել:

Վերջերս տարբեր շրջանակներում խոսվում էր, որ ՀԱՊԿ-ը ոչ մի կերպ չի արձագանքում հայ-ադրբեջանական սահմանին ու ղարաբաղա-ադրբեջանականշփման գծում հակառակորդի կողմից ակտիվությանը, այն դեպքում, երբ Հայաստանը կազմակերպության անդամ է:

Նա նաև ասել խոստացել էր Բորդյուժայի Հայաստան այցի ընթացքում մեկ անգամ ևս խոսել լարվածության մասին. «Ադրբեջանը նախահարձակ է լինում ու օգտագործում իր դիպուկահարներին, բայց հաջորդ օրը պաշտոնական հաղորդագրություն է տարածում, թե հայկական կողմից եղել է դիվերսիոն հարձակում, ինչն էլ հերքվում է մեր կողմից: Այսինքն` նախահարձակ է լինում ու գցում դիմացինի վրա»,- ասել էր նա: