Վարչապետ. Կուտակայինը պատասխանատու քաղաքացի ձևավորելու ռեֆորմ է 21 փետրվարի 2014 - 15:12 AMT PanARMENIAN.Net - Պարտադիր կուտակային կենսաթոշակային համակարգի դեմ քաղաքացիների ու կառավարության միջև պայքարը աստիճանաբար թեժանում է: Փետրվարի 21-ին «Դեմ եմ» քաղաքացիական նախաձեռնության անդամներից մեկն անգամ հաջողել է խանգարել «Կենսաթոշակային երրորդ տարեկան միջազգային համաժողովի» ընթացքը: Երիտասարդը ելույթներից մեկի ժամանակ ասել է, որ հասարակությունը դեմ է «Կուտակային կենսաթոշակների մասին» օրենքին, սակայն ժողովրդի կարծիքը հաշվի չի առնվում, տեղեկացնում է «Այսօր»-ը: Ըստ պարբերականի, չթողնելով ավարտել խոսքը` տեղեկատվական համակարգի մասնագետ ներկայացած Անդրանիկը քաղաքացուն բռնությամբ դուրս է հանել դահլիճից` միջանցքում հայտարարելով, որ ակտիվիստներն ու լրագրողներն իրենց պահվածքով խանգարում են համաժողովի ընթացքը: Համաժողովին, որին ներկա էր նաև վարչապետ Տիգրան Սարգսյանը, այնուհետև դրոշներով միացել էին «Դեմ եմ»-ի անդամները` խնդրելով պատասխանել իրենց մտահոգող մի շարք հարցերի: Սակայն, կազմակերպիչները նրանց ևս դուրս են հանել դահլիճից, այդպես էլ չթույլատրելով ներս մտնել: Մինչ ակտիիստները բողոքում էին, համաժողովը շարունակում էր ընթացքը` փորձելով բացատրել Կուտակային համակարգի կարևորությունը: Ըստ վարչապետ Տիգրան Սարգսյանի` Հայաստանում գործող կենսաթոշակային արդեն հին համակարգի հիմնական և լրջագույն թերությունն այն էր, որ քաղաքացին չի կարող հստակ իմանալ, թե պետությունն իր թոշակի անցնելու ժամանակ ֆինանսական ինչ վիճակում կլինի: «Մեր համակարգի տրամաբանությունը հետևյալն է՝ ցանկացած աշխատող քաղաքացի կրում է պատասխանատվություն իր ծերության համար»,- ասել է նա՝ հավելելով, որ չկա աշխարհում որևէ երկիր, որտեղ նման համակարգի ներդրումը բողոքի պատճառ չդառնա: Վարչապետը նշել է, որ կուտակայինը պատասխանատու քաղաքացի ձևավորելու ռեֆորմ է, որը հեշտ չէ. «Հասկանալի է, որ սա աշխարհի ամենաբարդ ռեֆորմն է: Այո՛, երկրում կան խնդիրներ, բայց շտկելու ճանապարհը ռեֆորմներն են»: 2014-ի հունվարի 1-ից Հայաստանն անցել է պարտադիր կուտակային համակարգի, որը վերաբերում է 1973-ի դեկտեմբերի 31-ից հետո ծնվածներին, որոնք աշխատում են և գրանցված են աշխատավայրում: Մինչև 500 հազար դրամ աշխատավարձ ստացողները վճարումներ կկատարեն իրենց աշխատավարձի 5%-ի չափով, ևս 5% այդ աշխատողների անհատական հաշվին կփոխանցի պետությունը։ 500 հազար դրամից ավելի աշխատավարձ ստացողի անհատական կուտակային ֆոնդին պետությունը 25 հազար դրամից ավելի չի վճարի: Համաժողովին կենսաթոշակային նոր համակարգը դրական է գնահատել նաև Հայաստանում ԱՄՆ դեսպան Ջոն Հեֆերնը` չհերքելով, որ «թոշակային բարեփոխումը խնդրահարույց է»: Ըստ դեսպանի, փոփոխությունը դժվար է ընդունվում, քանի որ Խորհրդային Միության փլուզման հետևանքով շատ հայաստանցիներ կորցրել են իրենց խնայողությունն ու հիշողությունները դեռ թարմ են: «Դեռ ավելին, գոյություն ունի վստահության պակաս կառավարության, հայաստանյան հաստատությունների և քաղաքացիների միջև,- հավելել է Հեֆերնը: - Կառավարությունը պետք է աշխատի այս բացը լրացնելու ուղղությամբ՝ լրջորեն ներգրավելով քաղաքացիներին, շտկելով բոլոր թյուրըմբռնումներն ու լսելով և արձագանքելով վերջիններս մտահոգություններին»: «Հավատացած ենք, որ նոր կենսաթոշակային համակարգը մշակված է՝ պաշտպանելու ապագա կենսաթոշակառուների շահերը»,- ասել է դեսպանը` կարևորելով նաև, որ կենսաթոշակային հիմնադրամները կառավարելու են ակտիվների կառավարման մասնավոր ընկերություններ, որոնք միջազգային համբավ և հաջող գործունեության երկար պատմություն ունեն. մեկը՝ ֆրանսիական, մյուսը՝ գերմանական / ավստրիական: Փետրվարի 21-ին կուտակայինի հետ կապված անհանգստություններից մեկն էլ փորձել է փարատել ԱԺ ՀՀԿ խմբակցության անդամ Գագիկ Մինասյանը` պատասխանելով, թե ի՞նչ տեղի կունենա կուտակված գումարների հետ, եթե Հայաստանում արժույթը փոխվի: «Իսկ եթե ինչ-ինչ պատճառներով փոխի դառնա, օրինակ՝ եվրո, դոլար, ռուբլի, որևէ բան տեղի չի ունենա, ինչպես տեղի չունեցավ Էստոնական ֆոնդերի հետ, երբ կրոնը փոխվեց եվրոյով»,- ըստ Panorama.am-ի` ասել է Մինասյանը: Համաժողովից մի քանի օր առաջ` փետրվարի 18-ին, ֆինանսների նախարարությունն ու Պետական եկամուտների կոմիտեն հայտարարել էին, որ ««Կուտակային կենսաթոշակների մասին» օրենքի 8-րդ հոդվածի 1-ին մասի համաձայն՝ գործատուները, որպես հարկային գործակալ, կրում են կուտակային վճարները հաշվարկելու և փոխանցելու պարտականություն»: Ըստ հաղորդագրության` հունվար ամսվա վճարման վերջնաժամկետը փետրվարի 19-ն էր։ Ֆինանսների նախարարը նաև պարզաբանել էր, որ օրենքի 8-րդ հոդվածն ու ևս մի քանիսը կասեցված չեն ու որ «գործատուների գրեթե 99 տոկոսն արդեն հաշվարկել է գումարները և պահումներ կատարել իրենց աշխատակիցներից»` զգուշացնելով, որ եթե այդ գումարները չփոխանցեն կենսաթոշակային ֆոնդեր` գործատուները կարող են ենթարկվել կրկնակի պատասխանատվության: ՍԴ-ն «Կուտակային կենսաթոշակների մասին» օրենքի 76-րդ հոդվածի (այն է՝ պատասխանատվությունը պարտադիր կուտակային վճարները չկատարելու կամ ուշացմամբ կատարելու համար) և 86-րդ հոդվածի 3-րդ մասի (այն է՝ ֆոնդի և կառավարչի պարտադիր ընտրություն) գործողության կասեցման որոշում էր կայացրել հունվարի 24-ի իր նիստում: Օրենքի մյուս` 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ գործի քննության ավարտը նախատեսվում է մարտի 28-ին: Փետրվարի 15-ին Կենսաթոշակային կուտակային համակարգին էր անդրադարձել նաև նախագահ Սերժ Սարգսյանը` այն «հասարակության համար կենսական», «կարևորագույն բարեփոխում» անվանելով ու ընգծելով, որ դրա նպատակը «ռազմավարական անորոշությունները» կրճատելն է: Նախագահը իր ելույթում նաև նշել էր, որ բարեփոխմանը չի վստահում բնակչության 80 տոկոսը: Պարտադիր բաղադրիչի ներդրումը մեծ աղմուկ էր առաջացրել հասարակության շրջանում, ստեղծվել էին մի շարք քաղնախաձեռնություններ, որոնք մինչև օրս էլ այդ համակարգին դեմ են արտահայտվում ու շարունակում են բողոքել: Համակարգին դեմ էին նաև խորհրդարանական ոչ իշխանական 4 ուժերը, որոնք դիմել էին ՍԴ՝ պահանջելով հակասահմանադրական ճանաչել օրենքի մի շարք դրույթներ: Փետրվարի 10-19-ը աշխատավարձից կատարված պահումների դեմ բողոքի ակցիաներ էին կազմակերպել «Հարավկովկոսսյան երկաթուղու», «Սպենդիարյանի անվան օպերայի և բալետի ազգային թատրոնի», «Երևանի մետրոպոլիտենի», «Հայաստանի էլեկտրական ցանցերի», «Հայաստանի ատոմային էլկտրակայանի» աշխատակիցները: Պարտադիր կուտակայինի դեմ պայքարի ակտիվ մասնակից «Դեմ եմ» նախաձեռնությունը հերթական` այս անգամ «Լուսավորման երթը», անցկացնելու է փետրվարի 21-ին: Ուշագրավ Ուսումնասիրությունները մեկնարկել են Փաշինյանի հանձնարարությամբ Երասխում պողպատի գործարանի կառուցման համար ընկերությունը ներդրել էր 2 միլիարդ դրամ Ըստ ֆինանսների նախարարության՝ միջպետական վարկի մնացորդն ուղղվելու է բռնի տեղահանված անձանց աջակցությանը Կապահովվի խաղողի մթերումների գործընթացի կազմակերպումը | Հնդկաստանի ԱԳՆ–ն՝ Բաքվին․ Խթանում ենք ռազմարդյունաբերական արտադրանքի արտահանումը Նա նշել է, որ իր երկիրը լավ հարաբերություններ ունի և Ադրբեջանի, և ՀՀ հետ Օվերչուկը՝ ԵԱՏՄ նիստին Փաշինյանի մասնակցության մասին․ Սպասում ենք ԵԱՏՄ հոբելյանական գագաթնաժողովը կայանալու է մայիսի 8–ին Բերման է ենթարկվել անհնազանդության ակցիաների 29 մասնակից, որից 17–ը՝ Երևանում Վեդիում բերման է ենթարկվել Լևոն Քոչարյանը Amnesty International․ Ադրբեջանի կողմից էական առաջընթաց չի գրանցվել ԼՂ հայերի ապահով վերադարձի համար Նշվում է, թե Ադրբեջանի իշխանությունները համաներում էին խոստացել նրանց, ովքեր կռվել են Լեռնային Ղարաբաղի համար |