Forbes. Աշխարհում 6 հայ միլիարդատեր կա

PanARMENIAN.Net - Քըրք Քըրքորյանը, Սամվել Կարապետյանը, Դանիլ Խաչատուրովը, Էդուարդո Էռնեկյանը, Սերգեյ ու Նիկալայ Սարկիսովները Forbes-ի աշխարհի միլիարդատերերի ցուցակում են:

Թեպետ Forbes-ի 2014-ի աշխարհի միլիարդատերերի ցանկում հայտնված հայերից և ոչ մեկ Հայաստանում չի բնակվում, նրանց հայրենակիցները կարող են գլուխները բարձր քայլել` իմանալով, որ միլիարդատերերից յուրաքանչյուրն իր հարստությունը կուտակել է աշխատանքի միջոցով, այլ ոչ թե, օրինակ, ժառանգություն ստացել կամ զարգացրել արդեն եղած բիզնեսը:

Մարտի 3-ին հրապարակված միլիարդատերերի ցուցակում հայերին առաջնորդում է տարիոքվ ամենամեծ Քըրք Քըրքորյանը, որն աշխարհի 328-րդ ամենահարուստ մարդն է` ըստ ֆինանսական առաջատար ամսագրի: 96-ամյա Քըրքորյանը հյուրանոցային մագնատ է ու 4,5 մլրդ դոլար ունի, բնակվում է Ամերիկայի միացյալ նահանգներում: Forbes-ը է նշում, որ 96-ամյա բիզնեսմենը շարունակում է ավելացնել իր միջոցները, որոնք մեկ տարում աճել են 1,2 մլրդ դոլարով:

Քըրքորյանն իր ստեղծած Լինսի հիմնադրամով Հայաստանին ֆինանսապես ամենաշատն աջակցած հայն է: Այդուհանդերձ, այդ օգնությունն այլևս նախկին չափերը չունի, քանի որ միլիարդատերն այն փակել է:

Forbes-ի միլիարդատերերի ցանկում 4,3 մլրդ դոլարով 345-րդ տեղում է ռուսաստանաբնակ հայ գործարար և «Տաշիր» խմբի սեփականատեր 48-ամյա Սամվել Կարապետյանը, ով նաև առաջատար դիրքեր է զբաղեցնում Ռուսաստանի անշարժ գույքի շուկայում: Ծագումով Հայաստանի Տաշիրի տարածաշրջանից գործարարի կարողությունն անցած տարի ավելացել է կես մլրդ դոլարով:

Ամսագրի վարկանիշի հաջորդ` 663-րդ հարուստ հայը` «Ռոսգոսստրախ» ապահովագրական ընկերության համասեփականատեր Դանիլ Խաչատուրովն է, որ 2,6 մլրդ դոլար ունի: 42-ամյա ռուսաստանաբնակ Խաչատուրովը 2013-ին 200 մլն դոլար է վաստակել:

Գործարարի մասին պատմող տեքստում Forbes-ը բարձր է գնահատում խորհրդային ապահովագրական ընկերությունն աշխարհում առաջատարներից մեկը դարձնելու Խաչատուրովի ու գործընկերոջ ջանքերը: «Ռոսգոսստրախն» արդեն մի քանի տարի ակտիվ գործունեություն է ծավալում նաև Հայաստանում:

1,9 մլրդ դոլար կարողությամբ միլիարդատերերի վարկանիշի 931-րդ տեղն է զբաղեցրել Էդուարդո Էռնեկյանը: Արգենտինահայ 81-ամյա գործարարը մեկ տարում 100 մլն դոլարով ավելացրել է իր հարստությունը: Էռնեկյանը բազմաշերտ բիզնես գործունեություն է ծավալում Հայաստանում` Զվարթնոց օդանավակայանի կառավարումից մինչև գինիների արտադրություն և այլն:

Միլիարդատեր հայերից Forbes-ի ցուցակում վերջիններն են «ՌԵՍՈ-Գարանտիա» ապահովագրական խմբի սեփականատեր եղբայրներ, ռուսաստանաբնակ Սերգեյ ու Նիկալոյ Սարկիսովները, որոնցից յուրաքանչյուրը 1,1 մլրդ դոլարով զբաղեցրել են 1465-րդ հորիզոնականը: Նրանք միակ հայերն են, ովքեր 2013-ին անհաջողություններ ե ունեցել բիզնեսում` եղբայներից ամեն մեկն անցած տարի 350 մլն դոլար է կորցրել:

Չորս տարի առաջատարի դիրքը զիջելուց հետո` 2014-ին կրկին աշխարհի առաջին միլիարդատեր է գնահատվել Microsoft ընկերության հիմնադիր Բիլ Գեյթսը: 9 մլրդ դոլարով ավելացնելով իր կարողությունը, Գեյթսը կուտակել է 76 մլրդ դոլար` գրում է «Սիվիլնեթ»-ը: Անցած տարվա վարկանիշի առաջատար, մեքսիկացի հեռահաղորդակցային մագնատ Կառլոս Սլիմն այս տարի հայտնվել է երկրորդ հորիզոնականում` 72 մլրդ դոլար հարստությամբ: Forbes-ի ցուցակի երրորդ պատվավոր միլիարդատերը Inditex (Zara ցանց) ընկերության սեփականատեր Ամանսիո Օրտեգան է` 64 մլրդ կարողությամբ:

Ըստ Forbes-ի` աշխարհում 1 մլրդ դոլար ու ավելի միջոցներ ունեցող 1645 գործարար կա, որոնց ընդհանուր կարողությունը 6,4 տրլն դոլար է` 1 տրլնով ավելի, քան 2013-ին:

2014-ի ցուցակում ռեկորդային են եղել «նորաթուխ» միլիարդատերերը` 226 տղամարդ և 42 կին: