ՎիվաՍել-ՄՏՍ-ը շարունակում է աջակցել աուտիզմով երեխաներին

ՎիվաՍել-ՄՏՍ-ը շարունակում է աջակցել աուտիզմով երեխաներին

PanARMENIAN.Net - Համագործակցության 7 տարվա ընթացքում «Երեխաների զարգացման միջազգային կենտրոն» ՀԿ-ին ուղղված ՎիվաՍել-ՄՏՍ-ի ներդրումների ընդհանուր ծավալը կազմել է ավելի քան 96 մլն դրամ: Կենտրոնը կրթաբուժական ծառայություններ է մատուցում աուտիզմ և ընդհանուր զարգացման այլ խանգարումներ ունեցող երեխաների, ասվում է ընկերության մամլո հաղորդագրության մեջ:

Աուտիզմի իրազեկման միջազգային օրվան ընդառաջ` ՎիվաՍել-ՄՏՍ-ի գլխավոր տնօրեն Ռալֆ Յիրիկյանն այցելել է աուտիզմով երեխաների համար նախատեսված «Երեխաների զարգացման միջազգային կենտրոն»: ՎիվաՍել-ՄՏՍ-ն աջակցում է կենտրոն այցելող 3-12 տարեկան 30 սաների: Աուտիզմով երեխաների կրթաշտկողական աշխատանքը շատ դժվարին և մեծ ներդրումներ պահանջող գործընթաց է, քանի որ յուրաքանչյուր երեխայի հետ տարվում է անհատականացված ինտենսիվ ուսուցում` մեկ թերապևտ` մեկ երեխա հարաբերությամբ: Այդ նպատակով ՎիվաՍել-ՄՏՍ-ը 2008 թվականից ի վեր տրամադրել է ավելի քան 96 միլիոն դրամ, ինչի շնորհիվ երեխաները կենտրոն են հաճախում անվճար:

«Մենք համոզված ենք, որ դրական տեղաշարժ և առաջընթաց կարելի է գրանցել, եթե այս երեխաները զգան մեր հոգատարությունը, ուշադրությունը և աջակցությունը, ինչն ամենակարևորն է երեխաների հետ աշխատելիս: Մենք ուրախությամբ ենք համագործակցում այս կենտրոնի հետ, որտեղ աուտիզմով երեխաները ստանում են անհրաժեշտ հետևողական մասնագիտական բուժում»,-նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

Կենտրոնի աշխատակազմը և այնտեղ հաճախող երեխաների ծնողները փաստում են, որ հաճախումների շնորհիվ երեխաների մոտ նկատելի առաջընթաց է արձանագրվել ոչ միայն ակադեմիական գիտելիքների ձեռքբերման մեջ, այլև ինքնասպասարկման ու սոցիալականացման առումով: Այդ մասին են վկայում երեխաների վարքագծում նկատվող փոփոխություններն ու մտավոր ունակությունների զարգացումը: Կենտրոնի սաներից 14-ն արդեն հաճախում են հանրակրթական դպրոց: Ստացված արդյունքները վկայում են «Երեխաների զարգացման միջազգային կենտրոն» ՀԿ-ի կողմից իրականացվող ծրագրի արդյունավետության փաստը: Երեխաները չեն կարող բուժվել, քանի որ աուտիզմի համար դեղամիջոց հայտնաբերված չէ: Ինտենսիվ վաղ միջամտությունը հնարավորություն է տալիս զգալի առաջընթաց արձանագրել: Աուտիզմով ախտորոշված երեխաներն ունեն հատուկ ծառայությունների և աջակցության կարիք `այս ամենին հասնելու համար:

Աուտիզմը կարողությունների սահմանափակում է` կապված զարգացման հետ, որը սովորաբար ի հայտ է գալիս կյանքի առաջին երեք տարիների ընթացքում: Այն նյարդաբանական խանգարման արդյունք է, որն ախտահարում է ուղեղի տարբեր հատվածները: Աուտիզմով տառապող և՛ մեծահասակները, և՛ երեխաները սովորաբար վերբալ (խոսքային) և ոչ վերբալ (ոչ խոսքային) հաղորդակցության, սոցիալական հարաբերությունների, ինչպես նաև զվարճանքի և խաղային գործունեության առումով խնդիրներ են ունենում:

 Ուշագրավ
Մինչև 5 տարեկան երեխաների շրջանում պնևմակոկային վարակի պատճառով Հայաստանում կարող է արձանագրվել տարեկան առնվազն 20-200 մահվան դեպք
Հայաստանում ամուսնալուծությունների ցուցանիշի աճի մասին վարչապետ Հովիկ Աբրահամյանի բարձրաձայնած խնդիրը սոցցանցերում քննարկման առարկա դարձավ
Իր իսկ հարցին, թե ինչու մինչև հիմա ցուցմունք չէր տալիս, դերասանը պատասխանել է՝ մի քանի պատճառ կար
Երևանի մզկիթում նամազ անելու որևէ պաշտոնական նամակ կամ տեղեկություն Թուրքիայից չեն ստացել