Կուտակայինի հարցով վարչապետ-պատգամավորներ հանդիպումը․ Պարտադիրի կասեցման հարցում պատրաստակամ են

22 ապրիլի 2014 - 15:44 AMT

PanARMENIAN.Net - Վարչապետ Հովիկ Աբրահամյանն ու ԱԺ խմբակցությունների ներկայացուցիչներն այսօր` ապրիլի 22-ին, քննարկել են «Կուտակային կենսաթոշակների մասին» օրենքը։ Գործադիրի ղեկավարի հետ քննարկման էին եկել Հանրապետականի, «Բարգավաճ Հայաստանի», «Օրինաց Երկրի», ՀՅԴ-ի և «Ժառանգությանն» ներկայացուցիչները:

Հանդիպմանը ընդգծվել է քաղաքական գործակցության նման ձևաչափի անհրաժեշտությունը և կարևորվել դրա շարունակականությունը: Քաղաքական ուժերի ներկայացուցիչներն անհրաժեշտ են համարել ուրվագծել խորհրդարանական ուժերի և Կառավարության բաց, անկաշկանդ գործակցության ուղիները, այդ թվում տարբեր խնդրահարույց հարցերի շուրջ, ինչը կնպաստի երկրում վստահության ամրապնդմանը:

Հովիկ Աբրահամյանը վստահեցրել է, որ տարբեր հարցերի ու խնդիրների շուրջ կարևորում է խորհրդարանական խմբակցությունների հետ գործակցությունը և պատրաստ է հետագա երկխոսության` տարբեր ձևաչափերով, տեղեկացնում են գործադիրի մամուլի ծառայությունից: Երկխոսության շրջանակում քաղաքական ուժերի ներկայացուցիչներն իրենց դիրքորոշումներն են արտահայտել կենսաթոշակային բարեփոխումների վերաբերյալ և տարբեր առաջարկություններ ներկայացրել:

Կառավարության ղեկավարը հիշեցրել է, որ սեղմ ժամկետում նախապատրաստվելու է օրենքի նախագիծ, որով մինչև Սահմանադրական դատարանի ապրիլի 2-ի որոշմամբ նախատեսված «Կուտակային կենսաթոշակների մասին» օրենքի վերաբերյալ օրենսդրական փաթեթի ընդունումն Ազգային ժողովի կողմից կկասեցվի տույժերի հաշվարկը:

Վարչապետը պատրաստակամություն է հայտնել շարունակել քննարկումները պատգամավորների և շահարգիռ կողմերի հետ՝ կենսաթոշակային համակարգում առկա խնդիրների համակողմանի լուծմանը հասնելու համար:

Քննարկումից հետո լրագրողների հետ զրույցում ԱԺ ՀՅԴ խմբակցության պատգամավոր Արծվիկ Մինասյանը՝ դրական գնահատելով հանդիպումը, նշել է, որ վարչապետը ներկայացրել է կուտակային համակարգի վերաբերյալ այն մոտեցումները, որոնք հրապարակել էր «Դ!ԵՄ ԵՄ» շարժման հետ հանդիպմանը, գրում է «Երկիր»-ը: Նրա խոսքով` Կառավարության կողմից պատրաստված օրենքի նախագիծը պատրաստ կլինի առաջիկա երկու օրերին, ինչից հետո միայն հնարավոր կլինի վերջնական եզրակացություն տալ: «Կարևորում այն, որ վարչապետը պատրաստակամ է խնդիրները լուծել և բարձրացված հարցերին լիարժեք պատասխաններ տալ»,- նշել է պատգամավորը:

«Դ!ԵՄ ԵՄ» քաղնախաձեռնությունն ապրիլի 18-ին նախագահական նստավայրի դիմաց ցույց էր կազմակերպել: Նախաձեռնության անդամներն ավելի վաղ հայտարարել էին, որ ՀՀ նախագահը երկրի գլուխն է, ինչպես նաև Սահմանադրության ու սահմանադրական կարգի պահպանման երաշխավորը: «Այսօր, երբ Սահմանադրությունն ու Սահմանադրական դատարանի որոշումը Կառավարության կողմից անթաքույց ոտնահարվում են, մենք պետք է մեր հստակ պահանջն ու կոչը հղենք նախագահին՝ կատարելու Սահմանադրությամբ ամրագրված իր պարտականությունները, որոնց պատշաճ չկատարումը խարխլում է մեր պետության իրավական հիմքերն ու անվտանգությունը»,- ասվում էր նրանց հայտարարության մեջ:

Նախագահական նստավարի դիմաց «Դ!ԵՄ ԵՄ»-ի ակցիայի մասնակիցներին էր այցելել ՀՀ վարչապետ Հովիկ Աբրահամյանը։ Նախաձեռնության անդամները գործադիրի ղեկավարին էին ներկայացրել խմբի պահանջները։

Հովիկ Աբրահամյանը նշել էր, թե յուրաքանչյուր հարցի, որը բարձրացվել է, փորձելու են լուծում տալ։ «Իմ մոտեցումն է՝ չսպասել մինչը սեպտեմբերի 30-ը։ Առաջին քայլն արված է: Չգիտեմ` կարող ենք վաղը բոլոր կետերի պատասխանը տալ, թե` ոչ, մեզ ժամանակ է պետք, բայց որ քայլեր ենք անելու` այդպես է, հավատացեք, խնդրում եմ»,- ասել էր վարչապետը՝ հավելելով, որ առաջիկայում հարցը կքննարկեն Կառավարությունում ու ԱԺ խմբակցությունների հետ ու կներկայացնեն իրենց անելիքները։

Արծվիկ Մինասյանի խոսքով, խնդիրը բաժանվում է երկու փուլի՝ առաջինն այս կարճաժամկետ հատվածն է, որպեսզի հասարակության վստահությունը վերականգնվի:

«Համակարգային տարրերն այնպիսի փոփոխությունների պետք է ենթարկվեն, որ քաղաքացիները դրանց մասնակցեն կամարտահայտությամբ, որևէ պարտադրանք չի լինելու: Երկրորդ փուլը վերաբերում է արդեն նոր օրենքի մշակմանը, որը ենթադրում է հասարակական բոլոր շերտերի հետ քննարկումներ և ավելի երկար ժամանակ է պահանջում»,- ասել է նա:

Պատգամավորը կարևորել է նաև այն, որ պարտադրանքի կասեցման ուղղությամբ կոնկրետ քայլեր է կառավարությունը պատրաստ իրականացնել, գրում է Panorama.am-ը:

Իր հերթին ԲՀԿ-ական Նաիրա Զորհաբյանը հանդիպումից հետո նշել է, որ Միքայելը Մելքումյանի հետ ներկայացրել են ԲՀԿ տեսակետը՝ նշելով խմբակցության հիմնարար պնդումները, որոնք որևէ փոփոխություն չեն կրել․ «այն է՝ պարտադիրը պիտի հանվի և սկզբունքը լինի կամավոր, կամավորության դեպքում հանրությանը պետք է հստակ իրազեկվի, որովհետև մինչև հիմա վստահություն չկա համակարգի նկատմամբ», գրում է Tert.am-ը:

Զոհրաբյանի համոզմամբ, վստահության գործակից պետք է լինի ֆոնդերի հանդեպ, նրանք պիտի անպայմանորեն ունենան պետական երաշխիքներ, եթե ոչ՝ լինեն պետական, նշել է պատգամավորը:

Իսկ ՀԱԿ խմբակցության քարտուղար Արամ Մանուկյանը պազաբանելով, թե ինչի Հայ ազգային կոնգրեսը չի մասնակցել խորհրդակցությանը, նշել է, թե իրենցբոլոր առաջարկները ներկայացրել են և բացի այդ, ստորագրել այն դիմումի տակ, որն ուղարկել են Սահմանադրական դատարան:

«Այսինքն, ՍԴ ուղարկված մեր դիմումի բովանդակության մեջ որևէ փոփոխություն չկա: Հիմա թե Կառավարությունն ինչ կորոշի, ինչ առաջարկով կմտնի խորհրդարան, դա իրենց գործն է: Մենք քննարկելու բան չունենք, իրենք պետք է ներկայացնեն առաջարկ»,- նշել է Արամ Մանուկյանը:

Նրա խոսքով, Սահմանադրական դատարան ներկայացրած դիմումի մեջ հայտնած դիրքորոշումը, որով իրենք մերժում են պարտադիր կուտակային բաղադրիչի սկզբունքը, որևէ փոփոխության չի ենթարկվել: Հետևաբար, այդ առումով, ըստ Մանուկյանի, չեն ցանկացել գնալ Կառավարություն:

Ապրիլի 17-ին Կառավարությունում խորհրդակցությանը վարչապետը հանձնարարել էր շահագրգիռ պետական մարմիններին սեղմ ժամկետում օրենքի նախագիծ նախապատրաստել, որով մինչև Սահմանադրական դատարանի՝ ապրիլի 2-ի որոշմամբ նախատեսված «Կուտակային կենսաթոշակների մասին» օրենքի վերաբերյալ օրենսդրական փաթեթի ընդունումն Ազգային ժողովը կկասեցնի տույժերի հաշվարկը: Կառավարությունը պատրաստվում է առաջարկել նշված օրենքի նախագիծը քննարկել Ազգային ժողովի՝ ապրիլի 28-ին մեկնարկող քառօրյայում:

Հղումներ թեմայով.

Վարչապետը պատրաստակամ է խնդրին լուծում տալ. Արծվիկ Մինասյան. Երկիր

Վարչապետի մոտ քննարկումն ավարտվել է դրական ֆոնով, կառավարությունը կներկայացնի «Կուտակային»-ի օրենքի իր տարբերակը․ Tert.am

Արծվիկ Մինասյան. Կառավարությունը պատրաստակամ է պարտադիր բաղադրիչի կասեցման հարցում․ Panorama.am

Մենք քննարկելու բան չունենք. ՀԱԿ-ը չի մասնակցում Հովիկ Աբրահամյանի հետ հանդիպմանը․ Panorama.am

Armenia Today: Правительство Армении готово приостановить действие обязательного накопительного компонента

Նյութեր թեմայով.

«Դ!ԵՄ ԵՄ»-ի ցույցը նախագահականի դիմաց. Վարչապետը վստահություն ու ժամանակ է խնդրել

Պարտադիր կուտակայինի համար տույժերի հաշվարկը կկասեցվի․ «Դ!ԵՄ ԵՄ»-ն ասում է՝ դրական է, բայց ոչ բավարար (թարմացված)

Պարտադիր կուտակային կենսաթոշակային համակարգ

Կենսաթոշակային բարեփոխումների մեկնարկի մասին Հայաստանը հայտարարել էր դեռ 2010-ի հուլիսին: Արդեն 2011-ի հունվարի 1-ից կենսաթոշակային ռեֆորմները մեկնարկեցին կամավոր կուտակային համակարգի ներդրմամբ։

2014-ի հունվարի 1-ից Հայաստանն անցավ պարտադիր կուտակային համակարգի, որը վերաբերում է 1973-ի դեկտեմբերի 31-ից հետո ծնվածներին, որոնք աշխատում են և գրանցված են աշխատավայրում: Մինչև 500 հազար դրամ աշխատավարձ ստացողները վճարումներ կկատարեն իրենց աշխատավարձի 5%-ի չափով, ևս 5%-ն այդ աշխատողների անհատական հաշիվներին կփոխանցի պետությունը։ 500 հազար դրամից ավելի աշխատավարձ ստացողի անհատական կուտակային ֆոնդին պետությունը 25 հազար դրամից ավելի չի փոխանցի:

Պարտադիր բաղադրիչի ներդրումը մեծ աղմուկ էր առաջացրել հասարակության շրջանում, ստեղծվել էին մի շարք քաղնախաձեռնություններ, որոնք մինչև օրս էլ այդ համակարգին դեմ են արտահայտվում ու շարունակում են բողոքել: Համակարգին դեմ էին նաև խորհրդարանական ոչ իշխանական 4 ուժերը, որոնք ԱԺ-ին առաջարկել էին մեկ տարով հետաձգել համակարգի ներդրումն ու շարունակել քննարկումները, քանի որ դա շատ լուրջ փոփոխություն է, իսկ«համակարգը թերի է»: 2013-ի դեկտեմբերի 4-ին հարցով հրավիրված արտահերթին խորհրդարանը դեմ էր քվեարկել կուտակային կենսաթոշակային համակարգի պարտադիր բաղադրիչի կիրառումը մեկ տարով հետաձգելու առաջարկությանը:

Հայաստանի սահմանադրական դատարանը հունվարի 24-ի նիստում որոշել էր կասեցնել «Կուտակային կենսաթոշակների մասին» ՀՀ օրենքի 76-րդ հոդվածի (այն է՝ պատասխանատվությունը պարտադիր կուտակային վճարները չկատարելու կամ ուշացմամբ կատարելու համար) և 86-րդ հոդվածի 3-րդ մասի (այն է՝ ֆոնդի և կառավարչի պարտադիր ընտրություն) գործողությունը մինչև օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ գործի դատաքննության ավարտը։

Մարտի 28-ին մեկնարկած դատական նիստի որոշումը ՍԴ-ն կայացրեց ապրիլի 2-ին՝ «Կուտակային կենսաթոշակների մասին» ՀՀ օրենքի մի քանի դրույթ ՀՀ Սահմանադրության պահանջներին հակասող ու անվավեր ճանաչելով։ 64 էջանոց համախատասխան որոշումը հրապարակել էր ՍԴ նախագահ Գագիկ Հարությունյանը։ Ըստ էության, դիմող կողմի հայցը բավարարվեց։

Դատարանը մինչև 2014-ի սեպտեմբերի 30-ն Աժ-ին և Կառավարությանը ժամանակ տվեց՝ օրենքի որոշ դրույթներ փոփոխելու համար: Մինչ այդ կատարված կենսաթոշակային բոլոր վճարումները պետք է վերանայվեն:

Ապրիլի 17-ին վարչապետը հանձնարարեց շահագրգիռ պետական մարմիններին սեղմ ժամկետում օրենքի նախագիծ պատրաստել, որով մինչև Սահմանադրական դատարանի՝ ապրիլի 2-ի որոշմամբ նախատեսված օրենսդրական փաթեթի ընդունումն Ազգային ժողովը կկասեցնի տույժերի հաշվարկը: Կառավարության առաջարկող օրենքի նախագիծն Ազգային ժողովում սկսեցին քննարկել ապրիլի 28-ին:

Արդեն մայիսի 15-ին խորհրդարանն ամբողջովին ընդունեց «Կուտակային կենսաթոշակի մասին» օրենքում փոփոխություն կատարելու մասին Կառավարության օրինագիծը: Դրանով պարտադիր կուտակային վճարը հաշվարկելու և փոխանցելու պարտավորությունը կրող անձն ազատվում է մինչև օրենքն ուժի մեջ մտնելն ընկած ժամանակահատվածի համար պարտադիր կուտակային վճարը չկատարելու կամ ուշացումով կատարելու համար օրենքով նախատեսված պատասխանատվությունից: Նախագահ Սերժ Սարգսյանն օրենքը վավերացրեց մայիսի 26-ին:

Հունիսի 17-ի արտահերթում Կառավարությունը հավանություն տվեց «Կուտակային կենսաթոշակների մասին» օրենքում փոփոխություններ և լրացումներ կատարելու օրինագծերի փաթեթին: Դրանով նախատեսվում է 2014-ի հուլիսի 1-ից պետական հատվածի աշխատողների համար գործարկել նպատակային սոցիալական վճարի համակարգը, որը մինչև 2017-ի հուլիսի 1-ը մասնավոր հատվածի համար կլինի կամավոր։ Դրա դրույքաչափը նույնպես 5 տոկոս է: Առաջարկվում է սահմանել 500․000 դրամ աշխատավարձի շեմ, որից ավելիի դեպքում սոցվճար չի կատարվելու, այսինքն՝ առավելագույն սոցվճարը բոլորի համար լինելու է 25․000 դրամ՝ կախված աշխատավարձի չափից: Նախագիծը քննարկելու համար գործադիրը ԱԺ արտահերթ նիստ հրավիրեց։

Հունիսի 21-ին խորհրդարանն արտահերթում երեք ընթերցմամբ ընդունեց «Կուտակային կենսաթոշակային համակարգում փոփոխություններ և լրացումներ կատարելու մասին» օրենքի նախագիծը, որով պարտադիր կուտակայինը դարձավ նպատակային սոցվճար։ Քվեարկությանը մասնակցեց միայն ՀՀԿ-ն։ Քվեարկությունը բոյկոտած ԱԺ ոչ իշխանական ուժերը տեղեկացրին, որ դիմելու են Սահմանադրական դատարան` վիճարկելու ստեղծված իրավիճակն ու օրենքի խախտումով տեղի ունեցած քվեարկությունը։