Հարավային Կովկասում ԵՄ հատուկ ներկայացուցչի 1-ին այցը ՀՀ․ Ուշադրության կենտրոնում ԼՂՀ հիմնախնդիրն է

PanARMENIAN.Net - Երևանում է Հայաստանում տարածաշրջանային այցով գտնվող Հարավային Կովկասի ու Վրաստանի ճգնաժամի հարցերով ԵՄ հատուկ ներկայացուցիչ Հերբերտ Զալբերը, ում երեկ՝ հուլիսի 30-ին, արդեն հասցրել են ընդունել ՀՀ նախագահն ու արտգործնախարարը: Արդեն այսօր՝ հուլիսի 31-ին, նա հանդիպել է պաշտպանության նախարար Սեյրան Օհանյանին։

ՀՀ պաշտպանության նախարարը հույս է հայտնել, որ Եվրամիության ներկայացուցչի առաքելությունը կնպաստի հարավկովկասյան տարածաշրջանում առկա հակամարտությունների կարգավորմանը և տարածաշրջանային գործակցության խթանմանը:

Լեռնային Ղարաբաղի հակամարտության շուրջ կարծիքների փոխանակման ժամանակ Սեյրան Օհանյանը ներկայացրել է շփման գծում տիրող իրավիճակը` Եվրամիության պատվիրակի ուշադրությունը հրավիրելով հակամարտող կողմերի միջև վստահության ամրապնդման միջոցառումների իրականացման և միջազգային հանրության ջանքերը սպառազինությունների վերահսկման խնդիրներին սևեռելու անհրաժեշտության վրա:

Հերբերթ Զալբերն իր հերթին նշել է, որ Եվրամիությունը միանշանակ ընդունում է ԼՂ հակամարտության լուծման հարցում ԵԱՀԿ Մինսկի խմբի առաջատար դերը, սակայն պատրաստակամ է ուժերի ներածին չափով ներդրում անել խաղաղ կարգավորման հասնելու գործում:

Նախագահ Սերժ Սարգսյանի հետ հանդիպմանը երկրի ղեկավարն ընդգծել է, որ Հայաստանը կարևորում է Հարավային Կովկասում ԵՄ հատուկ ներկայացուցչի պաշտոնը և վստահեցրել, որ մեր երկրում պատրաստ են կառուցողական գործակցության:

Հերբերտ Զալբերն իր հերթին նշել է, որ իր նշանակմամբ Եվրամիությունը ցանկանում է առկա հակամարտությունների կարգավորմանը մասնակցելու և գործակցության պատրաստ լինելու ազդանշան հղել: Նրա խոսքով, նշանակումից կարճ ժամանակ հետո իր այցը տարածաշրջանի երեք երկրներ միտված է հենց այդ նպատակին:

Հանդիպմանը ՀՀ նախագահը և ԵՄ հատուկ ներկայացուցիչն անդրադարձել են նաև Հայաստան-Եվրամիություն հարաբերություններին ու գործակցությանը:

Զրուցակիցները մտքեր են փոխանակել տարածաշրջանային խնդիրների ու մարտահրավերների, ԼՂ հակամարտության խաղաղ կարգավորման բանակցային գործընթացի վերաբերյալ: Հանրապետության նախագահը բարձր է գնահատել, որ Եվրամիությունը տարբեր մակարդակներով իր աջակցությունն է հայտնել ԵԱՀԿ Մինսկի խմբի համանախագահների միջնորդությամբ հակամարտության խաղաղ և միջազգային սկզբունքների հիման վրա կարգավորմանը:

Նախագահ Սարգսյանը վերահաստատել է մեր երկրի դիրքորոշումը, ըստ որի Հայաստանը ԼՂ հիմնահարցի խաղաղ կարգավորումը տեսնում է բացառապես խաղաղ միջոցներով, ԵԱՀԿ Մինսկի խմբի համանախագահողների ձևաչափում ընթացող բանակցությունների շրջանակում: Նրա խոսքով, նման մոտեցման գլխավոր պատճառներից մեկն էլ այն է, որ անցած ավելի քան երկու տասնամյակում այդ խումբը կուտակել է զգալի փորձ և ինստիտուցիոնալ հիշողություն: Մինսկի խումբն առաջարկել է սկզբունքներ, որոնք, Սերժ Սարգսյանի համոզմամբ, կարող են հակամարտության լուծման առանցք դառնալ:

Նախագահը նշել է, որ, ցավոք, Ադրբեջանը չի ընդունում այդ սկզբունքները, թեև հայտարարում է հակառակը, ու այդ իսկ պատճառով այդ սադրանքներ է հրահրում և մեծացնում շփման գծում լարվածությունը, մշտապես մերժում վստահության ամրապնդմանն ուղղված միջոցառումների իրականացումը: Հանրապետության նախագահն ընդգծել է, որ խնդրի լուծումը պետք է տան Հայաստանը, Ադրբեջանը և Լեռնային Ղարաբաղը, Մինսկի խումբն այդ գործընթացում ընդամենը միջնորդ է, որն իր լիազորությունների շրջանակում անում է հնարավորը:

Արտգործնախարար Էդվարդ Նալբանդյանն իր հերթին հույս է հայտնել, որ Զալբերը կօգտագործի ԵԱՀԿ շրջանակում ձեռք բերված փորձն իր առաքելության իրականացման ընթացքում:

Հանդիպմանը քննարկվել են Լեռնային Ղարաբաղի հիմնախնդրի կարգավորման վերջին զարգացումները, կարևորվել ԵԱՀԿ Մինսկի խմբի համանախագահների կողմից գործադրվող ջանքերին ԵՄ շարունակական աջակցությունը։

Նախարար Նալբանդյանը նույնպես հատուկ ներկայացուցչի ուշադրությունը հրավիրել է Ադրբեջանի կողմից Լեռնային Ղարաբաղի հետ շփման գծում և Հայաստանի հետ սահմանին պարբերաբար իրականացվող սադրիչ գործողություններին՝ նշելով, որ Ադրբեջանը շարունակաբար մերժում է վստահության ամրապնդմանն ուղղված միջոցառումների՝ հրադադարի ռեժիմի ամրապնդման, դիպուկահարների դուրսբերման, սահմանային միջադեպերի հետաքննության մեխանիզմի ստեղծման վերաբերյալ ԵԱՀԿ Մինսկի խմբի համանախագահների կողմից արված առաջարկությունները, իր ապակառուցողական դիրքորոշմամբ խոչընդոտում է բանակցային գործընթացի առաջընթացին:

Անդրադարռնալով Հայաստան-ԵՄ գործակցությանը, նախարար Նալբանդյանն ընդգծել է, որ 2013-ի նոյեմբերին Վիլնյուսում կայացած Արևելյան գործընկերության գագաթնաժողովի ընթացքում ընդունված Հայաստան-ԵՄ համատեղ հայտարարությամբ վերահաստատվել է կողմերի հանձնառությունը` զարգացնել և ամրապնդել փոխադարձ հետաքրքրություն ներկայացնող բոլոր ոլորտներում համապարփակ գործակցությունը։