Վրաստանի ՊՆ նախկին ղեկավարը փորձել է գնդակահարել իշխող կուսակցության ակտիվիստներին. Նրանց ճակատագիրն անհայտ է

PanARMENIAN.Net - Պաշտպանության նախկին նախարար Իրակլի Օկրուաշվիլին մասնակցել է «Վրացական երազանք» իշխող կուսակցության երկու անդամի վրա բացված կրակահերթին, օգոստոսի 27-ին հայտարարել է Վրաստանի խորհրդարանի պատգամավոր Թեմուր Գիգուաշվիլին: Նրա խոսքով միջադեպը տեղի է ունեցել նախորդ կիրակի՝ օգոստոսի 24-ին Տկվիավի գյուղում «մեքենաներով հետապնդման» ժամանակ, երբ Օկրուաշվիլին անվտանգության երկու աշխատակցի հետ հետապնդել է երկու համագյուղացու՝ Պավլե և Վասիլի Կարելիներին: Ընդ որում, այդ ընթացքում Օկրուաշվիլիի մեքենայից կրակ են բացել հետապնդվողների մեքենայի ուղղությամբ, երեք անգամ գնդակը դիպել է մեքենային: Այնուհետև, ինչպես պնդում է Գիգուաշվիլին, ՊՆ նախկին ղեկավարը հասել է ակտիվիստներին և ֆիզիկական հաշվեհարդար տեսել:

Ներկա պահին տուժածների և նրանց մեքենայի գտնվելու վայրը հայտնի չէ, ակտիվիստների հետ կապ հաստատել չի հաջողվում:

«Դա իրոք Օկրուաշվիլին է եղել, իր անձնական անվտանգության ծառայության աշխատակիցների հետ: Մոտ 2,5 կմ նա հետապնդել է այդ երկու ակտիվիստի մեքենան, և դա ուղեկցվել է կրակահերթով: Հետագայում, վիզուալ զննման ժամանակ անձամբ տեսել եմ մեքենան: Բայց թե հիմա այն ուր է, ինքս չգիտեմ, անձամբ փնտրում եմ: Դեպքից հետո տղաները թաքնվել են: Չգիտեմ՝ ինչ է եղել, գուցե Օկուրաշվիլին է զանգել ու սպառնացել»,- Գագուաշվիլին հայտարարել է լրագրողներին, հայտնում է «Նովոստի- Գրուզիյան»:

Ժամանակին Օկրուաշվիլին Միխայիլ Սաակաշվիլիի մտերիմ համակիրներից մեկն է եղել: 2003-ի աշնանը նա սատարել է «վարդերի հեղափոխությունը», նույն տարվա դեկտեմբերին դարձել է Շիդա Քարթլի նահանգում նախագահի լիազորված անձ:Իսկ 2004-ին Սահակաշվիլիի նախագահ ընտրվելուց հետո զբաղեցրել է գլխավոր դատախազզի պաշտոնը: 2004-ի հունիսին գլխավորել է ներքին գործերի նախարարությունը, դեկտեմբերին՝ պաշտպանության: Նոյեմբերի 2006-ին թողել է պաշտպանության նախարարի պաշտոնն ու զբաղեցրել տնտեսական զարգացման նախարարի պածտոնը, բայց մեկ շաբաթ անց հրաժարական է տվել:

2007-ի նոյեմբերին Օկրուաշվիլին հայտարարեց ընդդիմադիր «Միացյալ Վրաստանի շարժում» կուսակցությունն ու հեռուստաեթերում հանդես եկել բարձրագույն ղեկավարության դեմ մեղադրանքներով: