Փոխվարչապետ Արմեն Գևորգյանը հրաժարական է տվել

PanARMENIAN.Net - ՀՀ փոխվարչապետ, ՀՀ տարածքային կառավարման նախարար Արմեն Գևորգյանը հրաժարականի դիմում է ներկայացրել: Նա գործունեությունը կշարունակի մասնավոր հատվածում: Այս մասին ՀՀ կառավարության հոկտեմբերի 16-ի նիստի վերջում հայտարարել է վարչապետ Հովիկ Աբրահամյանը՝ շնորհակալություն հայտնելով Արմեն Գևորգյանին համատեղ աշխատանքի համար և մաղթելով հաջողություններ:

Գևորգյանը ևս գործակցության համար շնորհակալություն է հայտնել կառավարությանը, իր գործընկերներին և միջազգային կառույցների ներկայացուցիչներին:

Այսօր՝ հոկտեմբերի 16-ին՝ ժամը 20:00-ին, նախատեսված է ՀՀԿ գործադիր մարմնի նիստ: Այս մասին հայտնել են Հայաստանի Հանրապետական կուսակցության մամուլի ծառայությունից՝ նշելով, որ օրակարգը երբևէ նախօրոք չի ձևավորվում, գրում է Tert.am-ը:

Մամուլում արդեն իսկ շրջանառվում է Արմեն Գևորգյանի պաշտոնի 3 հավակնորդի անուն. ըստ «Հայկական ժամանակի»՝ պաշտոնի հիմնական հավակնորդը տրոնսպորտի ու կապի նախարար Գագիկ Բեգլարյանն է, բայց դիտարկվում են նաև կառավարության աշխատակազմի ղեկավար-նախարար Դավիթ Հարությունյանի և ֆինանսների նմախարար Գագիկ Խաչատրյանի թեկնածությունները: «Ժամանակ» օրաթերթն իր հերթին գրում է, թե պաշտոնին հավակնում է նաև ՀՅԴ-ական Դավիթ Լոքյանը:

ՀՀ նախկին փոխվարչապետ, տարածքային կառավարման նախարար Արմեն Գևորգյանը ծնվել է 1973-ի հուլիսի 8-ին Երևանում: 1990-ին ընդունվել է Օրենբուրգի պետական մանկավարժական ինստիտուտի պատմության ֆակուլտետը, այնուհետև 1991-ին տեղափոխվել և 1993-ին գերազանցությամբ ավարտել է Սանկտ Պետերբուրգի պետական ծառայության ինստիտուտը: 1993-1996 թթ. եղել է Սանկտ-Պետերբուրգի Գերցենի անվան ռուսաստանյան մանկավարժական համալսարանի ասպիրանտ, որն ավարտելիս պաշտպանել է գիտությունների թեկնածուի ատենախոսություն: 1995-1996 թթ. համատեղությամբ ավարտել է նաև Տվենտեի (Նիդերլանդներ) համալսարանի մագիստրատուրան «Կրթության և վերապատրաստման համակարգերի ծրագրավորում» մասնագիտությամբ։

1997-1998 թվականներին զբաղեցրել է ՀՀ վարչապետի օգնականի պաշտոնը։ 1998-ի ապրիլի 13-ից եղել է ՀՀ նախագահի օգնական, օգոստոսից՝ ՀՀ նախագահի առաջին օգնական, աշխատակազմի ղեկավարի առաջին տեղակալ։ 2000-2006 թթ.եղել է ՀՀ նախագահի առաջին օգնականը, իսկ 2006-ի փետրվարին նշանակվել է ՀՀ նախագահի աշխատակազմի ղեկավար։

2007-ի հունիսից մինչև 2008-ի ապրիլը զբաղեցրել է նաև Ազգային անվտանգության խորհրդի քարտուղարի պաշտոնը։ ՀՀ նախագահի 2008-ի ապրիլի 21-ի հրամանագրով նշանակվել է ՀՀ տարածքային կառավարման նախարար։ Նույն օրվա մեկ այլ հրամանագրով նշանակվել է ՀՀ փոխվարչապետ։

ՀՀ նախագահի 2008 -ի մայիսի 6-ի հրամանագրով նշանակվել է Անկախ պետությունների գործակցության տնտեսական խորհրդի անդամ, իսկ 2012-ի հունիսի 16-ի, 2013-ի մայիսի 8-ի և 2014-ի ապրիլի 26-ի հրամանագրերով երեք անգամ վերանշանակվել է ՀՀ տարածքային կառավարման նախարարի ու փոխվարչապետի պաշտոնում: