Սերժ Թանկյանը Ցեղասպանության, երաժշտության ժանրերի, ՌԴ ու ստեղծագործական ծրագրերի մասին

Սերժ Թանկյանը Ցեղասպանության, երաժշտության ժանրերի, ՌԴ ու ստեղծագործական ծրագրերի մասին

PanARMENIAN.Net - 2015-ի ապրիլի 20-ին System Of A Down ռոք խումբը համերգով հանդես կգա Մոսկվայի «Օիլմպիյսկի» մարզահամալիրում: Սա հայտնի ռոք խմբի առաջին համերգը չի լինի Մոսկվայում և Ռուսաստանում: System Of A Down-ի առաջատար Սերժ Թանկյանը ROCK FM ռադիոկայանի հետ հարցազրույցում պատմել է Ռուսաստանի մասին իր հիշողությունները, ներկայացրել ստեղծագործական ծրագրերն ու աշխարհում ցեղասպանությունների խնդրի իր տեսլականը:

Հայոց ցեղասպանության մասին

Հայոց ցեղասպանության թեման շատ կարևոր է, այն պետք է ընկալվի այլ ցեղասպանությունների հետ կապի մեջ, որոնց հավանականությունը, ցավոք, բացառված չէ նաև ապագայում, ասել է Սերժ Թանկյանը: Ըստ նրա, Հայոց ցեղասպանությունն առաջին նման ողբերգությունն էր XX դարում, այդ մասին հաճախ են մոռանում: «Ինձ համար կարևոր է հասկացնել մարդկանց, որ նման ողբերգություններ կատարվում են ամբողջ աշխարհում, և դրանք չի կարելի անտեսել: Մարդկությունը պետք է համախմբված արձագանքի, կանխի նման իրադարձությունները, իսկ հիմա դա տեղի չի ունենում: Օրինակ, ցեղասպանությունը Սուդանում: Այդ երկիրն արդյունավետ առևտրատնտեսական հարաբերություններ ունի Չինաստանի հետ, և, բնականաբար, Չինաստանը դեմ էր այլ երկրների միջամտությանն այդ հակամարտությանը: Կարծում եմ, որ պետք է հստակ միջազգային վարվելակարգ լինի՝ երբ աշխարհում ինչ-որ տեղ ցեղասպանություն է իրագործվում, բոլոր ազգերը պետք է մոռանան գոնե ժամանակավորապես սեփական շահը հանուն համամարդկայինի և միասին լուծեն այդ գլոբալ խնդիրը: Ես գիտեմ, որ այս ամենն ուտոպիստական է հնչում, բայց դա միակ միջոցն է, որը կօգնի մարկությանը գոյատևել որպես տեսակ»,-ասել է Թանկյանը:

Երաժշտության ժանրերի մասին

Անդրադառնալով իր ստեղծագործական կյանքին ու պատասխանելով այն հարցին, թե որ երաժշտական ժանրն է իրեն ավելի մոտ, SOAD-ի մենակատարն ասել է, որ երաժշտությունը տարբեր զգացողություններ է առաջացնում: «Դասականը այլ զգացմունքներ է արթնացնում, ռոքը՝ այլ: Յուրաքանչյուր զգացմունք յուրովի արժեքավոր է, չի կարելի է ինչ-որ մի բան ընտրել: Ինչ վերաբերում է էքսպերիմենտներին, ապա ես շատ բան չեմ փորձել: Օրինակ, երբեք ակուստիկ ալբոմ չեմ ձայնագրել և ակուստիկ շրջագայության չեմ մեկնել…Գուցե մի օր անեմ դա հետաքրքրության համար: Ես շատ բան կուզեի անել: Օրինակ, այլ երաժիշտների հետ համատեղ աշխատել, նույնիսկ չեմ կարող դեռ ասել, թե հատկապես՝ ում: Ես երկար տարիներ երգեր եմ գրել, հիմա կոմպոզիտոր եմ դարձել: Ինձ դուր է գալիս ինչ-որ նոր բան փորձելը՝ կարելի է փոփ երգ գրել, կամ ռեգգի, օրինակ: Որպես կոմպոզիտոր ինձ համար դա մարտահրավեր է: Տարբեր ժանրերում աշխատելը հետաքրքիր է: Յուրաքանչյուր երաժիշտ կարող է ինչ-որ նոր բան ներմուծել ցանկացած ժանրում, իր մի մասնիկը տալ: Ինձ դուր են գալիս էքսպերիմենտները, եթե ոգեշնչող բան կա»:

Ռուսաստանի մասին

Սերժ Թանկյանը նշում է, որ շատ հիշողություններ ունի Ռուսաստանի հետ կապված: «Դա շատ մեծ երկիր է, անցյալ տարի ես եղա Սիբիրում՝ Եկատերինբուրգում, Նովոսիբիրսկում, Կրասնոյարսկում…Իսկ մի քանի տարի առաջ մենք շրջագայում էինք System Of A Down-ի հետ, և եղանք Անապայում: Եվ, անշուշտ, Մոսկվան ու Սանկտ Պետերբուրգը: Բոլոր այդ քաղաքներն այնքան տարբեր են: Մոսկվայում ու Սանկտ Պետերբուրգում ես շատ անգամ եմ եղել, իսկ ահա սիբիրյան ուևորությունս շատ հետաքրքիր էր: Մեծ տարածքներ, շատ սիրալիր մարդիկ: Շատ հետաքրքիր էր: Այնտեղ յուրահատուկ մթնոլորտ է: Սիբիրը շատ է տարբերվում Ռուսաստանի մյուս մասերից: Ուստի ինձ շատ դուր եկավ իմ վերջին շրջագայությունը Ռուսաստանում նվագախմբի հետ՝ մենք ոչ միայն ելույթներ ունեցանք Սանկտ Պետերբուրգում ու Մոսկվայում, ինչը միշտ է ուրախալի, այլ նաև այլ քաղաքներ այցելեցինք»,-ասել է նա:

Ֆանատների մասին

Այն հարցին, թե որտեղ են System Of A Down-ի ամենախենթ երկրպագուները, Թանկյանը պատասխանեց. «Բարդ հարց է: Հարավային Ամերիկայում խելահեղ ժողովուրդ է, Ռուսաստանում նույնպես: Բայց այն տարբեր է՝ տարբեր է ֆիզիկական էներգետիկան, զգացմունքային, հոգևոր…Մենք ցնցող երկրպագուներ ունենք, մենք ելույթներ ենք ունենում 1995-ից և ուր էլ գնանք, մեզ ամենուր լավ են ընդունում, դա իսկական օրհնություն է: Բայց եթե խոսելու լինենք, թե մեր որ երկրպագուներն են ամենախենթը, կարծում եմ, դա կլինի բրազիլցաի երկրպագուների ու ռուսաստանցիների միջինը:

Նոր ձայնասկավառակի մասին

Ինչ վերաբերում է նոր ձայնասկավառակի ձայնագրությանը (System Of A Down-ի վերջին «Hypnotize» ալբոմի ռելիզը եղել է 2005 թ.), ապա երաժիշտն ասաց, որ խումբը մտորում է նոր նյութի վրա. «Բայց մենք դեռ չենք սկսել աշխատանքը, այնպես որ ավելի լավ է ձեռնպահ մնամ այս հարցի շուրջ մեկնաբանություններից»:

Ապրիլի 20-ին կայանալիք մոսկովյան համերգի տոմսերի վաճառքը սկսվել է նոյեմբերի 18-ին: Դա կլինի խմբի միակ ելույթը Ռուսաստանում 2015-ին:

System Of A Down (SOAD) ռոք խումբը հայտարարել է համաշխարհային նոր շրջագայության մասին, որի առաջին համերգը կլինի դեկտեմբերի 13-ին Լոս Անջելեսի The Forum համերգասրահում: Մոսկովյան համերգը տեղի կունենա այդ համերգաշարի շրջանակում:

2015-ի ապրիլի 10-ից 20-ը խումբը համերգներ կունենա Մեծ Բրիտանիայում (10-ին), Գերմանիայում (13-ին), Ֆրանսիայում (14-ին), Բելգիայում (16-ին), Նիդերլանդներում (17-ին) ու Ռուսաստանում (20-ին):

Իսկ ապրիլի 23-ին` Հայոց Ցեղասպանության 100-ամյա տարելիցի նախօրեին, խումբը բացօթյա համերգ կտա Երևանում` Հանրապետության հրապարակում: Համերգային շրջագայությունը կանցկացվի Wake up the souls (արթնացրեք հոգիները) խորագրով:

System of a Down խումբը

System of a Down խումբը հիմնվել է Լոս Անջելեսում 1995 թ-ին, ԱՄՆ գաղթած հայերի կողմից: Խումբը ձայնագրել է հինգ ալբոմ, որոնցից յուրաքանչուրը դարձավ պլատինե: 2006 թ-ն System of a Down խումբը երկարաժամկետ արձակուրդ էր վերցրել: Այդ ժամանակ մասնակիցներից յուրաքանչուրը զբաղվում էր իր սեփական նախագծերով: Վոկալիստ Սերժ Թանկյանը, որպես մենակատար թողարկել է Elect the Dead իր առաջին ալբոմը, կիթառահար Դարոն Մալաքյանը եւ թմբկահար Ջոն Դոլմայանը ստեղծեցին Scars On Brodway խումբը, որի հետ մեկ ձայնասկավառակ ձայնագրեցին:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
Նա նշել է, որ դիտարկում է հայկական բանակին «ոչ մահաբեր ձևաչափով» աջակցություն ցուցաբերելու հնարավորությունը, բայց կոնկրետ որոշումներ չկան
---