Խուճապ ՌԴ արժույթի շուկայում. Առանցքային տոկոսադրույքը հասել է 17 տոկոսի

16 դեկտեմբերի 2014 - 10:42 AMT

PanARMENIAN.Net - Ռուսաստանի Կենտրոնական բանկը ռուբլու կտրուկ թուլացման ու արժեզրկման սպասումների աճի ֆոնին դեկտեմբերի 16-ից բարձրացրել է առանցքային տոկոսադրույքը (որը Ռուսաստանում հավասար է վերաֆինանսավորման տոկոսադրույքին) 10.5 տոկոսից միանգամից մինչև 17 տոկոս:

«Ռուսաստանի Բանկի տնօրենների խորհուրդը որոշել է 2014թ. դեկտեմբերի 16-ից առանցքային տոկոսադրույքը բարձրացնել մինչև տարեկան 17 տոկոսի: Այս որոշումը պայմանավորված է վերջին շրջանում զգալիորեն ավելացած արժեզրկման ու գնաճային ռիսկերի զսպման անհրաժեշտությամբ»,-գրում է Ինտերֆաքսը:

Ընդհանուր առմամբ ընթացիկ տարում ՌԴ ԿԲ-ն բարձրացրել է հիմնական տոկոսադրույքը, որը տարեսկզբին 5,5 տոկոս էր, վեց անգամ: Այժմյան աճը 6,5 տոկոսով երկրորդ բարձրացումն է մեկ շաբաթում՝ անցած հինգշաբթի տնօրենների խորհրդի նիստում որոշվեց տոկոսադրույքը բարձրացնել 1 տոկոսային կետով՝ մինչև 10,5 տոկոս:

Նման ծայրահեղ միջոցը կոչված է ամրացնելու կտրուկ արժեզրկվող ռուսական արժույթը: Նախօրեին՝ դեկտեմբերի 15-ին, ռուբլին անկում գրանցեց միանգամից 9 տոկոսով, հասնելով 65 ռուբլի 1 դոլարի դիմաց ցուցանիշին: Ամառվանից սկսած դոլարի փոխարժեքը ՌԴ-ում կրկնապատկվել է: Ռուբլու թուլացման ֆոնին փլուզվեց նաև ռուսական ֆոնդային բորսան. դեկտեմբերի 15-ի տվյալներով ռուսական ֆոնդային բորսայի բոլոր ընկերությունների կապիտալիզացիան կազմում է 384,4 մլրդ դոլար, ավելի էժան գնահատվելով քան Microsoft-ը ($386,6 մլրդ) կամ Apple-ը ($643,9 մլրդ), գրում է ՌԲԿ-ն:

Հղումներ թեմայով.

Reuters. Russia raises rates in emergency move as rouble collapses

Interfax: ЦБ повысил ключевую ставку до 17%

РБК: Капитализация рынка акций России упала ниже цены Microsoft

РИА: Емельянов: повышение ЦБ ставки не оставит шансов для роста экономики