Բրայզան անհնար է համարում Թուրքիայի ու Գերմանիայի մասնակցությունը ՄԽ աշխատանքին

PanARMENIAN.Net - Ղարաբաղյան կարգավորման շուրջ իրավիճակը կարող է փոխվել միայն այն դեպքում, եթե ԱՄՆ-ն, ԵՄ-ն, այդ թվում նաև Ֆրանսիան, առավել ակտիվ լինեն այդ հարցում: Այդ մասին հայտարարել է Հարավային Կովկասում ԱՄՆ պետքարտուղարի նախկին օգնական, Ադրբեջանում ԱՄՆ նախկին դեսպան, ԵԱՀԿ ՄԽ ամերիկացի նախկին համանախագահ, Տալլինում Ռազմական հետազոտությունների միջազգային կենտրոնի տնօրեն Մեթյու Բրայզան ադրբեջանական «Թրենդ» գործակալությանը տված հարցազրույցում:

Ըստ նրա, տրանսատլանտյան ընկերակցության երկրները պետք է ղարաբաղյան կարգավորման գործընթացն իրենց գլխավոր առաջնայնությունը դարձնեն, քննարկեն այդ հարցը Ռուսաստանի հետ ու «բացատրեն այդ երկրին, որ, եթե նա ցանկանում է լավ հարաբերություններ ունենալ ԵՄ ու ԱՄՆ հետ, պետք է նպաստի առաջընթացին կարգավորման հարցում»:

Բրայզան նշել է, որ այժմ Արևմուտքը չի կարող ամբողջությամբ կենտրոնանալ ղարաբաղյան կարգավորման վրա Ուկրաինայի շուրջ իրավիճակի պատճառով:

«Այսօրվա դրությամբ լավ հիմք է ստեղծված այդ հարցում բեկման հասնելու համար: ԵԱՀԿ Մինսկի խմբին հաճախ են քննադատում տեսանելի արդյունքների բացակայության համար, սակայն դա այդպես չէ: Մինսկի խումբը Հայաստանի և Ադրբեջանի նախագահների հետ միասին սահմանել է բանակցությունների շրջանակը: 2008-ին համաձայնություն ձեռք բերվեց Մադրիդյան սկզբունքների վերաբերյալ»,- ասել է Բրայզան:

Նա նշել է, որ Ադրբեջանի և Հայաստանի ղեկավարները բավարար քաղաքական աջակցություն չեն ստանում Արևմուտքի ղեկավարներից, այդ թվում ԱՄՆ-ի, որպեսզի կարողանան բացատրել իրենց ժողովրդներին ձեռք բերված պայմանավորվածությունները կյանքի կոչելու անհրաժեշտությունը:

Անդրադառնալով ԶԼՄ-ների որոշ հաղորդագրություններին Մինսկի խմբի ձևաչափի հնարավոր փոփոխության մասին՝ դիվանագետն ասել է, որ անհնար է համարում Թուրքիայի ու Գերմանիայի մասնակցությունը ՄԽ աշխատանքին: Նա հավելել է, որ Հայաստանը երբեք չի ընդունի Թուրքիային որպես միջնորդ ղարաբաղյան կարգավորման հարցում:

«Դա հնարավոր կլինի միայն հայ-թուրքական հարաբերությունների կարգավորման դեպքում, բայց դա ձեռնատու չէ Ադրբեջանին: Ադրբեջանը թույլ չի տա, որ Թուրքիան բացի սահմանը Հայաստանի հետ: Ավելին, Հայաստանը թույլ չի տա, որ Թուրքիան դառնա ԵԱՀԿ Մինսկի խմբի անդամ»,-ասել է նա:

Ըստ Բրայզայի, Գերմանիան ևս ունակ չէ զգալի ավանդ ունենալ հակամարտության կարգավորման գործում: «Ես չգիտեմ, ով և ինչու է առաջարկել որպես միջնորդ ներգրավել Գերմանիային, և ինչպես այդ երկիրը կարող է օգնել այս հարցում: Կարծում եմ ԵՄ-ն այս առումով ավելի արդյունավետ կլիներ, քանի որ ԱՄՆ և Ռուսաստանի գործընկներն է»,-ասել է նա:

Բրայզան կարծիք է հայտնել, որ շատ ավելի արդյունավետ կլիներ, եթե ԵԱՀԿ ՄԽ-ն դուրս գար բանակցային գործընթացից՝ հնարավորություն տալով Հայաստանի և Ադրբեջանի նախագահներին խոսել առանց միջնորդների: «Այլևս միջնորդների կարիք չկա, կողմերը կարող են հատուկ ներկայացուցիչներ նշանակել, որոնք կզբաղվեն հանդիպումների կազմակերպմամբ: Կարևորն այն է, որ Հայաստանի ու Ադրբեջանի նախագահներն անմիջապես իրար հետ շփվեն: Այժմ շատ հեշտ է մեղադրել միջազգային միջնորդներին, սակայն նրանք ոչինչ չեն որոշում, նրանք առաջարկում են լուծման ուղիները»,-ասել է Բրայզան: