Ռուս պատգամավորները Երևանում կքննարկեն եվրասիական ինտեգրումը և Գյումրիի սպանության հետաքննության ընթացքը

PanARMENIAN.Net - Մարտի 28-ին Երևանում գումարվել է ՀՀ ԱԺ արտաքին հարաբերությունների և ՌԴ Պետդումայի ԱՊՀ գործերի, եվրասիական ինտեգրման ու հայրենակիցների հետ կապերի կոմիտեների համատեղ նիստը:

«Օրակարգում են եվրասիական ինտեգրման, միգրացիայի, ինչպես նաև Հայոց ցեղասպանության 100-րդ տարելիցին առնչվող թեմաներ»,-ասել է լրագրողներին Դումայի կոմիտեի ղեկավար Լեոնիդ Սլուցկին, որը գլխավորում է ռուս խորհրդարանականների պատվիրակությունը:

Սլուցկին նշել է, որ մարտի 29-ին Պետդումայի կոմիտեի պատվիրակությունը մտադիր է այցելել Գյումրի, ծաղիկներ դնել Ավետիսյանների ընտանիքի անդամների շիրիմներին:

«Ինչ վերաբերում է Գյումրիի ողբերգությանը, ապա այն չդարձավ, ինչպես ասում էին մեր ռազմավարական ընդդիմախոսները, այն անկյունաքարը, որի շուրջ մենք պետք է առճակատվեինք պաշտոնական Երևանի հետ»,-ավելի վաղ հայտարարել էր խորհրդարանականը:

Սլուցկին հայտնել է նաև, որ մարտի 28-ին տեղի կունենա նաև սյդ սպանության հետաքննության ընթացքին հետևող համատեղ հանձնաժողովի նիստը: «Մեր կողմից այն գլխավորում է պատգամավոր Օլեգ Լեբեդևը «Եդինայա Ռոսիայից»,-հավելել է կոմիտեի ղեկավարը, հայտնում է Ինտերֆաքսը:

Հունվարի 12-ին Գյումրիում հայտնաբերվեցին Ավետիսյանների ընտանիքի 6 անդամի դիերը: Ընտանիքի մյուս երեխան՝ 6-ամսական Սերյոժա Ավետիսյանը, ծանր մարմնական վնասվածքներով տեղափոխվել էր հիվանդանոց, որտեղ վիրահատվեց։ Չնայած բժիշկների ջանքերին, երեխային փրկել չհաջողվեց, փոքրիկը մահացավ հունվարի 19-ին: Հայ-թուրքական սահմանը հատելու փորձի ժամանակ հայտնաբերված կասկածյալ Վալերի Պերմյակովին մեղադրանք առաջադրվեց, նա ընդունել է իր կատարած հանցանքը: Նրան տեղափոխեցին ռուսական ռազմակայան, ինչը բողոքի մեծ ալիք բարձրացրեց:

ՀՀ գլխավոր դատախազության միջնորդությունն այժմ քննարկվում է ՌԴ գործընկերների կողմից: Միջնորդության շուրջ ստեղծված թյուրըմբռնումներից խուսափելու համար հրապարակվեց դրա վերաբերյալ ՀՀ գլխավոր դատախազության միջազգային-իրավական կապերի բաժնի կողմից ՌԴ գլխավոր դատախազություն ուղարկված հարցման պատասխանի լուսապատճենը: