Frankfurter Allgemeine Zeitung. Ալիևը Եվրոպական խաղերն օգտագործում է սեփական ամբիցիաներն առաջ մղելու համար

1 ապրիլի 2015 - 16:08 AMT

PanARMENIAN.Net - 10 շաբաթից մեկնարկելու են Եվրոպական խաղերը` մարդու իրավունքները խախտող Ադրբեջանի վարչակարգի պրեստիժ մի նախագիծ: Զուգահեռ սաստկանում է Եվրոպական օլիմպիական կոմիտեին ուղղված քննադատությունը, գրում է Frankfurter Allgemeine Zeitung գերմանական թերթը:

Նախքան հունիսի 12-ին կայանալիք Եվրոպական խաղերի բացման արարողությունը` Ադրբեջանի մայրաքաղաք Բաքվում, Human Rights Watch իրավապաշտպան կազմակերպությունը Գերմանիայի օլիմպիական սպորտային կոնֆեդերացիայի (DOSB) ներկայացուցիչների հետ հանդիպմանը մատնանշել է երկրի նախագահ Իլհամ Ալիևի կողմից մարդու իրավունքների լուրջ խախտումները:

«Խաղերը չեն հանգեցրել Ադրբեջանում քաղաքականության փոփոխմանը: Ընդհակառակը, Ադրբեջանում իրավիճակն ավելի վատ է, քան մեկ տարի առաջ»,- թերթի հետ զրույցում ասել է իրավապաշտպան կազմակերպության` Եվրոպայի ու Կենտրոնական Ասիայի հարցերով տնօրեն Հյու Ուիլյամսոնը, փոխանցում է Panorama.am-ը:

«Բացի այդ, հիասթափեցնում է այն հանգամանքը, որ այլ Ազգային օլիմպիական կոմիտեները մինչ օրս չեն արձագանքում Ադրբեջանում մարդու իրավունքների խախտումներին»:

Նիդեռլանդների օլիմպիական կոմիտեի մամուլի քարտուղարը նկատել է, որ «օլիմպիական արժեքները Եվրոպական խաղերի անքակտելի մասնիկն են, և ընդունող երկիրը պատասխանատվություն է կրում այդ արժեքների պահպանման համար»:

Իսկ ահա Նորվեգիայի օլիմպիական կոմիտեի ներկայացուցիչը մանրամասնել է, թե Եվրոպական խաղերին տարբեր մարզիկների մասնակցությունը «ինքնին լուսաբանում է Բաքվում մարդու իրավունքների խախտումների խնդիրը»: DOSB-ի ներկայացուցիչ Քրիստիան Կլայեն միակն է, որ անհանգստություն է հայտնել Ադրբեջանում կատարվող իրադարձությունների առնչությամբ` խոստանալով սույն հարցը բարձրացնել Բաքվում:

Թերթը գրում է, որ հետսովետական այդ երկրում 60-ականների վերջից ի վեր կառավարում է Ալիևների կլանը: Այդտեղ 2014 թվականին ձերբակալվել են հայտնի լրագրողներ ու իրավապաշտպաններ, որոնց թվում` Լեյլա ու Արիֆ Յունուսները, Խադիջա Իսմայիլովան:

Նշվում է նաև, որ վերջերս Amnesty International կազմակերպության կողմից հրապարակված տեսագրությունում ձերբակալված իրավապաշտպաններ Յունուսների դուստրը` Դինարա Յունուսը, հարց է ուղղում Ադրբեջանի նախագահ Իլհամ Ալիևին. «Պարոն նախագահ, Դուք կարո՞ղ եք բացատրել ինձ, թե ինչու է իմ մայրը ձերբակալվել այն բանից հետո, երբ քննադատության է ենթարկել Եվրոպական խաղերը»:

Ինչպես ընդգծված է հոդվածում, «Լրագրողներ առանց սահմանների» կազմակերպությունն իր հերթին մամուլի ազատության իր վարկանշային աղյուսակում Ադրբեջանը զետեղել է 162-րդ հորիզոնականում 180 երկրների շարքում, իսկ ահա «Լրագրողների պաշտպանության կոմիտեն» (CPJ) դեռևս ուրբաթ օրը նշել է, որ Ադրբեջանը գրավում է 9-րդ տեղը ձերբակալված լրագրողների առավել մեծ քանակ ունեցող պետությունների շարքում:

Ասվում է նաև, որ Ալիևը, լինելով երկրի Ազգային օլիմպիական կոմիտեի նախագահը, օգտագործելով Եվրոպական խաղերը, փորձում է առաջ մղել իր պետության սպորտային-քաղաքական ամբիցիաները:

«Անցած շաբաթ Ալիևն ասել է, թե երկար տարիներ շարունակվում է իր երկրի դեմ արշավը, որին վերաբերում է նաև ՀԿ-ների քննադատությունը»:

Die Weltpolitik-ը, անդրադառնալով թեմային, գրում է, որ Ալիևը ղեկավարվում է ոչ թե «միջազգային իրավունքով, այլ երկերեսանիությամբ, երկակի ստանդարտներով, խտրականությամբ, ռասսիզմով, իսլամատյացությամբ ու այլատյացությամբ»:

Հռոմում կայացած Եվրոպական Օլիմպիական կոմիտեների գլխավոր ասամբլեայի ժամանակ որոշվել է, որ 2015 թվականից անցկացվելու են Եվրոպական Օլիմպիական խաղեր:

Առաջինն այդ խաղերն անցկացելու հնարավորությունը ստացել է Բաքուն, որպես հայտ ներկայացրած միակ քաղաքը: Բաքուն «նոր Օլիմպիական խաղերի» մայրաքաղաք է ընտրվել փակ քվեարկությամբ, որի արդյունքում ստացել է 38 կողմ, 8 դեմ և երկու ձեռնպահ ձայն: Ասամբլեային ներկա են եղել նաև Հայաստանի ազգային Օլիմպիական կոմիտեի ներկայացուցիչները, սակայն նրանք հրաժարվել են մասնակցել քվեարկությանը:

Հղումներ թեմայով.

«Ալիևի ավտորիտար վարչակարգն օգտագործում է Եվրոպական խաղերը սեփական ամբիցիաները բավարարելու համար». Panorama.am