ՀՀ կշարունակի ԵՄ հետ սերտ գործակցությունը` հաշվի առնելով ԵՏՄ գծով պարտավորությունը

PanARMENIAN.Net - Հայաստանն ու Եվրամիությունը մտադիր են շարունակել սերտ համագործակցությունը: Այդ մասին ապրիլի 8-ին Մոսկվայում հայտարարել է ՀՀ ԱԳ նախարար Էդվարդ Նալբանդյանը, պատասխանելով այն հարցին, թե ինչպիսին է Հայաստանը տեսնում իր ապագան ԵՄ և ԵՏՄ միջև եվրասիական տարածքում:

Ըստ նրա, ինչպես և ասվեց Հայաստան-ԵՄ Խորհրդի հունվարին Բրյուսելում կայացած վերջին նիստում, Հայաստանն ու Եվրամիությունը մտադիր են շարունակել սերտ գործակցությունը բոլոր հնարավոր ոլորտներում ու բոլոր ուղղություններով` հաշվի առնելով այն պարտավորությունները, որը Հայաստանն ունի մյուս ինտեգրացիոն գործընթացներում:

«Ըստ իս, սա շատ հստակ ձևակերպում է, որտեղ պարզ ասված է ամեն ինչ: Այդ մասին ասվել է նաև Վիլնյուսի գագաթնաժողովում, նույն ձևակերպմամբ: Այո մենք Եվրասիական տնտեսական միության անդամ ենք, և միևնույն ժամանակ, հաշվի առնելով մեր պարտավորությունները, այդ թվում նաև ԵՏՄ-ում, մենք բանակցում ենք Եվրամիության հետ մեր գործընկերային գործակցությունը բոլոր հնարավոր ուղղություններով ընդլայնելու, խորացնելու նպատակով»,-ասել է Նալբանդյանը, հայտնում է EvrazesNews.ru-ն:

Ավելի վաղ Հայաստանում ԵՄ պատվիրակության քաղաքական հարցերի գծով պատասխանատու Անդրեյ Դիդենկոն հայտարարեց, որ Հայաստանի անդամակցությունը ԵՏՄ-ին նոր իրավիճակ է ստեղծում Հայաստան-ԵՄ հարաբերություններում:

Անդրադառնալով ԵՄ «Եվրոպական հարևանության քաղաքականության իրականացումը 2014 թվականին» մարտի 25-ին հրապարակված զեկույցին՝ Դիդենկոն հայտարարել է, որ զեկույցում անդրադարձ է եղել Հայաստանին, ինչպես նաև ներկայացվել են մի շարք խնդիրներ, որ առկա են երկրում: Անդրադառնալով զեկույցում արծարծված հարցերին՝ նա նշել է, որ քննարկումը վերաբերում էր ոչ թե զուտ քաղաքական, կամ տնտեսական հարցերին, այլ շոշափում էր հարցերի ողջ սպեկտրը ԵՄ գործողությունների ծրագրի իրագործմանն ուղղված ոլորտներին: Մասնավորապես, իրավունքի գերակայության, մարդու իրավունքների պաշտպանության և ժողովրդավարական բարեփոխումների ուղղությամբ:

Հայաստանին վերաբերվող բաժնում ներկայացված են 2014-ին բարեփոխումների իրականացման ջանքերն ու հիմնական զարգացումները, ինչպես նաև առաջարկներ կան հաջորդ տարվա համար՝ հաշվի առնելով Հայաստանի անդամակցումը ԵՏՄ-ին, ասել է Դիդենկոն՝ նշելով, որ ՀՀ անդամակցումը ԵՏՄ-ին նոր իրավիճակ է ստեղծում Հայաստան-ԵՄ հարաբերություններում:

Չնայած, որ Հայաստանը չի ստորագրել ԵՄ հետ որևէ փաստաթուղթ Առևտրի ազատ գոտու ստեղծման մասին, կողմերը շարունակել են քննարկել ՀՀ-ԵՄ հարաբերությունները քաղաքական և տնտեսական հարթակներում, որոնք չեն խախտում միջազգային պայմանավորվածությունները:

«Մարտի սկզբին հետագա գոծակցության շրջանակների ուրվագծման աշխատանքներն ավարտվեցին: Եվրահանձնաժողովը պետք է մանդատ տրամադրի ԵՄ անդամ երկրներին Հայաստանի հետ բանակցելու համար: Հուսով ենք, որ բանակցությունների արդյունքները կարտացոլվեն Ռիգայի գագաթնաժողովի փաստաթղթում»,-ասել է Դիդենկոն:

Սեպտեմբերի 3-ին Ռուսաստանի նախագահ Վլադիմիր Պուտինի հետ հանդիպման ավարտին Հայաստանի նախագահ Սերժ Սարգսյանը հայտարարեց Մաքսային միությանը միանալու և հետագայում ԵվրաԱզԷՍ-ի ձևավորմանը մասնակցելու իր ցանկության մասին: Հայաստանի այս որոշումը քննադատության ենթարկվեց եվրոպական կառույցների ու փորձագիտական շրջանակների կողմից, որոնք հայտարարեցին, որ Հայաստանը գործնականում խզեց բանակցությունները Եվրոպայի հետ, ինչն անհնար է դարձնում ԵՄ հետ Ասոցացման համաձայնագրի նախաստորագրումը Վիլնյուսում՝ ԵՄ և Արևելյան գործընկերության ղեկավարների գագաթաժողովում:

2015-ի հունվարի 2-ից Հայաստանը դարձավ ԵՏՄ լիիրավ անդամ: