Ցեղասպանության 100-րդ տարելիցին նվիրված ոգեկոչման միջոցառումներ են անցել չինական Նանկինում և Շանհայում

Ցեղասպանության 100-րդ տարելիցին նվիրված ոգեկոչման միջոցառումներ են անցել չինական Նանկինում և Շանհայում

PanARMENIAN.Net - Չինաստանի Հայերի միությունն ապրիլի 24-ին և 25-ին Հայոց ցեղասպանության 100-րդ տարելիցի ոգեկոչման արարողություններ է առաջարկել Չինաստանի Նանկին և Շանհայ քաղաքներում: Հիշատակի հիմնական միջոցառումները կազմակերպվել էին Նանկինում:

Նանկինն ընտրվել էր որպես Ցեղասպանության հիշատակի արարողությունների կենտրոն, քանի որ 1937 թվականին այդ քաղաքում ճապոնացիները 300 հազար չինացիների սպանեցին, և այդ իմաստով ընդհանուր վիշտը համախմբում է հայերին ու չինացիներին: Ինչպես Հայոց ցեղասպանության դեպքում, այս դեպքում ևս հանցագործության կազմակերպիչները չեն ճանաչում իրենց մեղքը:

1937թ. դեկտեմբերին ճապոնա-չինական պատերազմի ժամանակ Ճապոնիայի կայսերական բանակի զինվորները բազում խաղաղ բնակիչների սպանեցին Նանկինում, որն այն ժամանակ Չինաստանի Հանրապետության մայրաքաղաքն էր:

2007-ին հրապարակվեցին միջազգային բարեգործական կազմակերպություններից մեկի փաստաթղթերը, որն աշխատում էր Նանկինում պատերազմի ժամանակ: Այդ փաստաթղթերը, ինչպես նաև ճապոնական զորքերից առգրավված գրությունները, վկայում են, որ ճապոնացի զինվորները մոտ 200 000 չինացի քաղաքացիական անձանց ու զինվորականների են սպանել, ևս առնվազն 150 000 մարդ է սպանվել Նանկինում հայտնի կոտորածի ժամանակ: Զոհերի առավելագույն թիվը, ըստ որոշ գնահատականների, հասնում է 500 000-ի:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
Նա նշել է, որ դիտարկում է հայկական բանակին «ոչ մահաբեր ձևաչափով» աջակցություն ցուցաբերելու հնարավորությունը, բայց կոնկրետ որոշումներ չկան
---