Freedom House-ի նախագահ. Ժամանակն է պատժամիջոցներ կիրառել Ադրբեջանում մարդու իրավունքները խախտողների դեմ 5 օգոստոսի 2015 - 16:35 AMT PanARMENIAN.Net - Freedom House-ի նախագահ Մարկ Լագոնը «Ամերիկայի ձայն» ռադիոկայանին տված հարցազրույցում կոչ է արել Վաշինգտոնին և Արևմուտքին առհասարակ արձագանքել մարդու իրավունքների զանգվածային ոտնահարումներին և քաղաքացիական հասարակության հետապնդումներին Ադրբեջանում: «Իրավիճակը ծայրահեղ ծանր է, Ադրբեջանում ավելի շատ քաղբանտարկյալ կա, քան Ռուսաստանում և Բելառուսում միասին վերցրած»,-ասել է նա: Փորձելով մեկնաբանել իշխանությունների դաժանության պատճառը` Լագոնն ասել է, որ «ավտորիտար և կոռումպացված ռեժիմները վախենում են քաղաքացիական հասարակությունից, որը մերկացնում է իշխանությունների հանցագործությունները: Հետապնդումները բերանը փակելու և քննադատող ձայները խլեցնելու փորձ են»,-ասել է նա, հայտնում է contact.az-ը: Միևնույն ժամանակ, դա վկայում է, որ Բաքուն պատշաճ ճնշում չի զգում միջազգային հանրության կողմից: Եվրամիությունն ու ԱՄՆ-ն, մեծ հետաքրքրություն դրսևորելով էներգետիկայի, առևտրի և անվտանգության հարցերի հանդեպ, նույնքան ուշադրություն չեն հատկացնում մարդու իրավունքներին: Դա հիմք է տալիս իշխանություններին այդ կերպ վարվել, ասել է Freedom House-ի ղեկավարը: Այն հարցին, թե այդ դեպքում ինչ պետք է անի Արևմուտքը, Լագոնը նշել է, որ Ամերիկայում կա հստակ մեխանիզմ` պատժամիջոցների կիրառում կոռումպացված անձանց և մարդու իրավունքների խախտողների դեմ: «Հիմա ամենապատշաճ պահն է այդ պատժամիջոցների կիրառման համար»,-ասել է նա: Լագոնը նշել է նաև, որ Վաշինգտոնը չպետք է առևտուր անի այդպիսի երկրների հետ: «Դա արմատապես հակասում է ԱՄՆ շահերին, էլ չենք ասում մեր արժեքների մասին»,-ասել է նա:-Այս ֆոնին, բրիտանական ВР-ն բիզնես է կառուցում Ադրբեջանում, իսկ Բաքուն ստանում է իր բոլոր եկամուտները Արևմուտքում իր նավթի վաճառքից և բոլոր իր միջոցները պահում է արևմտյան բանկերում: Կարող ենք այսքանից հետո պնդել, որ Արևմուտքը լծակներ չունի Ադրբեջանի վրա ներգործելու համար: Դա կբխեր ԱՄՆ և միջազգային ընկերությունների շահերից»,-ասել է Լագոնը: Ավելի վաղ իրավապաշտպան կազմակերպությունների միջազգային կոալիցիան հայտարարությամբ հանդես եկավ Ադրբեջանի քաղաքացիական հասարակության դեմ «բռնաճնշումների աննախադեպ ալիքի» մեկնարկի առաջին տարելիցի կապակցությամբ: «Ադրբեջանի կառավարության կողմից աննախադեպ ճնշումների ու մարդու իրավունքների խախտումների մեկնարկից մեկ տարի անց երկրում իրավիճակը շարունակում է վատթարանալ: «Սպորտը հանուն իրավունքների» (Sport for Rights) կազմակերպությունը միջազգային հանրությանը կոչ է անում անհապաղ և հրապարակայնորեն քննադատել Ադրբեջանի իշխանություններին և միջոցառումներ ձեռնարկել երկրի քաղաքացիական հասարակության աջակցության համար», -ասված է փաստաթղթում: Հայտարարության մեջ թվարկվում են համեմատաբար աղմկահարույց գործերը, ինչպես, օրինակ, Լեյլա Յունուսի ու նրա ամուսնու՝ Արիֆ Յունուսի, Ինթիգամ Ալիևի, Ռասուլ Ջաֆարովի, Էմին Հուսեյնովի, Խադիջա Իսմայիլովայի և այլոց: Նշվում է, որ շատ իրավապաշտպաններ ու լրագրողներ ստիպված են եղել լքել Ադրբեջանը՝ զգուշանալով իրենց անվտանգության համար: «Միջազգային հանրությունը պետք է ուշադրություն դարձնի Ադրբեջանի վրա՝ որպես վատագույն վայրը խիզախ, անկախ և մտածող մարդկանց համար»,- կարծում է Լրագրողների պաշտպանության կոմիտեի ղեկավար Նինա Օգնյանովան: Հուլիսի 27-ին Freedom House իրավապաշտպան կազմակերպությունը հրապարակեց իր ամենամյա ուսումնասիրությունների արդյունքները, ըստ որի` նախկին ԽՍՀՄ պետություններից՝ Թուրքմենստանից և Ուզբեկստանից հետո Ադրբեջանն ամենաավտորիտար երկրներից է: «Իշխանությունները փորձում են երկիրը ներկայացնել որպես ժամանակակից, աշխարհիկ պետություն, որը այդ վտանգավոր տարածաշրջանում կայունության կղզյակ է»,- նշում են զեկույցի հեղինակները՝ թվարկելով վերջին մեկ տարվա ընթացքում Ալիևի վարչակազմի հեղինակած բռնաճնշումները լրագրողների, իրավապաշտպանների և քաղաքացիական հասարակության ներկայացուցիչների նկատմամբ: Ադրբեջանը վերջին տարիներին արժանացել է պարբերաբար կրկնվող քննադատությանը ավելի քան 100 լրագրողի, մարդու իրավունքների պաշտպանների, ընդդիմության անդամների և ժողովրդավարության համար պայքարող երիտասարդ ակտիվիստների վրա հարձակումներ կատարելու, ձերբակալելու, բանտարկելու և կտտանքների ենթարկելու համար: Մինչդեռ հունիսի 8-ին Եվրախորհրդարանի նիստում մի խումբ պատգամավորներ ակցիա անցկացրեցին` կոչ անելով ազատ արձակել Ադրբեջանում կալանավորված իրավապաշտպաններին ու լրագրողներին: Նախաձեռնությունը Եվրախորհրդարանի փոխնախագահ, «կանաչների» խմբակցության ներկայացուցիչ Ուլրիկե Լունաչեկինն էր: Նիստի բացմանը պատգամավորները շապիկներ էին հագել Լեյլա Յունուսի, Խադիջա Իսմայլովայի, Անար Մամեդլիի և մյուսների լուսանկարներով: Լունաչեկն իր ելույթում հայտարարեց, որ Եվրոպան չի կարող անտեսել քաղբանտարկյալների հարցը և կոչ արեց ԵԽ-ին հատուկ բանաձև ընդունել: Նիստին ընդառաջ հայտնի իրավապաշտպան կազմակերպությունները` Amnesty İnternational, Freedom House, Humaт Right Watch և Մարդու իրավունքների նորվեգական տունը, համատեղ հայտարարություն տարածեցին` մտահոգություն հայտնելով Ադրբեջանում Եվրախաղերի շեմին քաղաքացիական հասարակության հետապնդումների առնչությամբ: Ուշագրավ Այցն աշխատանքային է Գերատեսչությունը հայտնել է նաև գերիների թիվը՝ 511 զինծառայող 7 1 քաղաքացիական Կավելացվեն ծախսերը նաև հատուկ նշանակության նախագծերի ֆինանսավորման համար
Շատերը զրկվել են տանիքից և գիշերում են փողոցում Ամենաընթերցվողը բաժնում | Բերման է ենթարկվել անհնազանդության ակցիաների 29 մասնակից, որից 17–ը՝ Երևանում Վեդիում բերման է ենթարկվել Լևոն Քոչարյանը Amnesty International․ Ադրբեջանի կողմից էական առաջընթաց չի գրանցվել ԼՂ հայերի ապահով վերադարձի համար Նշվում է, թե Ադրբեջանի իշխանությունները համաներում էին խոստացել նրանց, ովքեր կռվել են Լեռնային Ղարաբաղի համար ԱԺ նախագահ․ Դրական եմ վերաբերվում, եթե ՀՀ–ն գազ գնի Ադրբեջանից Ըստ նրա՝ սահմանին սյուն տեղադրելը նշանակում է, որ Հայաստանն ու Ադրբեջանն իրարից տարածքային պահանջներ չունեն Զախարովա․ՌԴ–ն պատրաստ է աջակցել ՀՀ–ին և Ադրբեջանին սահմանազատման և ԼՂ հուշարձանների պահպանման հարցերում «Պայմանավորվածությունները պետք է լինեն կայուն, հավասարակշռված և փոխընդունելի»,–ասել է նա |