Միասնական արժույթի հարցը ԵՏՄ օրակարգում չի լինի առնվազն մինչև 2025 թ.

7 հոկտեմբերի 2015 - 12:33 AMT

PanARMENIAN.Net - ԵՏՄ-ում մտադիր չեն բարձրացնել միասնական արժույթի անցնելու հարցը: Այդ մասին Աստանայում հայտարարել է «Եվրասիական տնտեսական հեռանկար» IV միջազգային համաժողովին մասնակցող Եվրասիական տնտեսական հանձնաժողովի կոլեգիայի նախագահ Վիկտոր Խրիստենկոն, հայտնում է Tengrinews.kz-ն:

Նա ևս մեկ անգամ ընդգծել է, որ միասնական արժույթի անցնելու հարց օրակարգում չկա: «Այդ հարցը, եթե արծարծվի էլ, ապա միայն այն բանից հետո, երբ կավարտվի այն մեծ ծրագիրը, որն այժմ նախանշված է պայմանագրում: Կարծում եմ, որ 2025-ից շուտ այդ հարցը չի քննարկվի: Թեև այն ամենն, ինչ կապված է ազգային արժույթների արժեզրկման հետ, պահանջում է, առնվազն, արժութային քաղաքականության համաձայնեցման քննարկում: Այս առումով դա նշանակում է ավելի սերտ աշխատանք ԿԲ-ների, ֆինանսների, տնտեսական զարգացման նախարարությունների մակարդակով: Եվ այդպիսի աշխատանք սկսվել է, հուսով եմ, որ այստեղ փոխգործակցության ամրապնդումը ֆինանսական իշխանությունների միջև պետք է առավել բարենպաստ մթնոլորտ ստեղծի, նույնիսկ բարդ տնտեսական իրավիճակներում»,-հավելել է նա:

«Դա նշանակում է, որ ֆինանսական մոնետար մարմինները այսպես թե այնպես պետք է իրազեկեն միմյանց իրենց երկրների արժութային շուկաներում առկա իրավիճակի մասին, ոչ միայն տեղեկացնեն, այլ նաև աշխատեն համատեղ ջանքերով նվազեցնել այն ռիսկերը, որոնք կան, կամ համատեղ գործողություններ ձեռնարկեն»,-պարզաբանել է Խրիստենկոն:

Նախկինում Ղազախստանը ժխտում էր միասնական արժույթի ներմուծման հնարավորությունը ԵՏՄ երկրներում: Ընթացիկ տարվա ապրիլին Ղազախստանի ազգային տնտեսության փոխնախարար Տիմուր Ժակսիլիկովը հայտարարեց, որ Ղազախստանը բացառում է միասնական արժույթի ներմուծումը ԵՏՄ-ում:

«Ղազախստանը հստակ ու հետևողական դիրքորոշում ունի ԵՏՄ շրջանակում միասնական և անդրազգային արժույթի ներմուծման վերաբերյալ: Այդ հարցերը մենք չենք քննարկում: Սա օրակարգային հարց չէ»,-ասել է Ժակսիլիկովը Աստանայում կայացած ճեպազրույցում:

«Այդ ուղղությամբ աշխատանք չի տարվելու: ԵՏՄ շրջանակում մինչև 2025 թ. մենք մտադիր ենք միայն ներդաշնակեցնել օրենսդրությունները ֆինանսական շուկաների կարգավորման ոլորտում»,-ասել է փոխնախագահը: «Այստեղ ոչինչ չի ասվում մոնետար կամ արժութային միության ստեղծման կամ դրա հեռանկարների մասին»,-հավելել է Ժակսիլիկովը: Ավելի վաղ Եվրասիական տնտեսական հանձնաժողովի (ԵՏՀ) կոլեգիայի տնտեսության և ֆինանսական քաղաքականության գծով անդամ (նախարար) Տիմուր Սուլեյմենովը հայտարարեց, որ արժութային միության ստեղծում դեռ չի նշանակում միասնական արժույթի ներմուծում ԵՏՄ երկրներում:

Ըստ նրա, թեև Բելառուսը, Ռուսաստանն ու Ղազախստանն այժմ աշխատում են խորացնել ֆինանսական համակարգերի փոխգործակցությունը, տնտեսական ինտեգրման առկա մակարդակը ցույց է տալիս, որ «օբյեկտիվ տնտեսական նախադրյալներ միասնական ազգային արժույթի ներմուծման համար ԵՏՄ անդամ պետություններում այսօրվա դրությամբ չկան», հայտնել է ԵՏՀ մամուլի ծառայությունը:

Ռուսաստանի նախագահ Վլադիմիր Պուտինը երկրի Կենտրոնական բանկին ու Կառավարությանը հանձնարարել է մինչև սեպտեմբերի 1-ը ԵՏՄ անդամ պետությունների Կենտրոնական բանկերի հետ որոշակիացնել արժութային և ֆինանսական ոլորտների ինտեգրացիայի հետագա ուղղությունները, ինչպես նաև մշակել հեռանկարում արժութային միության ստեղծման նպատակահարմարությունն ու հնարավորությունները:

Դեռևս նախորդ տարի Ղազախստանում ստորագրվեցին փաստաթղթեր, որոնք ենթադրում են Եվրասիական Կենտրոնական բանկի ստեղծում մինչև 2025 թվականը և միասնական արժույթի ներմուծում Բելառուսի, ՌԴ և Ղազախստանի համար: «Սակայն արտաքին քաղաքական իրավիճակը, հավանաբար, ազդեց տնտեսական որոշումների վրա և Ռուսաստանի նախագահը որոշեց արագացնել գործընթացը»,-կարծում է «Ալպարի» վերլուծական դեպարտամենտի տնօրեն Ալեքսանդր Ռազուվաևը: Միասնական եվրասիական արժույթի աշխատանքային անվանումն ալտին է: Այս տարբերակի մասին հայտարարեց Ղազախստանի նախագահ Նուրսուլթան Նազարբաևը: Սակայն, ըստ ԶԼՄ-ների, կա նաև մեկ այլ անվանում, որ քննարկվում է՝ եվրազ:

Մարտի 20-ին Աստանայում տեղի ունեցած Բելառուսի և Ղազախստանի նախագահներ Ալեքսանդր Լուկաշենկոյի և Նուրսուլթան Նազարբաևի հանդիպմանը ՌԴ նախագահ Վլադիմիր Պուտինը հայտարարեց, որ Ռուսաստանը, Բելառուսն ու Ղազախստանը պետք է ձեռնամուխ լինեն արժութային միության ստեղծման շուրջ բանակցություններին: «Կարծում եմ, ժամանակն է խոսել հեռանկարում արժութային միության ձևավորման մասին»,-ասել է Պուտինը՝ անդրադառնալով մոնետար քաղաքականության համակարգմանը: Ըստ նրա, «ուս ուսի աշխատելով» ավելի հեշտ է պաշտպանել ընդհանուր ֆինանսական շուկան:

Հղումներ թեմայով.

Tengrinews.kz: В ЕАЭС не планируют поднимать вопрос о переходе на единую валюту