Բալայան. Թուրքիայի տեղեկատվությունը, թե Վատիկանը հետքայլ է արել ապրիլյան ուղերձից, ամբողջությամբ կեղծ է

PanARMENIAN.Net - Թուրքական տեղեկատվությունը, թե Վատիկանը հետքայլ է կատարել Հայոց ցեղասպանության մասին ապրիլյան ուղերձից ամբողջությամբ կեղծ է։ Այս մասին Twitter-ի իր միկրոբլոգում գրել է ՀՀ արտգործնախարարության մամուլի խոսնակ Տիգրան Բալայանը:

Փետրվարի 3-ին Թուրքիայի ԱԳՆ-ն հայտարարել է, թե մոտ 10 ամսի առաջ հետ կանչված դեսպան Մեհմեթ Փաչաջըն կվերադառնա Վատիկան: Նշվում է, թե Անկարան Վատիկանի հետ դիվանագիտական հարաբերությունները վերականգնելու մասին որոշումն ընդունել է Վատիկանի կողմից հատուկ հայտարարության հրապարակումից մի քանի ժամ անց:

Այդ հայտարարության մեջ Հռոմի կաթոլիկ եկեղեցին Հայոց ցեղասպանությունը որակում է որպես «1915 թվականի ողբերգական իրադարձություններ»:

Ապրիլի 12-ին Վատիկանի Սուրբ Պետրոսի տաճարում Հայոց ցեղասպանության զոհերի հիշատակի պատարագի ժամանակ Հռոմի պապ Ֆրանցիսկոսն Օսմանյան կայսրությունում հայերի սպանություններն անվանել է «20-րդ դարի առաջին ցեղասպանություն»: Նա հայտարարել է, որ XX դարում մարդկությունը վերապրել է երեք «մեծ չլսված ողբերգություն»` Հայոց ցեղասպանությունը, նացիզմն ու ստալինիզմը։

Հատկանշական է, որ պատարագը նախաձեռնել էր հենց Հռոմի պապը: Ճնշումը նրա և Սուրբ Աթոռի վրա եղել է աննախադեպ: Թուրքական կողմն ամեն կերպ փորձել է խաթարել պատարագի անցկացումը, սակայն ջանքերը զուր են անցել: Իսկ պատարագից հետո թուրքական հիստերիան նախագահի, վարչապետի, արտգործնախարարի, այլ նախարարների մակարդակով էր կոպիտ քննադատություններից մինչև վիրավորանքներ Հռոմի պապի և արգենտինացիների հասցեին:

Հռոմի պապը Վատիկանում` Արևելյան եկեղեցիների օգնության միավորման ընդլայնված նիստի մասնակիցների ընդունելության ժամանակ հորդորել է բարեգործներին քրիստոնյաներին օգնելիս չմոռանալ նաև Հայաստանի մասին:

Սեպտեմբերի 7-ին Կիլիկիայի նորընտիր պատրիարք Գրիգոր Պիեռ Գաբրոյանի հետ մատուցած պատարագի ժամանակ Սանտա Մարթա բնակավայրում գտնվող մատուռում Հռոմի պապը հայտարարել է, որ հայ ժողովրդի նկատմամբ տեղի է ունեցել ամենամեծ հալածանքներից մեկը, և հայերին հետապնդել են միայն քրիստոնյա լինելու համար։