Բնակարանամուտ Շատինում ՎիվաՍել-ՄՏՍ-ի աջակցությամբ

PanARMENIAN.Net - Բնակարանաշինության ծրագրով 2015-ին Վայոց Ձորի Շատին գյուղում երկու ընտանիք վերանորոգել է տանիքը և մեկ ընտանիք ավարտել է կիսակառույց տան շինարարությունը: ՎիվաՍել-ՄՏՍ-ի գլխավոր տնօրեն Ռալֆ Յիրիկյանը և «Ֆուլեր տնաշինական կենտրոնի» նախագահ Աշոտ Եղիազարյանը այցելել են Շատին համայնք՝ շինարարությունն ավարտած ընտանիքների հետ բնակարանամուտ նշելու համար:

Գյուլնազարյանների յոթ հոգուց բաղկացած ընտանիքը տարիներ ի վեր ապրել է քարաթափման գոտում գտնվող տանը, առանց տարրական հարմարությունների, ամեն օր աչքի առաջ ունենալով փլուզման վտանգը: 2008թ. ի վեր ընտանիքը սկսել էր նոր տան շինարարությունը՝ գյուղամիջի ապահով տարածքում, սակայն այդպես էլ չէր կարողացել ավարտին հասցնել այն:

«Տարիների երազանքն է, որ այսօր ի կատար է ածվել: Վերջապես ընտանիքս ապահով ու հարմարավետ տուն ունի, կարող ենք հանգիստ քնել՝ առանց վախենալու, որ մեր տանիքը մեր գլխին փուլ կգա: Անչափ շնորհակալ եմ»,-ասել է ընտանիքի պապը՝ Սերյոժան:

«Այս մարդկանց երջանկությունը, վերագտած հույսով և վստահությամբ լի աչքերը և ժպիտները ոգևորում են մեզ, ուժ ու եռանդ են տալիս՝ շարունակելու մեր աշխատանքը: Դրանք վկայում են այն մասին, որ ճիշտ ուղու վրա ենք, և մենք պատրաստակամ ենք շարունակելու այդ ուղին՝ արժանավայել կյանքով ապրելու հնարավորություն ընձեռելով ավելի շատ ընտանիքների»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, հայտնում է ընկերության մամուլի ծառայությունը:

«Համատեղ իրականացվող ծրագրի շրջանակում 2015-ին 40 ընտանիք, կարծես, զարթոնք ապրեց: Յուրաքանչյուր կառուցված կամ նորոգված տան հետ ընտանիքը վերագտնում է ոչ միայն կորած հույսերը, այլև ձերբազատվում է թերարժեքության բարդույթից: Տունը ընտանիքի համար դառնում է այն վայրը, որտեղից նոր հորիզոններ են բացվում»,-ասել է Հայաստանի «Ֆուլեր տնաշինական կենտրոնի» նախագահ Աշոտ Եղիազարյանը:

2007թ. իրականացվող բնակարանաշինության ծրագրի շրջանակներում, ՎիվաՍել-ՄՏՍ-ը 228,3 մլն ՀՀ դրամի ներդրում է կատարել՝ օգնելով բարելավել Հայաստանի տասը մարզի 31 գյուղի (այդ թվում՝ 10 սահմանամերձ գյուղի) սոցիալապես անապահով 480 բնակչի կենսական պայմանները: