Կոնգրեսական. Խաղաղության հաստատումը Հայաստանում և Ղարաբաղում առաջին անհրաժեշտ քայլն է

PanARMENIAN.Net - ԱՄՆ-ն պատրաստ է ֆինանսական, քաղաքական և մշակութային միջոցներով աջակցել Հայաստանում և Լեռնային Ղարաբաղում խաղաղության հաստատմանը: Այս մասին Ամերիկայի Հայ դատի հանձնախմբի կողմից ԱՄՆ-ի Կոնգրեսում կազմակերպված միջոցառմանը հայտարարել են մի շարք կոնգրեսականներ, հայտնում է «Ազատություն» ռադիոկայանը:

Կոնգրեսականներ Ադամ Շիֆը, Ջեյմս Լանգևինը, Ջուդի Չուն և Ջեքի Սփիըրը հայտարարել են, որ ամերիկացի բազմաթիվ օրենսդիրների հետ միասին հայ ժողովրդի կողքին են:

Լոս Անջելեսի շրջանից ընտրված կոնգրեսական Շիֆի խոսքով, ինքը ներկայացնում է մոլորակի լավագույն և ամենաառաջադեմ Սփյուռքը. - «Քաղաքական կյանքի առաջին իսկ օրերից ես դարձել եմ հայկական ընտանիքի անդամ և շատ շնորհակալ ու զգացված եմ՝ այդ ընտանիքի անդամ լինելով»:

Խոսելով կոնգրեսականների ներդրումի մասին՝ Վաշինգտոնի Հայ դատի գրասենյակի գործադիր տնօրեն Արամ Համբարյանն ընդգծել է, որ հպարտ է աշխատել ներկայիս Կոնգրեսի հետ, որն առաջարկել է ղարաբաղյան տարածաշրջանում խաղաղության հաստատման երեք պայմանները՝ սահմանագծից դիպուկահարների հեռացում, կրակի ուղղությունը որսացող հատուկ սարքավորումների տեղադրում և հրադադարի խախտման յուրաքանչյուր դեպքի միջազգային հետաքննություն: «Խաղաղության հաստատման բանալին առաջին հերթին օրեցօր շարունակվող բռնություններին և սպանություններին վերջ դնելն է», - ասել է նա:

Կոնգրեսական Ջուդի Չուի խոսքով, խաղաղության հաստատումը միայն առաջին քայլն է, մինչդեռ երկրորդ քայլը պետք է լինի բարգավաճման հասնելը, որի նպատակով կոնգրեսականն աջակցում է ԱՄՆ-ում և Հայաստանում երկակի հարկումից խուսափելու համաձայնագիր ընդունելու առաջարկը։ «Տնտեսական կապերը հայ-ամերիկյան երկկողմ համագործակցության կարևորագույն բաղադրիչն են», - նշել է նա:

Կոնգրեսականները ընդգծել են նաև Հայոց ցեղասպանության ճանաչման կարևորությունը, որը, Ջուդի Չուի խոսքով, անհրաժեշտ է՝ պատմության ճշմարիտ կողմում մնալու համար:

Հայկական արմատներ ունեցող կոնգրեսական Ջեքի Սփիըրն իր հերթին հիշեցրել է ԱՄՆ-ի կառավարությանը, որ Հայաստանն ընդունել է մոտ 20 հազար փախստական Սիրիայից, ինչի համար անհրաժեշտ է Հայաստանին հավելյալ միջոցներ տրամադրել՝ որպես օգնություն փախստականներին:

Լեռնային Ղարաբաղում գտնվող Քերոլայն Քոքսի անվան վերականգնման կենտրոնի ղեկավար Վարդան Թադևոսյանն ու ԱՄՆ-ում Հայաստանի դեսպան Գրիգոր Հովհաննիսյանը կոչ են արել Միացյալ Նահանգներին շարունակել Ղարաբաղի բնակչությանն օգնություն հատկացնելու քաղաքականությունը:

«Մենք շնորհակալ ենք, որ չնայած ԱՄՆ-ն չունի պաշտոնական կապեր Ղարաբաղի հետ, Կոնգրեսում մեր ընկերների և Ամերիկայի Հայ դատի հանձնախմբի շնորհիվ օգնություն այնուամենայնիվ, ստացվում է»:

Դիվանագետի խոսքով, օգնությունը թույլ է տալիս Ղարաբաղի տարածքում ականազերծում իրականացնել և ապահովել հաշմանդամների վերականգնումը՝ վերջին հաշվով նպաստելով տարածաշրջանում խաղաղության հաստատմանը:

Ավելի վաղ ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի նախագահ, հանրապետական Էդ Ռոյսը և Ներկայացուցիչների պալատի անդամ, դեմոկրատ Բրեդ Շերմանը նամակով դիմել են Միացյալ Նահանգների նախագահ Բարաք Օբամային՝ Լեռնային Ղարաբաղի հարցով: Կոնգրեսականները, մասնավորապես, խնդրում են, որ Բարաք Օբաման իր «հնարավորություններն օգտագործելով՝ անձամբ ճնշումներ գործադրի Ադրբեջանի նախագահի վրա»՝ Լեռնային Ղարաբաղի խնդրի կարգավորմանը միտված 3 պահանջներն ընդունելու նպատակով:

Ընթերցեք նաև. ԱՄՆ կոնգրեսականները կոչ են անում Օբամային անձամբ ճնշում գործադրել Ալիևի վրա Ղարաբաղի հարցով